अवैध रूपमा अमेरिका पुगेका ११५ जनालाई उनीहरूकै देश फर्काइयो

A+ A A-

अमेरिकामा गत हप्तादेखि आप्रवासनसम्बन्धी कडा नियम लागू भएको छ ।

अमेरिकाको जो बाइडेन सरकारले ‘टाइटल ८’ नियम लागू गरेसँगै ११५ जना अवैध आप्रवासीलाई उनीहरूकै देश फर्काइएको हो । ग्वाटेमालाको आप्रवासन अधिकारीहरूका अनुसार बुधबार ११५ जना निर्वासित नागरिक अमेरिकाबाट स्वदेश फर्काइएको छ ।

ग्वाटेमालाको अध्यागमन विभागका अनुसार १ सय ११ जना पुरुष र चार महिलालाई अमेरिकाले निर्वासित गरिदिएको हो । उनीहरू सन् २०२० मा अवैध रूपमा मेक्सिकोको हुँदै अमेरिका प्रवेश गरेका थिए । मेक्सिकोमा पुग्दा उनीहरूले शरणका लागि कुनै सरकारी प्रावधान पालना नगरेको बताइएको छ ।

के हो टाइटल ८ ?

अमेरिकाको नयाँ आप्रवासन नियमअनुसार अब अवैध बाटो हुँदै मेक्सिको पुगेका आप्रवासीहरूलाई अमेरिकामा स्थान नै हुनेछैन । मानव तस्करको सहायतमा खतरनाक बाटो हुँदै मेक्सिको पुग्ने मानिसहरूलाई नयाँ नियमले समस्या निम्त्याउनेछ ।

उनीहरू अवैध रूपमा अमेरिका घुस्न खोजेमा पाँच वर्षसम्म कुनै प्रायोजनका लागि अमेरिका आउन दिइने छैन भने बारम्बार यो कार्य दोहोरिएमा आपराधिक मुद्दा दर्ता गरिनेछ । नयाँ नियमअनुसार अब अमेरिकामा शरण लिन अनलाइन आवेदन दिनुपर्नेछ । उनीहरू जुनजुन देश भाग्दै गए त्यहाँ पनि आप्रवासनसम्बन्धी नियम पछ्याएका छन् कि छैनन् त्यो सबै अनुसन्धान हुनेछ ।

उनीहरूको देशको अवस्था, त्यहाँ उनीहरूलाई खतरा छ कि छैन सबै अनुसन्धान भएपछि मात्र अमेरिकामा शरण दिने प्रक्रिया बढ्नेछ । जुन प्रक्रिया सकिन वर्षौंसम्म लाग्न सक्छ । अमेरिकाले स्पष्ट रूपमा यो भनेको छ कि उसले भेनेजुएला, हाइटी, निकारगुआ र क्युबाबाट वैध रूपमा विमानमा मेक्सिको पुगेका मानिसहरूलाई मात्र शरण दिनेछ । अन्य देशका मानिसलाई अमेरिकामा स्थान छैन ।

यी देशका ३० हजार मानिसलाई हरेक महिना शरण दिइनेछ तर उनीहरूको प्रायोजक हुनुपर्नेछ र उनीहरूले अनलाइनबाट शरणका लागि आवेदन दिनुपर्नेछ । यस्तै, अमेरिकी सरकारले ग्वाटेमाला, एल साल्भाडोर र होन्डुरसबाट एक लाख मानिसलाई शरण दिनेछ । तर, उनीहरूका परिवार र आफन्त अमेरिकामा हुनुपर्नेछ । उनीहरूले पनि सुरुवातमा अनलाइनमा शरणका लागि आवेदन दिनुपर्छ । -रोयटर्सको सहयोगमा

प्रकाशित मिति: शुक्रबार, जेठ ५, २०८० १४:१८