चन्द्र भण्डारीलाई भेट्न पुगे सभामुख देवराज घिमिरे

A+ A A-

ग्यास लिकपछि आगलागीबाट घाइते भएका नेपाली कांग्रेसका सांसद चन्द्र भण्डारीलाई आज साँझ सभामुख देवराज घिमिरेले बत्तिसपुतलीस्थित निवासमा पुगेर भेट गरेका छन् ।

सभामुख घिमिरेले घटनाबाट आफू दुखित भएको बताउँदै भण्डारीको शीघ्र स्वास्थ्यलाभको कामना गरे । भेटमा भण्डारीले आफूले नीति तथा कार्यक्रममा आफ्ना केही कुराहरू राख्न चाहेको बताए ।

'नीति तथा कार्यक्रममाथिको छलफलका सहभागी भएर आफ्ना कुरा राख्न मन छ । घटनापछि मलाई केही कुराहरू सदनमार्फत् जनतालाई सुनाउन मन छ । जीवन जतिबेलासम्म रहे पनि कमसेकम मनका कुरा भनौँ भन्ने लागेको छ,' भण्डारीले भने, 'तत्कालीन सभामुख सुवासचन्द्र नेम्वाङले संविधानसभामा कठीन अवस्थामा पनि अभिभावकत्व निर्वाह गर्नुभयो । सम्माननीयज्यूबाट पनि संसदको अभिभावत्व कुशलतापूर्वक निर्वाह गर्नुहुन्छ भन्ने लागेको छ ।'

जवाफमा घिमिरेले चिकित्सकले सिफारिस गरे विशेष व्यवस्था गरेर बोल्ने व्यवस्था मिलाउने बताए । 'चिकित्सकको सिफारिस हुन्छ भने विशेष व्यवस्था गरेर तपाईंलाई बोल्ने व्यवस्था मिलाउँछौँ,' घिमिरेले भने, 'तर, जीवन रहे बोल्ने अवसर त आइहाल्छ । अहिले स्वास्थ्यको राम्रो ख्याल गर्नुहोला ।'

संघीय संसदका महासचिव डा. भरतराज गौतमले पनि स्वास्थ्यले साथ दिए बोल्ने व्यवस्था मिलाइने बताए । 'माननीयज्यूको स्वास्थ्यले साथ दिन्छ भने सचिवालयले विशेष व्यवस्था गर्छ,' उनले भने ।

२०७९ फागुन ३ गते बुद्धनगरस्थित निवासमा ग्याँस लिक भई आगलागी हुँदा भण्डारी गम्भीर घाइते भएका थिए । उनलाई फागुन ४ गते उपचारका लागि मुम्बई लगिएको थियो । मुम्बईस्थित नेसनल बर्न्स सेन्टरमा उपचार गराएर भण्डारी वैशाख १७ मा काठमाडौं फर्किएका थिए ।

सोही आगलागीमा परेकी भण्डारीकी आमा हरिकला भण्डारीको उपचारका क्रममा फागुन ४ गते कीर्तिपुरमा निधन भएको थियो ।

प्रकाशित मिति: बुधबार, जेठ ३, २०८० २१:१०