अमेरिकी हतियारले रुसका ६ हाइपरसोनिक क्षेप्यास्त्र असफल बनायौँ : जेलेन्स्की (भिडियो)

अमेरिकी हतियारले रुसका ६ हाइपरसोनिक क्षेप्यास्त्र असफल बनायौँ : जेलेन्स्की (भिडियो)

A+ A A-

रुसले आफ्नो हालसम्मकै सबैभन्दा खतरनाक क्षेप्यास्त्र भनेको किन्जल मिसाइल युक्रेनमा असफल भएको राष्ट्रपति भोलोदिमिर जेलेन्स्कीले बताएका छन् ।

रुसले युक्रेनको राजधानी किभमा मंगलबार बिहान झिसमिसेमै घातक हवाई आक्रमण गरेको थियो । युक्रेनले सार्वजनिक गरेको भिडियोमा किभमा हवाई हमला भएको देख्न सकिन्छ । जेलेन्स्कीका अनुसार रुसको हालसम्मकै खतरनाक किन्जल हाइपरसोनिक क्षेप्यास्त्र राजधानी किभमा हानिएको थियो । किन्जलसँगै ड्रोन हतियार पनि सो आक्रमणमा प्रयोग गरिएको थियो ।

जेलेन्स्कीले आइसल्यान्डमा आयोजित युरोपेली परिषद् काउन्सिल अफ युरोपको बैठकलाई अनलाइनमा सम्बोधन गर्दै आफूहरूले अमेरिकी प्याट्रियट एन्टी मिसाइल प्रणालीको सहयोगबाट रुसका ६ किन्जल हतियार आकाशमै असफल बनाउन सफल भएको बताएका हुन् ।

भिडियो

रुसको सबैभन्दा अत्याधुनिक र खतरनाक किन्जल क्षेप्यास्त्र म्याच १० अर्थात् ध्वनिको गतिभन्दा १० गुणा तीव्र भएको रुसी दाबी छ । यो क्षेप्यास्त्र लडाकु विमानबाट हान्नका लागि बनाइएको हो । ४८० केजीको विस्फोटक पदार्थ हुने यस क्षेप्यास्त्रले १५ सयदेखि २ हजार किलोमिटरसम्मको दूरीमा पुगेर मार हान्न सक्छ ।

रुसको सबैभन्दा परिस्कृत हाइपरसोनिक क्षेप्यास्त्र खसाउन युक्रेनसक्षम भएसँगै अब रुसलाई युक्रेनविरुद्धको युद्ध जित्न झनै कठिन हुने विश्लेषण भइरहेको छ । रुसी राष्ट्रपति भ्लादिमिर पुटिनले किन्जलको तीव्रता, गतिशीलता र उचाइ क्षमताका कारण यसलाई ट्र्याक गर्न र असफल बनाउन गाह्रो हुने दाबी गर्छन् । यद्यपि, युक्रेनले भने यो क्षेप्यास्त्र खसाइदिएको बताइरहेको छ ।

आइतबार र सोमबार मात्र जेलेन्स्की जर्मनी, फ्रान्स र बेलायत हतियार सहयोग माग्न पुगेका थिए । युक्रेनले रुसविरुद्ध कडा जवाफी अभियान थाल्ने योजना बनाएको छ । र, हाल उसले विभिन्न देशसँग हतियार मागिरहेको छ । युरोपेली परिषद्ले युक्रेनलाई आवश्यक सहयोग गर्ने वाचा गरेको छ ।

विशेष गरी जर्मनी, फ्रान्स र बेलायतले खुलेरै युक्रेनलाई हतियार सहयोग गर्नुपर्छ भनिरहेका छन् । आइतबार र सोमबार मात्र पनि उनीहरूले युक्रेनलाई हतियार दिने बताएका थिए । सो बैठकमा जर्मन चान्सलर ओलाफ स्कोल्जले रुसका कारण युक्रेनमा विध्वंस मच्चिएकाले उसैले युक्रेनलाई क्षतिपूर्ति दिएर पुनर्निर्माणमा सहयोग गर्नुपर्ने अभिव्यक्ति दिएका छन् । -रोयटर्स

प्रकाशित मिति: बुधबार, जेठ ३, २०८० १६:२६