रेशमले भने– सर्वाेच्चकाे फैसला स्वीकार्नुकाे विकल्प छैन, फेसबुकमा जथाभावी नलेख्नू

रेशमले भने– सर्वाेच्चकाे फैसला स्वीकार्नुकाे विकल्प छैन, फेसबुकमा जथाभावी नलेख्नू

A+ A A-

नागरिक उन्मुक्ति पार्टीका संस्थापक रेशमलाल चौधरीले टीकापुर हत्याकाण्डको मुद्दामा सर्वाेच्चबाट जन्मकैदको सजाय सदर भए पनि आफू विचलित नभएको बताएका छन् । उनले पुनरावलोकनको बाटो खुला रहेको उल्लेख गर्दै न्यायको पर्खाइमा आशावादी रहेको बताएका छन् ।

मंगलबार सर्वाेच्च अदालतले रेशमको मुद्दामा जिल्ला र उच्च अदालतले सुनाएको जन्मकैदको फैसला सदर गरेको थियो । यसप्रति चौधरीले आज विज्ञप्ति जारी गर्दै सर्वाेच्चको फैसला आफूप्रति न्यायिक नभए पनि स्वीकार्नुको विकल्प नरहेको बताएका छन् ।

उनले भनेका छन्, ‘कैलालीको टीकापुर घटनालाई लक्षित बनाएर गरेको फैसला स्वीकार्दै पुनरावलाेकनको बाटो हाम्रो लागि खुल्ला छ । हामी सम्मानित अदालतलाई सदा सम्मान गर्छौं । साथै, सम्मानित अदालतलाई सबैले उत्तिकै सम्मान गर्नुपर्छ ।’

उनले सर्वाेच्च अदालतको फैसलालाई अनर्गल बनाउँदै जथाभावी सामाजिक सञ्जालमा जे पायो त्यही पोस्ट नगर्न पनि आग्रह गरेका छन् । ‘मलाई अझै सम्मानित सर्वोच्च न्यायालयप्रति भरोसा छ । हामी अझै न्यायिक पर्खाइमा छौँ । त्यसैले सबैलाई सम्मानित सर्वोच्च अदालतको सम्मान गर्न अनुरोध गर्दछु,’ रेशमले भनेका छन् ।

उनले आफू डिल्लीबजार कारागारमा धैर्य, सहनशीलताका साथ कैद भुक्तान गरिरहेको जानकारी दिँदै अगाडि भनेका छन्, ‘स्वस्थ छु । रत्तिभर मन विचलित छैन, पुस्तक लेखिरहेको छु । केही दिनमा ‘धरातल’ नामक पुस्तकको साथ तपाईंसमक्ष साक्षात् हुनेछु ।’

७ भदौ २०७२ मा थरुहट आन्दोलनका क्रममा हिंसा भड्किँदा एक नाबालकसहित आठ प्रहरीको मृत्यु भएको थियो । यो नरसंहारको घटनामा मुख्य योजनाकार रहेको अभियोगमा रेशमलाई जन्मकैदको सजाय सुनाइएको हो ।

विज्ञप्ति:

REsham Chaudhari's Bigyapti1684309833.jpg