खाँण निलम्बनबारे देउवालाई गगन थापाले भने- गलत कुरालाई परम्पराका नाममा बोकेर हिँड्न हुन्न

खाँण निलम्बनबारे देउवालाई गगन थापाले भने- गलत कुरालाई परम्पराका नाममा बोकेर हिँड्न हुन्न

A+ A A-

नेपाली कांग्रेसका महामन्त्री गगन थापाले नक्कली भुटानी शरणार्थी प्रकरणमा मुसिएका जोकोहीलाई पनि कारबाही गर्नबाट पछि हट्न नहुने बताएका छन् ।

बुधबार काठमाडौंमा आयोजित प्रजातान्त्रिक विचार समाजको १२ औँ राष्ट्रिय महाधिवेशनलाई सम्बोधन गर्दै उनले नक्कली भुटानी शरणार्थी प्रकरणमा कांग्रेस पार्टीबाट नाम जोडिएका नेता बालकृष्ण खाँणलाई पार्टीले तत्काल निलम्बन गर्नुपर्ने बताए । उनले अनुसन्धानमा पार्टी जोडिनु नहुने र अनुसन्धानबाट दोषी ठहरिए सबैलाई कारबाही हुनुपर्ने बताए ।

महामन्त्री थापाले नक्कली भुटानी शरणार्थी प्रकरण राष्ट्रविरुद्धको अपराध भएको बताए । उनले कुनै पनि पदमा बसेको व्यक्ति अभियोग लागिसकेपछि निर्दोष नहुन्जेसम्म स्वतः निलम्बनमा पर्ने बताए । थापाले पार्टीको बैठकमा यसबारेमा छलफल भए पनि केही नेताहरूले पार्टीको परम्परा नरहेको भन्दै पन्छिन खोजेकाले परम्परा तोडेर भए पनि निलम्बन गर्न आवश्यक रहेको बताए ।

गलत कुरालाई परम्पराको नाममा बोकेर हिँड्न नहुने थापाले बताए । उनले पार्टीका नेताहरू भ्रष्टाचारी भए पनि पार्टी नै भ्रष्टाचारी हो भन्न नमिल्ने बताए । ‘अभियोगमा लागेपछि त्यो स्वतः निलम्बनमा पर्छ । प्रमाणित भएन भने स्वतः आउँछ । यो आग्रह, पूर्वाग्रह होइन । गलत कुरालाई परम्पराको नाममा बोकेर हिँड्नु हुँदैन,’ उनले भने, ‘पार्टीका मान्छे भ्रष्टाचारी हुनसक्छन् तर पार्टी भ्रष्टाचारी हुन सक्दैन । जोसुकैमाथि जरा जहाँसम्म पुगेको भए पनि त्यो ठाउँसम्म कारबाही हुनुपर्छ ।’

महामन्त्री थापाले लोक रिजाइको राजनीति हाबी भएको भन्दै मानिसलाई उचाल्ने काम भइरहेको बताए । उनले कांग्रेसलाई अब नेताबाट नागरिकमा फर्काउनुपर्ने आवश्यकता रहेको बताए ।