राजेन्द्र लिङ्देनको समीक्षा- कार्यकर्ताकै मत किनबेच भएको भ्रममा पर्दा चुनाव हार्‍यौँ

राजेन्द्र लिङ्देनको समीक्षा- कार्यकर्ताकै मत किनबेच भएको भ्रममा पर्दा चुनाव हार्‍यौँ

A+ A A-

राष्ट्रिय प्रजातन्त्र पार्टी (राप्रपा) ले गत चुनावमा नेता, कार्यकर्ताहरूकै मत खरिद बिक्री भएको भ्रमको पछाडि लाग्दा क्षति भएको विश्लेषण गरेको छ ।

अध्यक्ष राजेन्द्र लिङ्देनले केन्द्रीय कमिटीमा प्रस्तुत गरेको राजनीतिक प्रवितेदनको चुनावी समीक्षामा उक्त प्रसंग उल्लेख गरेका हुन् । उनले प्रतिवेदनमा निर्वाचनको मुखमै पार्टी पङ्क्तिमै भ्रम सिर्जना हुनु र पार्टी पङ्क्तिकै कतिपयबाट केवल तीन सिट लिएर बाँकी सम्पूर्ण सिट एमालेलाई सघाउने सहमति भएको र समानुपातिकतर्फ पनि पैसामा बिक्री गरिएको भ्रमपूर्ण समाचारले क्षति पुगेका उल्लेख गरेका छन् ।

साथै, महाधिवेशनपछि आम जनतामा राप्रपाप्रति देखिएको व्यापक सकारात्मक व्यवहार र जनलहरलाई पूर्ण रूपमा मतमा परिणत गर्न नसकिएको पनि लिङ्देनले उल्लेख गरेका छन् ।

चुनावी हारका कारणहरू उल्लेख गर्ने क्रममा लिङ्देनले भनेका छन्, ‘तल्लो तहमा धेरै ठाउँमा संगठन संरचना नै नहुनु, भएको पनि नक्कली र कमजोर हुनु । त्यसमाथि पनि निर्वाचनको मुखमै पार्टी पङ्क्तिमै भ्रम सिर्जना हुनु र पार्टी पङ्क्तिकै कतिपयबाट केवल तीन सिट लिएर बाँकी सम्पूर्ण सिट एमालेलाई सघाउने सहमति भएको र समानुपातिकतर्फ पनि पैसामा बिक्री गरिएको, आफ्ना निकट मानिसहरूलाई मात्रै समानुपातिक सूचीमा राखिएको जस्ता भ्रम संगठित रूपमा बाँडिने कार्यले प्रत्यक्षतर्फ काठमाडौं क्षेत्र नं १ लगायतका क्षेत्रहरू र खास गरेर समानुपातिक तर्फको मतमा अपूरणीय क्षति पुगेको छ ।’

त्यस्तै, पार्टीको जिम्मेवारीमा बस्ने निर्वाचनमा उम्मेदवार नबन्ने, नबनाउने, नसघाउने र नकारात्मक कुरा मात्रै गरेर हिँड्ने अनि विभिन्न तरिकाले संरक्षित हुने, बिगत लामो समय देखिको अनुशासनहीनता र आत्मकेन्द्रित गलत संस्कृति पनि हारको कारण बताएका छन् ।

उनले भनेका छन्, ‘कुनै पनि सफल राजनीतिक दलका लागि व्यक्तिकेन्द्रित होइन अनुशासित नेता कार्यकर्ताको पङ्क्ति महत्त्वपूर्ण हुन्छ । आगामी दिनमा विगतबाट शिक्षा लिएर अगाडि बढ्नु हाम्रा लागि अनिवार्य छ । राप्रपालाई कुनै पनि बहानामा असफल हुने छुट र सुविधा छैन ।’

प्रकाशित मिति: सोमबार, जेठ १, २०८० १६:३५