गठबन्धन बैठकमा प्रचण्डले भने– मधेश सरकारको नेतृत्व लोसपालाई दिनुपर्छ

A+ A A-

मधेश प्रदेश सरकार विस्तारबारे बिहीबार काठमाडौंमा बसेकाे पाँच दलको बैठक निष्कर्षविहीन भएको छ । मधेश प्रदेश सरकार विस्तारका विषयमा बिहीबार प्रधानमन्त्री निवासमा नेपाली कांग्रेस, माओवादी केन्द्र, जनता समाजवादी पार्टी, नेकपा एकीकृत समाजवादी र लोकतान्त्रिक समाजवादी पार्टीका शीर्ष नेताहरूको बैठक बसेकाे थियाे ।

बैठकमा कांग्रेस र लोसपाका नेताहरूले उपचुनावताका भएको सहमतिअनुसार जसपाले सरकारको नेतृत्व छोड्नुपर्ने धारणा राखेका थिए । प्रधानमन्त्री पुष्पकमल दाहाल प्रचण्डले पनि चुनावका क्रममा मधेश प्रदेश सरकारको नेतृत्व लोसपालाई दिने सहमति भएको र सोहीअनुसार लोसपालाई सरकारको नेतृत्व दिनुपर्ने धारणा राखेका थिए ।

तर जसपाका अध्यक्ष उपेन्द्र यादवले भने मधेश प्रदेश सरकारको नेतृत्व आलोपालो गर्ने र पहिलो खेपको नेतृत्व जसपाले पाउनुपर्ने धारणा राखेका थिए । नेपाली कांग्रेसका नेता कृष्णप्रसाद यादवले पाँचदलीय गठबन्धनमा आफूहरू ठूलो पार्टी रहेको हैसियतले प्रदेश सरकारको पहिलो खेपको नेतृत्व कांग्रेसले पाउनुपर्ने बताए ।

लोसपाका अध्यक्ष महन्थ ठाकुरले पाँचदलीय गठबन्धनमा कुनै पनि दलसँग सरकार बनाउन सुविधाजनक बहुमत नभएको र लोसपाले राष्ट्रपति, उपराष्ट्रपतिको चुनावदेखि बाराको उपचुनावसम्म सहयोग गर्दै आएकोले सरकारको नेतृत्व लोसपाले पाउनुपर्ने बताए ।

लोसपालाई सरकारको नेतृत्व दिनुपर्ने भनेर उपचुनावअघि पाँचदलीय सहमति भएको लोसपा मधेश प्रदेश संसदीय दलका नेता अभिराम शर्माले बताए । माओवादी केन्द्र मधेश प्रदेश संसदीय दलका नेता भरत साहले प्रदेश सरकारको नेतृत्व आलोपालो गर्ने विषयमा दलहरू सहमत भए पनि पहिलो खेपको नेतृत्व कसले गर्ने विषयमा दलहरूबीच अझै सहमति हुन नसकेको बताए । उनले आज फेरि बैठक बस्ने बताए ।