बाख्मुतमा रुसी सेनाको ठेगानामै युक्रेनले यसरी गर्न थाल्यो आक्रमण (भिडियो)

A+ A A-

युक्रेनको बाख्मुत शहरमा पछिल्ला दिनहरूमा रुसी र युक्रेनी सेनाबीच भीषण लडाइँ चलिरहेको छ । पहिले रुसी सेनाको कब्जामा गएको बाख्मुतमा यतिबेला युक्रेनी सेना हावी हुन थालेका छन् ।

युक्रेनको स्थल सेनाका कमाण्डर ओलेक्स्यान्डर सिर्क्सकीले बिहीबार मात्र एउटा भिडियो टेलिग्राममा सार्वजनिक गरेका छन् ।

भिडियोमा युक्रेनी सेनाले रुसी सेनालाई कसरी अक्रमण गरिरहेको छ भनेर प्रस्ट देख्न सकिन्छ । भिडियोमा रुसी सेनाको ठेगानामै युक्रेनले हवाई र स्थल आक्रमण गरेको देखिन्छ ।

पछिल्लो पाँच महिनाभित्र मात्र रुसका १ लाखभन्दा बढी सेना मारिएको अमेरिकी प्रक्षेपण छ । जसमध्ये २० हजार सेना बाख्मुतमै मारिएको बताइन्छ । रुसका भाडाका लडाकुहरूले हरेक दिन हतियार दिन रुससँग हारगुहार पनि गरिरहेका छन् ।

(भिडियो)

सार्वजनिक भिडियोमा बाख्मुत शहर पूर्ण रूपमा नष्ट भएको पनि देखिन्छ, तर युक्रेनी सेना रुसी सेनामाथि भारी परेको पनि स्पष्ट हुन्छ ।

युक्रेनका राष्ट्रपति भोलोदिमिर जेलेन्स्की यसै हप्ता जर्मनी, बेलायत र फ्रान्स भ्रमण गरेर फर्किएका छन् । उनले ती देशहरूले शक्तिशाली हतियारहरू दिएको बताएका छन् ।

युक्रेनले रुसविरुद्ध निर्णायक जवाफी हमला गर्ने बताइरहँदा पश्चिमा राष्ट्रले युक्रेनलाई हतियारहरू दिइरहेका छन् । यसै हप्ता जेलेन्स्कीले युरोपेली परिषद्लाई पनि सम्बोधन गरेका थिए । आइतबार जी–७ बैठकमा भाग लिन पनि जेलेन्स्की जापान पुग्ने कार्यक्रम छ ।

जी–७ मा आबद्ध बेलायत, फ्रान्स र जर्मनीले यसै हप्ता युक्रेनलाई हतियारहरू दिने वाचा गरेका छन् । यस बैठकमा अमेरिकाले रुसविरुद्ध थप प्रतिबन्धहरू लगाउने प्रस्ताव पनि गर्नेछ ।

समग्रमा रुसलाई घेर्ने नीति लिएको जी–७ ले युक्रेनलाई थप सहयोग गर्ने अपेक्षा गरिएको छ । रोयटर्सको सहयोगमा

प्रकाशित मिति: शुक्रबार, जेठ ५, २०८० १४:००