एनसेलले ल्यायो 'एनसेल माई प्लान', सेवाग्राहीले के-के पाउँछन् सुविधा ?

A+ A A-

एनसेल आजियाटा लिमिटेडले बिहीबारदेखि आकर्षक 'एनसेल माई प्लान' सञ्चालनमा ल्याएको छ । उक्त प्लानअनुसार अब एनसेलका ग्राहकले आफ्नो आवश्यकताअनुसार सेवाको प्लान आफैँले बनाई अझ सुलभ दरमा सेवाहरू प्रयोग गर्न सक्ने कम्पनीले जनाएको छ ।

यस विशेष प्लानअन्तर्गत ग्राहकले आफ्नो भ्वाइस, डाटा र एसएमएस सेवाको आवश्यकताअनुसार आफ्नो प्लान अर्थात् बन्डल प्याक आफैँले बनाएर सेवा लिन सकिन्छ । ग्राहक आफैँले आफ्नो प्याक बनाउन सक्ने यस्तो सुविधका नेपालमा पहिलो भएको कम्पनीको दाबी छ ।

कम्पनीका अनुसार, इन्टरप्राइज ग्राहकका लागि लक्षित एनसेल फर बिजनेस सेवाअन्तर्गतको यो प्लान एनसेल एपबाट सजिलै बनाउन सकिन्छ । माई प्लानमा माई प्लान ५०० र माई प्लान फ्लेक्सी गरी दुईवटा विकल्पहरू छन् । ग्राहकले अन नेट, अफ नेट भ्वाइस, एसएमएस र डाटा भोलुम आफैँले तय गरेर आफ्नो प्याक बनाउन सक्छन् ।

कपोर्रेट तथा पोस्टपेड ग्राहकले यस प्लानलाई ३० दिनको समयचक्रमा सुचारु गर्न सक्छन् । माई प्लान ५०० को करसहित ५ सय रुपैयाँ पर्ने यस प्लानमा ग्राहकले ५ सय रुपैयाँबराबरकै अन नेट, अफ नेट भ्वाइस, एसएमएस सेवा र डाटा भोलुमको बण्डल प्याक आफैँ बनाउन सक्छन् ।

त्यस्तै, फ्लेक्सी प्लानअन्तर्गत ग्राहकले ५ सय रुपैयाँभन्दा बढी मूल्यको अन नेट, अफ नेट भ्वाइस, एसएमएस र डाटा सेवाको भोलुम निर्धारण गररी ३० दिनका लागि आफ्नो प्लान बनाउन सक्छन् ।

साथै, यस प्लानमा पाइने सेवाहरूबाहेक माई प्लान लिने ग्राहकले २५०० मिनेट अन नेट टकटाइम र १००० वटा अन नेट एसएमएस सेवा निःशुल्क प्राप्त गर्नेछन् । यसरी प्राप्त हुने अन नेट भ्वाइस र एसएमएस सेवा बिहान ६ देखि बेलुका ६ बजेसम्म प्रयोग गर्न सकिन्छ ।

माई प्लान फ्लेक्सीमा ग्राहकले जति धेरै सेवाको भोलुम राखी प्याक बनाउँछन्, त्यसैअनुरुप प्लानको मूल्य तय हुन्छ र सेवाहरू पनि तुलनात्मक रूपमा अझै सुलभ बन्ने कम्पनीले बताएको छ । त्यस्तै, माई फ्लेक्सी प्लानमा ग्राहकले अधिकतम २०० जीबी डाटा, २५०० मिनेट अन नेट, अफ टकटाइम र २५०० एसएमएसको बण्डल प्याक बनाउन सक्छन् ।

एनसेल एपबाट सजिलै लिन सकिने यो विशेष सुविधाले कर्पोरेट ग्राहकहरूमा ठूलो महत्त्व राख्छ । एनसेल एपमा ग्राहकले स्क्रिनको माथि दायाँ मेनुबारमा गई त्यहाँ प्रोफाइलमा थिचेर माई प्लान खोली आफ्नो भ्वाइस, डाटा र एसएमएस सेवाको आवश्यकताअनुरुप आफ्नो प्याक बनाउन सक्छन् ।

उदाहरणका लागि ग्राहकले ३ सय रुपैयाँबराबरको डाटा, १५० रुपैयाँबराबरको अफ नेट र अन नेट कल र ५० रुपैयाँबराबरको एसएमएस सेवासहितको आफ्नो 'माई प्लान ५००' बनाउन सक्छन् । यो प्याक ३० दिनको समयचक्रमा सञ्चालन हुने हुँदा आउट गोइङ सेवामा अवरोध नआओस् भनेर ३० दिनअगावै आफ्नो शुल्क तिर्नुपर्छ ।

३० दिनको समयअघि नै माई प्लानका सेवाहरूको प्रगोय गरिसकिएको अवस्थामा ग्राहकले पेएजयुगोअन्तर्गत विद्यमान शुल्कमा एनसेलको भ्वाइस, डाटा तथा एसएमएस सेवा लिन सक्छन् ।

प्रकाशित मिति: शुक्रबार, जेठ ५, २०८० १३:०८