गिरफ्तारीबारे इमरान खान भन्छन्- सेनाको आदेशमा मलाई अपहरण गरियो

A+ A A-

पाकिस्तानका पूर्वप्रधानमन्त्री इमरान खानका अनुसार वर्तमान सरकारलाई चुनावदेखि डर लागिरहेको छ । चुनावमा नराम्रो हार व्यहोर्ने त्रासपछि आफूमाथि चौतर्फी घेराबन्दी भइरहेको उनको आरोप छ ।

हिरासतबाट मुक्त भएपछि स्काई न्यूजसँगको अन्तर्वार्तामा पाकिस्तान तेहरिक–ए–इन्साफ पार्टीका अध्यक्ष खानले भनेका छन्, ‘वर्तमान सरकारलाई यो लाग्छ कि म जेलमा भएको खण्डमा र मारिएको खण्डमा मात्र उनीहरूले चुनाव जित्नेछन् ।’

इस्लामावादको उच्च अदालतले अल-कादिर ट्रस्टको मामिलामा गिरफ्तार भएका पाकिस्तानका पूर्वप्रधानमन्त्री इमरान खानलाई गत शुक्रबार नै जमानतमा छाड्न आदेश दिएको थियो । अदालतले १७ मेसम्म कुनै पनि विषयमा खानलाई गिरफ्तार गर्न नपाइने निर्णय सुनाएको छ ।

स्काई न्यूजसँगको अन्तर्वार्तामा उनले आफूलाई सेना प्रमुख असिम मुनिरको आदेशमा गिरफ्तार गरिएको पनि दाबी गरेका छन् । उनले यस विषयमा भनेका छन्, ‘गिरफ्तारीपछि जब म जेलभित्र थिए, तबमात्र मलाई पक्राउ पुर्जी थमाइयो । जंगली कानुनमा यस्तो हुन्छ । सेनाले मेरो अपहरण गरे । प्रहरी कहाँ छन् ?’

पूर्वप्रधानमन्त्रीलाई आतंकवादी जसरी गिरफ्तार गरिनु यो विश्वमा कहीँ नभएको र पाकिस्तानको लोकतन्त्र खतरामा रहेको उनको भनाइ छ । उनले अब न्यायालयमा मात्र विश्वास अडिएको उल्लेख गरे । गत वर्षको नोभेम्बर महिनामा इमरान खानको खुट्टामा गोली प्रहार भएको थियो । पञ्जाब प्रान्तमा आफूमाथि गोली प्रहार भएपछि खानले आफूमाथिको हत्या योजनामा उच्च सैन्य अधिकारीको हात भएको बताउँदै आएका छन् ।

किन पक्राउ परेका थिए खान ?

पाकिस्तानको भ्रष्टाचारविरुद्धको संस्था राष्ट्रिय उत्तरदायित्व ब्युरो न्याबका अनुसार खानलाई अल कादिर ट्रस्ट मामिलामा गिरफ्तार गरिएको थियो ।

पाकिस्तानका पूर्वप्रधानमन्त्री इमरान खानले अल कादिर विश्वविद्यालय परियोजनाका लागि २६ डिसेम्बर २०१९ मा अल कादिर ट्रस्ट दर्ता गरेका थिए । खान र उनकी पत्नी बुशरा बीबीमाथि रियलस्टेट कम्पनीको ५० अर्ब रुपैयाँ कालो धनलाई वैधानिकता दिएको आरोप लागेको छ । त्यसको बदलामा उनीहरूले अल कादिर ट्रस्टका लागि अर्बौं पर्ने जमिन दानमा प्राप्त गरेको बताइएको छ ।

न्याबका अनुसार कालो धनलाई वैध बनाउन लागिपरेका कारण र अवैध कार्यबाट जग्गा दान पाएका कारण खानमाथि अनुसन्धान हुनु स्वाभाविक हो र भ्रष्टाचार अभियोग लागेका उनी गिरफ्तार हुनु पनि स्वाभाविक हो ।

प्रकाशित मिति: आइतबार, वैशाख ३१, २०८० १८:१३