एमालेको आरोप- प्रधानमन्त्री प्रचण्डलाई दबाबमा राख्न पूर्वराजा ज्ञानेन्द्रलाई भारतमा स्वागत गरियो

एमालेको आरोप- प्रधानमन्त्री प्रचण्डलाई दबाबमा राख्न पूर्वराजा ज्ञानेन्द्रलाई भारतमा स्वागत गरियो

A+ A A-

प्रमुख प्रतिपक्षी दल नेकपा एमालेले प्रधानमन्त्री पुष्पकमल दाहाल प्रचण्डलाई दबाबमा राखिराख्न भारतले पूर्वराजा ज्ञानेन्द्र शाहलाई भारतमा स्वागत गरिएको आरोप लगाएको छ ।

सोमबार प्रतिनिधिसभा बैठकमा विशेष समय लिएर बोल्दै एमाले सांसद रघुजी पन्तले प्रधानमन्त्री प्रचण्डको भ्रमणलाई पर्खाएर पूर्वराजा ज्ञानेन्द्रलाई भारतमा बोलाएर स्वागत गरिएको बताएका हुन् ।

‘प्रधानमन्त्री प्रचण्ड भारत भ्रमणमा जान्छु–जान्छु भन्नुहुन्छ । तर, प्रधानमन्त्रीको भारत भ्रमण सरेको सर्‍यै छ । कहिले हुनेको हो थाहा छैन,’ उनले भने, ‘प्रधानमन्त्रीलाई भारत भ्रमणमा आउन नदिएर पर्खाइराख्दा पूर्वराजा शाहलाई उत्तर प्रदेशमा स्वागत गरियो ।’

सांसद पन्तले पूर्वराजा शाहलाई स्वागत गर्ने क्रममा उत्तर प्रदेशका मुख्यमन्त्री र मन्त्रीहरुले बोलेका कुरा आपत्तिजनक भएको बताए । उनले भारतमा नेपालको प्रधानमन्त्रीलाई आउन नदिने तर नेपाली जनताले हटाएको राजालाई प्रधानमन्त्रीको सट्टा स्वागत गरेर दबाबको कूटनीति कायम राखेको बताए ।

‘हाम्रो के एजेन्डा पूरा गर्छौं । के एजेन्डा तिमीले बोकेर यहाँ (भारत) आउँछौँ । मेरो एजेन्डा कार्यसूचीमा पर्छ कि पर्दैन ? अनि मात्रै तिमीलाई भारतमा स्वागत गर्छु भनेर दबाब दिन पूर्वराजा शाहलाई भारतमा बोलाइयो र स्वागत गरियो,’ उनले भने ।

सांसद पन्तले दबाबको कूटनीतिमा प्रधानमन्त्री प्रचण्ड पर्न नहुने बताए । ‘प्रधानमन्त्रीलाई आग्रह छ– यो प्रेसर डिप्लोमेसीमा नेपालको सरकार पर्नु हुँदैन । नेपालको प्रधानमन्त्री पर्नु हुँदैन । स्वतन्त्र देशको प्रधानमन्त्री भारत भ्रमणमा जाँदा देशका एजेन्डाहरु के हुन्, नेपाललाई चाहिएको कुरा के हो ? त्यो कुरा हामीले प्रष्टसँग राख्नुपर्छ,’ उनले भने ।

सांसद पन्तले प्रधानमन्त्री प्रचण्डको भ्रमणमा लिपुलेक, लिम्पियाधुरा र कालापानीलाई फिर्ता ल्याउने, सीमाको सुरक्षा, राष्ट्रिय स्वाभिमानलाई ध्यानमा राखेर छलफल हुनुपर्ने बताए । उनले नेपालको परराष्ट्र नीति असन्तुलित हुन थालेको बताए । उनले भने, ‘हाम्रो परराष्ट नीति असन्तुलित छ । कहिले यता कहिले उता ढल्किन थालेको छ ।’

प्रकाशित मिति: सोमबार, जेठ १, २०८० १५:२३