१ सय ११ वर्षअगाडि समुद्रमा डुबेको टाइटानिक जहाज कस्तो अवस्थामा छ ? (भिडियो)

A+ A A-

१ सय ११ वर्षअगाडि अर्थात् सन् १९१२ मा बेलायतको विशाल टाइटानिक जहाज अमेरिकाको न्युयोर्क सिटी जाने क्रममा दुर्घटनामा परेको थियो ।

बेलायतको साउथ ह्याम्प्टनबाट चालक दलका सदस्यसहित २२ सयभन्दा बढी यात्रु बोकेर टाइटानिक जहाज उत्तर एट्लान्टिक महासागरमा तैरिरहेको थियो ।

अमेरिका जाने क्रममा अप्रिल १५ को बिहानै उक्त जहाज ठूलो बरफको हिस्सा हिमशिलामा ठोक्किँदै महासागरमा डुब्न पुग्यो । सो दुर्घटनामा १५ सय जनाले ज्यान गुमाएका थिए । सन् १९९७ मा यसै घटनामा आधारित हलिउड चलचित्र ‘टाइटानिक’ पनि निर्माण गरियो, जुन विश्वचर्चित बन्यो ।

(भिडियो)

यस दुर्घटनाबारे कैयौँ मिथक र कथा छन् र धेरैजसो मानिसहरूको जानकारी ऐतिहासिक तथ्यमा नभएर यसबारेमा बनेको चलचित्रमा आधारित छन् ।

यतिबेला वैज्ञानिकहरूले पहिलोपटक टाइटानिक जहाजको थ्रीडी भिडियो बनाउन सफल भएका छन् । भिडियोले समुद्रमुनि रहेको टाइटानिक जहाजको वर्तमान अवस्थालाई दुरुस्तै उतारिदिएको छ ।

यस कार्यले टाइटानिक दुर्घटनाको भ्रम चिर्न वैज्ञानिकहरू पहिलेभन्दा सफल हुने विश्वास गरिएको छ । वास्तवमा अहिलेसम्म वैज्ञानिकहरूले यत्तिको सफा भिडियो बनाउन सकेका थिएनन् ।

टाइटानिकको भग्नाविशेषको अवस्था पत्ता लगाउन अमेरिकी मेगाल्लन कम्पनी र बेलायती चलचित्र निर्माण कम्पनी एट्लान्टिक प्रोडक्सनले सहकार्य गरेका थिए । सन् २०२२ मा दुई अनुसन्धानमा प्रयोग हुने पनडुब्बी रोमियो र जुलियटका साथ वैज्ञानिकहरू डेटा संकलन गर्न उत्तर एट्लान्टिक महासागर गए, जहाँ टाइटानिक सय वर्षअगाडि दुर्घटनामा परेको थियो ।

त्यहाँ समुद्रको १२ हजार ५ सय फिटमुनिबाट वैज्ञानिकहरूले ७ लाख १५ हजार तस्वीर खिचे र १६ टेराबाइट डाटा संकलन गरे । तस्वीर र डाटाहरूको संयोजनमा हालसम्मकै उत्कृष्ट थ्रीडी भिडियो बनाउन आफूहरू सफल भएको मगेलान कम्पनीका सीईओ रिचार्ड पार्किन्सन बताउँछन् ।

टाइटानिकको भग्नावशेषका हरेक इन्चको फोटो खिचिएका कारण र डाटा संकलन गरिएका कारण हाल बनाइएको थ्रीडी भिडियो पहिलेभन्दा उत्कृष्ट भएको बताइएको छ । सागरको १२ हजार ५ सय फिटमुनि उज्यालो नहुने हुनाले त्यहाँका तस्वीरहरू हालसम्म राम्रो खिच्न सकिएको थिएन ।

तर, यो अभियानले टाइटानिकको पूरै हिस्सा स्क्यान गरेको छ, जसका कारण उक्त भग्नावशेषमा परिणत भएको जहाजको ठ्याक्कै अवस्था उतार्न सकिएको छ । वैज्ञानिकहरूले यो कार्यलाई ‘पानीमुनि भएको इतिहासकै सबैभन्दा ठूलो स्क्यानिङ परियोजना’ भनेका छन् ।

यससँगै अब टाइटानिक दुर्घटनाबारे धेरैभन्दा धेरै सत्यताबारे थाहा पाउन सकिने विश्वास गरिएको छ । टाइटानिकबारे २० वर्षयता अनुसन्धान गरिरहेका विज्ञ पार्क्स स्पेटहेनसनले यो अनुसन्धानलाई ठूलो सफलता भनेका छन् र अहिलेसम्म नदेखिएका विवरणहरू थाहा पाउन मद्दत पुगेको बताउँछन् ।

थ्रीडी भिडियो बनाउन लागिपर्ने विज्ञ गेरहार्ड सिफेर्ट पनि यस विषयमा भन्छन्, ‘यो त्यो टाइटानिक हो, जो पहिले कहिल्यै देखिएको थिएन । यो नै वास्तविक टाइटानिक हो ।’ टाइटानिक दुर्घटना अनुसन्धानमा यो कार्यले नयाँ अध्यायको सुरुवात गरिदिएको विश्लेषण भइरहेको छ ।

– रोयटर्स र सीएनएनको सहयोगमा

प्रकाशित मिति: बिहीबार, जेठ ४, २०८० २१:२८