कांग्रेस रुपान्तरण अभियानको घोषणा, सातै प्रदेशमा बृहत भेला गरिने

A+ A A-

नेपाली कांग्रेस रुपान्तरण अभियानको घोषणा भएको छ ।

कांग्रेस केन्द्रीय सदस्य मधु आचार्य, पूर्वकेन्द्रीय सदस्य गुरुराज घिमिरेलगायत युवा नेताहरूले कांग्रेस रुपान्तरण अभियानको घोषणा गरेका हुन् । पार्टीभित्र रुपान्तरणसँगै पुस्तान्तरण आवश्यक रहेको भन्दै उनीहरूले रुपान्तरण अभियान चलाउन लागेका हुन् ।

रुपान्तरण अभियानअन्तर्गत सातै प्रदेशमा भेला र अन्तर्क्रिया कार्यक्रम गरिने अभियानका नेतृत्वकर्ता तथा कांग्रेस केन्द्रीय सदस्य मधु आचार्यले बताए । उनका अनुसार जेठ ११ गतेदेखि मधेश प्रदेशको राजधानी जनकपुरबाट अभियानको सुरुवात गरिनेछ ।

अभियानअन्तर्गत बागमती प्रदेशको भेला जेठ १६ गते काठमाडौंमा, जेठ २० गते गण्डकी प्रदेशको पोखरामा, जेठ २२ गते लुम्बिनी प्रदेशको राजधानी दाङमा, जेठ २४ गते कर्णालीको सुर्खेत, जेठ २६ मा सुदूरपश्चिमको धनगढी र जेठ २९ गते कोशी प्रदेशको इटहरीमा बृहत भेला तथा अन्तर्क्रिया गरिने उनले बताए ।

उनका अनुसार जेठ ३१ गते डायस्पोराको काठमाडौंमा भेला गरिने छ । व्यक्ति वा गुटकेन्द्रित राजनीतिको अन्त्य, भ्रातृ संस्थाहरूको पुनर्जीवन, निर्वाचन प्रणालीमा परिवर्तनलगायतका एजेन्डालाई अघि सारेर अभियान चलाउन थालिएको केन्द्रीय सदस्य आचार्यले बताए ।

उनका अनुसार सातै प्रदेश र डायस्पोरामा हुने भेलाबाट प्राप्त सुझावका आधारमा आगामी कार्यक्रम तय गरिने उनले बताए । कांग्रेसमा बीपीकालीन संस्कृति र संस्कार भित्र्याउन अहिलेको कांग्रेसमा नयाँ सभ्यताको पुनर्जागरण ल्याउने आफूहरूको अठोट रहेको आचार्यले बताए । कांग्रेसको निर्णय प्रक्रिया, गतिविधि, वैचारिक यात्रा र सांगठनिक क्षमता एवं योग्यतामा सुस्तता र बिराम लागेको उनीहरूको निष्कर्ष छ ।

प्रकाशित मिति: मंगलबार, जेठ २, २०८० १६:५०