हतियार जुटाउन जेलेन्स्की विदेश भ्रमणमा, २४ घण्टामै पुगे जर्मनी, फ्रान्स र बेलायत (भिडियो)

हतियार जुटाउन जेलेन्स्की विदेश भ्रमणमा, २४ घण्टामै पुगे जर्मनी, फ्रान्स र बेलायत (भिडियो)

A+ A A-

पछिल्लो २४ घण्टाको अवधिमा युक्रेनका राष्ट्रपति भोलोदिमिर जेलेन्स्की तीन राष्ट्र भ्रमणका लागि पुगेका छन् ।

आइतबार सुरुवातमा जर्मनी पुगेका जेलेन्स्की त्यसपछि नै उनी फ्रान्स पुगेका थिए । सोमबार भने उनी बेलायत पुगेका छन् । रुससँग १५ महिनायता युद्ध जारी रहँदा जेलेन्स्कीले हतियार सहयोगको अपिल गर्न लगातार विदेश भ्रमण गरिरहेका हुन् ।

जर्मनीले युक्रेनलाई शनिबार मात्र ३ अर्ब अमेरिकी डलरबराबरको ट्यांक, लडाकु विमानविरुद्धका हतियार प्रणाली, गोलाबारुद प्रदान गर्ने प्रतिबद्धता जनाएको थियो । राजधानी बर्लिनमा युक्रेनी राष्ट्रपति भोलोदिमिर जेलेन्स्कीको भ्रमणअगाडि नै जर्मनीले युक्रेनलाई हतियार सहयोग गर्ने घोषणा गरेको थियो ।

भिडियो

आइतबार जेलेन्स्की जर्मनी पुग्दा उनलाई जर्मन चान्सलर ओलाफ स्कोल्जले भनेका थिए, ‘जबसम्म युक्रेनलाई मद्दत चाहिन्छ, तबसम्म हामी युक्रेनलाई सहयोग गर्नेछौँ ।’ पछिल्ला दिनहरूमा रुसले युक्रेनको बाख्मुत शहर कब्जा गर्न खोजिरहेको छ । तर, पश्चिमा राष्ट्रबाट हतियार पाइरहेको युक्रेनले यो शहरबाट रुसी सेनालाई आफूहरूले कडा प्रतिकार गर्दा उनीहरू भाग्ने स्थिति आइसकेको युक्रेनी सेनाको दाबी छ ।

रुसले आफ्ना देशका तेल ट्यांकहरूमा युक्रेनले ड्रोन हमला गरेको आरोप लगाइरहेको छ । युक्रेनले रुसी राष्ट्रपतिको कार्यालय क्रेमलिन प्यालेसमै ड्रोन आक्रमण गरेको रुसी आरोप छ । जेलेन्स्कीले जर्मनीमा यस विषयमा भनेका छन्, ‘युक्रेनले रुसी भूमिमा आक्रमण गरेको छैन । हामीले मात्र जवाफी कारबाही गरेका छौँ र निर्णायक जवाफी कारबाहीको तयारी गरिरहेका छौँ । हामी रुसले गैरकानुनी रूपमा कब्जा गरेको भूभाग फिर्ता गर्न दृढ छौँ ।’

जेलेन्स्कीले फ्रान्स भ्रमणका क्रममा सो राष्टसँग पनि हतियार सहयोग गर्न आग्रह गरेका थिए । युक्रेनको राष्ट्रपति कार्यालयका अनुसार फ्रान्सले हतियारहरू सहयोग गर्ने वाचा गरे पनि कस्ता र कति मात्रामा हतियार दिने भनेर खुलाएको छैन । शनिबार राति एलसी प्यालेसमा जेलेन्स्की र फ्रान्सेली समकक्षी इम्यानुअल म्याक्रोबीच छलफल भएको थियो । दुवै राष्ट्रले संयुक्त विज्ञप्ति जारी गर्दै आगामी दिनमा फ्रान्सले युक्रेनका सेनालाई युद्ध अभ्यासको प्रशिक्षण दिने विषय उल्लेख गरेका छन् ।

यसैबीच, सोमबार जेलेन्स्की बेलायत पुगिसकेका छन् । उनले बेलायतमा त्यहाँका प्रधानमन्त्री ऋषि सुनकसँग भेट्ने तालिका छ । गत मार्च महिनामा मात्र बेलायतले ५२० मिलियन पाउन्डको हतियार सहयोग गर्ने जनाएको थियो । बेलायतबाट हारपुन एन्टी–सिप मिसाइल प्रणाली युक्रेनले प्राप्त गरेपछि रुसले बेलायतको चर्को आलोचना पनि गरेको थियो ।

पछिल्ला दिनहरूमा रुस र युक्रेनबीचको युद्धलाई रुस र पश्चिमा राष्ट्रको युद्ध पनि भने गरिएको छ । किनभने युक्रेनलाई पश्चिमा राष्ट्रहरूले घोषित रूपमै हतियार दिइरहेका छन् । उत्तर एट्लान्टिक सन्धि संगठन नेटोले केही समयअगाडि मात्र युक्रेनलाई हालसम्म १ हजार ५ सय ५० वटा बख्तरबन्द गाडी र २ सय ३० वटा ट्याङ्क प्रदान गरेको जनाएको थियो ।

नेटोका प्रमुख जेन्स स्टोल्टेनबर्गले युक्रेनका सेनालाई रुसविरुद्धको युद्धमा प्रशिक्षण दिन जारी राख्ने पनि बताएका छन् ।

-रोयटर्स र बीबीसीको सहयोगमा

प्रकाशित मिति: सोमबार, जेठ १, २०८० १४:१८