लोकतन्त्रको आवरणमा मुलुकमा नवसामन्तवाद र सर्वसत्तावाद हावी छः राजेन्द्र लिङ्देन

लोकतन्त्रको आवरणमा मुलुकमा नवसामन्तवाद र सर्वसत्तावाद हावी छः राजेन्द्र लिङ्देन

A+ A A-

राष्ट्रिय प्रजातन्त्र पार्टीले प्रमुख राजनीतिक दलहरूको सत्ताकेन्द्रित क्रियाकलापका कारण मुलुक गम्भीर संकटतर्फ उन्मुख भएको बताएको छ ।

सोमबारबाट राप्रपा केन्द्रीय कार्यालयमा सुरु केन्द्रीय समितिको बैठकमा राजनीतिक प्रतिवेदन प्रस्तुत गर्दै अध्यक्ष राजेन्द्रप्रसाद लिङ्देनले भने, ‘प्रमुख राजनीतिक दलहरूको सत्ताकेन्द्रित क्रियाकलापका कारण मुलुक गम्भीर संकटतर्फ उन्मुख छ ।'

मुलुकका तीन प्रमुख अंगहरूबीच रहनुपर्ने शक्ति नियन्त्रण र सन्तुलनको व्यवस्था ध्वस्त भएको लिङ्देनको भनाइ छ । 'मुलुकका तीन प्रमुख अंगहरूका बीच रहनुपर्ने शक्ति नियन्त्रण र सन्तुलनको व्यवस्था ध्वस्त भएको छ,' उनले भने ।

कमजोर अर्थतन्त्र, बढ्दो युवा बेरोजगारी, राज्यका सबै अंगमा भ्रष्टाचार र भ्रष्टाचारमा प्रायः सबै प्रमुख राजनीतिक दलहरूको संलग्नता, वैदेशिक नीतिमा आएको असन्तुलन सामान्य अवस्था नरहेको उनले जनाए ।

वैदेशिक सम्बन्धलाई सत्ता आरोहणको रूपमा प्रयोग गर्ने आलोकाँचो व्यवहारका कारण नेपालको वैदेशिक सम्बन्ध पूर्ण रूपमा खलबलिन पुगेको लिङ्देनको भनाइ छ ।

'वैदेशिक सम्बन्धलाई सत्ता आरोहणको रूपमा प्रयोग गर्ने आलोकाँचो व्यवहारका कारण हाम्रो वैदेशिक सम्बन्ध पूर्ण रूपमा खल्बलिन पुगेको छ । नेपाल शक्ति राष्ट्रहरूको रणनीतिक स्थलमा परिणत भएको छ । सत्ता पक्ष र प्रमुख राजनीतिक दलका क्रियाकलापका कारण हुने नोक्सानीको मूल्य केवल राजनीतिक दल र नेताले मात्रै चुकाउनु पर्दैन, सिंगो देशले चुकाउनुपर्छ,’ उनले भने ।

आफूलाई अग्रगमनका संवाहक, लोकतन्त्रको पर्याय ठान्ने केही राजनीतिक दलका कारण देश संकटको भूमरीमा फसिरहेको लिङ्देनको टिप्पणी छ । नेपालको राष्ट्रियता, राष्ट्रिय एकता अखण्डता, सार्वभौमिकता संकटग्रस्त बनेको उनको भनाइ छ ।

‘कहिले पराधिन नभएको देशमा बाह्य शक्तिको चलखेल र प्रभाव तीव्र रूपले बढेर गएको छ । भ्रष्टाचारको चंगुलमा देश फसेको छ । लोकतन्त्रको आवरणमा नव सामन्तवाद र सर्वसत्तावाद हाबी छ,' उनले भने ।

'पहिलोपटक नेपालका राजनीतिक दलले आफ्नै बलमा सरकार निर्माण गर्न सक्छन् भन्ने सन्देश प्रवाह गर्नु सकारात्मक हो । तर, सरकारको नेतृत्त्व गरेका प्रधानमन्त्री स्वयं पुरानै अवस्थामा फर्किएर गोलचक्करमा परेपछि हामीले तत्त्काल सहकार्य छोडेका थियौँ,’ उनले भने ।

प्रकाशित मिति: सोमबार, जेठ १, २०८० १५:४६