रुस-युक्रेन युद्ध रोक्ने चिनियाँ योजनाअनुसार युक्रेन पुगे ली हुई, युरोप पनि जानेछन् (भिडियो)

रुस-युक्रेन युद्ध रोक्ने चिनियाँ योजनाअनुसार युक्रेन पुगे ली हुई, युरोप पनि जानेछन् (भिडियो)

A+ A A-

रुस र युक्रेनबीच जारी एक वर्षे युद्धलाई अन्त्य गराउन चीनले गत फेब्रुअरीदेखि पहलकदमी चालिरहेको छ ।

फेब्रुअरीमा चीनले १२बुँदे शान्ति योजना सार्वजनिक गर्दै रुस र युक्रेनबीच छलफलबाटै युद्ध अन्त्य हुनुपर्ने बताएको थियो । गत मार्च २० देखि २२ सम्म चिनियाँ राष्ट्रपति सी चिनफिङले रुसको भ्रमण गरेरै रुसी सकमक्षी भ्लादिमिर पुटिनसँग युद्ध छलफलबाट अन्त्य गर्न आह्वान गरेका थिए ।

यतिबेला चीनले युद्ध अन्त्यका लागि छलफलको वातावरण बनाउन आफ्ना विशेष दूतलाई युक्रेन पठाएको छ । सन् २०१९ यता चीनका लागि युरोप-एसिया मामिलाका प्रतिनिधि तथा रुसका लागि पूर्वराजदूत ली हुईलाई चीनले युक्रेनमा पठाएको चिनियाँ विदेश मन्त्रालयले जनाएको छ ।

(भिडियो)

ली प्रस्टसँग रुसी भाषा बोल्न सक्छन् । उनले यस्तो बेलामा युक्रेनको भ्रमण गरिरहेका छन् जतिबेला युक्रेन रुसविरुद्ध जवाफी कारबाही गर्न पूरै तयार भइसकेको छ । युक्रेनका राष्ट्रपति भोलोदिमिर जेलेन्सी यतिबेला हतियार सहयोग माग्न विदेश भ्रमणमा छन् । आइतबार र आज सोमबार मात्र उनी जर्मनी, फ्रान्स र बेलायत पुगिसकेका छन् ।

चिनियाँ मन्त्रालयका प्रवक्ता वाङ वेनबिनका अनुसार ली हुईले युक्रेनपछि रुस, पोल्यान्ड, फ्रान्स र जर्मनीको पनि भ्रमण गर्नेछन् । चीनले रुस-युक्रेन युद्धमा कसैको पक्ष लिएको छैन । तर, रुससँग आफ्नो अद्वितीय सम्बन्ध भएको बताउँछ ।

चीनले अमेरिका र पश्चिमा राष्ट्रका कारण युद्ध चर्किँदै गएको आरोप लगाउने गरेको छ । चीनले लीको भ्रमणलाई ‘युक्रेन संकटको राजनीतिक समाधानका लागि विभिन्न पक्षसँग परिणाममुखी सञ्चारका लागि’ भएको बताएको छ ।