बेलायतले युक्रेनलाई दिँदैछ शक्तिशाली हतियार, रुसले थेग्न सक्ला युक्रेनी आक्रमण ? (भिडियो)

बेलायतले युक्रेनलाई दिँदैछ शक्तिशाली हतियार, रुसले थेग्न सक्ला युक्रेनी आक्रमण ? (भिडियो)

A+ A A-

युक्रेनका राष्ट्रपति भोलोदिमिर जेलेन्स्की जर्मनी, फ्रान्स र बेलायतको भ्रमण सकेर स्वदेश फर्किएका छन् । आइतबार र सोमबारको विदेश भ्रमण समापन हुनुपूर्व उनको अन्तिम विदेश भ्रमण बेलायतमा थियो ।

बेलायतबाट युक्रेनले संख्या र शक्ति दुवै आधारमा सबैभन्दा बढी हतियार प्राप्त गर्ने भएको छ । सोमबार बेलायत भ्रमण समापन भएसँगै उनले तीन देशको भ्रमणपछि आफू शक्तिशाली हतियारहरू लिएर घर फर्किएको प्रतिक्रिया दिएका छन् ।

रेल यात्राबाट स्वदेश फर्किएका जेलेन्स्कीले रेलबाट सम्बोधन गर्दै भनेका छन्, ‘युरोपेली सरकारहरूले हामीलाई नयाँ र झनै शक्तिशाली हतियार दिएका छन् ।’ युक्रेनले रुसविरुद्ध निर्णायक जवाफी कारबाहीको योजना बनाएको छ । राष्ट्रपति जेलेन्स्कीले गत हप्ता नाजी जर्मनीले दोस्रो विश्वयुद्धमा पराजय व्यहोरेजस्तै रुसले वर्तमान समयमा युक्रेनसँग हार व्यहोर्ने बताउँदै अब विश्वमा यो नै अन्तिम लडाइँ हुने बताएका थिए । अबको केही हप्तामै युक्रेनले रुसी सेनाहरूलाई युक्रेनी भूमिबाट लखेट्ने योजना बनाएको छ ।

(भिडियो)

युक्रेनका अनुसार उनीहरू रुसी भूमिमा गएर भने आक्रमण गर्ने छैनन् । यसरी निर्णायक जवाफी आक्रमण गर्ने बताएकै बेला जेलेन्सकी जर्मनी, फ्रान्स र बेलायत हतियार सहयोग माग्न पुगेका थिए । जर्मनीले युक्रेनलाई ३ अर्ब अमेरिकी डलरको हतियार दिने बताएको छ । अमेरिका र नेटोले लगातार युक्रेनलाई हतियार दिइरहेका छन् ।

यस्तोमा बेलायतले सोमबार युक्रेनलाई शक्तिशाली हतियार दिने वाचा गरेको छ । बेलायतले युक्रेनलाई लामो दूरीको क्षेप्यास्त्र दिने पुष्टि गरिसकेको छ । जसमा स्टोर्म स्याडो क्रुज क्षेप्यास्त्र पनि समावेश छ । यो क्षेप्यास्त्रले २५० किलोमिटरको दूरीमा पुगेर मार हान्न सक्छ । अमेरिकाले दिएको हिमार्स क्षेप्यास्त्रले भने ८० किलोमिटरको दूरीमा आक्रमण गर्न सक्थ्यो ।

बेलायतले नेटोको मापदण्डमा खतरा मानिएको प्रमुख युद्धक ट्यांक दिने वाचा गरेको छ । गत जनवरीमै बेलायतले युक्रेनलाई १४ वटा च्यालेन्जर ट्यांक दिने बताएको थियो । साथै बेलायतले ३० वटा एएस ९० सेल्फ प्रोपेल्ड तोप पनि पठाउनेछ ।

सोमबार बेलायतको प्रधानमन्त्री कार्यालयले शक्तिशाली ड्रोन हतियार दिने पनि जानकारी दिएको छ । ड्रोनबारे केही नभनिए पनि यो ड्रोनले २०० किलोमिटरभन्दा बढीको दूरी तय गर्न सक्ने बताइएको छ । सन् २०२२ मै बेलायतले युक्रेनलाई मल्टिपल लन्च रकेट सिस्टम एम २७० र एम ३१ ए १ प्रेसिजन हतियार दिने बताएको थियो । बेलायतको एक २७० हतियार प्रणाली अमेरिकाको हिमार्स क्षेप्यास्त्र प्रणालीजस्तै हो । बेलायतले युक्रेनलाई चाँडै ५ हजारभन्दा बढी अत्याधुनिक एन्टी ट्यांक हतियार पनि दिनेछ । यो हतियारले दुश्मनको ट्यांक ध्वस्त गर्न मद्दत पुग्छ ।

सोमबार बेलायती प्रधानमन्त्री ऋषि सुनक र जेलेन्स्कीबीच हतियार सहयोगबारे छलफल हुँदा बेलायतले युक्रेनका सेनालाई लडाकु विमानको प्रशिक्षण दिने पनि सहमति भएको रोयटर्सले जनाएको छ । यसरी युक्रेनले बेलायतसँगै पश्चिमा राष्ट्रहरूबाट शक्तिशाली हतियार प्राप्त गर्ने निश्चित भइसकेको छ । यस्तोमा रुसी सेनालाई युक्रेनी सेनाको जवाफी आक्रमण निकै भारी पर्न सक्ने अनुमान गरिएको छ ।

-रोयटर्स र बीबीसीको सहयोगमा

प्रकाशित मिति: मंगलबार, जेठ २, २०८० १३:१७