सार्वजनिक लेखा समितिले गर्ने काम सार्वजनिक गर्न समितिका सचिवलाई निर्देशन

A+ A A-

सार्वजनिक लेखा समिति सभापति (ज्येष्ठ सदस्य) अर्जुनरसिंह केसीले समितिले गर्ने हरेक काम सार्वजनिक गर्न समिति सचिवलाई निर्देशन दिएका छन् ।

मंगलबार प्रतिनिधिसभाअन्तर्गतको सार्वजनिक लेखा समितिको पहिलो बैठकमा केसीले देशको अर्थतन्त्रमा देखिएका अनियमिता र भ्रष्टाचारलाई निमुर्ल गर्न बसेको समितिले गरेका काम आम जनताले थाहा पाउन आवश्यक रहेको भन्दै समितिले गर्ने हरेक काम सार्वजनिक गर्न निर्देशन दिएका हुन् ।

समितिका सभापति तथा सदस्यहरूले पार्टीभन्दा माथि उठेर काम गर्नुपर्ने केसीको भनाइ छ । निष्पक्ष, यथार्थ र भ्रष्टाचारविरुद्धको अभियन्ताको रूपमा समितिलाई स्थापित गर्नुपर्ने उनको भनाइ छ ।

‘सार्वजनिक लेखा समितिका सभापति वा सदस्यहरू पार्टीभन्दा माथि उठेर काम गर्नुपर्छ । समिति निष्पक्ष रूपमा यथार्थ र भ्रष्टाचारविरुद्धको अभियान्ताको रूपमा समितिलाई स्थापित गर्नु अहिलेको आवश्यकता हो,' केसीले भने ।

पछिल्लो समय नीतिगत निर्णयको नाममा सबै राजनीतिक दलहरूबीच आम सहमति गर्ने अवस्था देखिएको भन्दै अब त्यस्तो भए स्वीकार गर्न नहुने उनको भनाइ छ ।

'नीतिगत निर्णयको सन्दर्भमा नेपालको ऐन, कानुन र नियममा कहीँ उल्लेख नभएको सार्वजनिक हीतका लागि नभई नहुने निर्णय मात्रै नीतिगत निर्णय हो । नीतिगत निर्णयको नाममा सबै राजनीतिक दलहरुको नाममा आम सहमति गर्ने अवस्था देखिएको छ,' उनले भने ।

अहिले एकपछि अर्को गर्दै भ्रष्टाचारका काण्डहरू बाहिर आएको भन्दै सरकारले निष्पक्ष छानबिन गर्न सक्नुपर्ने बताए । सरकारको बेरुजुको ७५ प्रतिशत भ्रष्टाचार भएको उनको भनाइ छ । अहिले १ खर्ब १५ अर्ब ५ करोड बेरुजु रहेको भन्दै मुलुकको अर्थतन्त्र कहाली लाग्दो अवस्थामा रहेको उनले बताए ।

पार्टीका प्रमुख नेताहरू मिलेपछि जुनसुकै पनि नीतिगत निर्णय हुने अवस्थाको अन्त्य गर्न आवश्यक रहेको केसीको भनाइ छ । नीतिगत निर्णयको आडमा नै भ्रष्टाचारका धेरै काण्डहरू लुकेर बसेको उनको भनाइ छ ।

प्रकाशित मिति: मंगलबार, जेठ २, २०८० १४:४४