आर्थिक वर्ष सकिनैलाग्दा पनि मधेश सरकारले स्थानीय तहलाई बजेट पठाएन

A+ A A-

चालु आर्थिक वर्ष सकिँन अब ९ हप्तामात्र बाँकी रहँदा मधेश प्रदेश सरकारले स्थानीय तहलाई सशर्त, समपूरक र विशेष अनुदानको बजेट अझै पठाउन सकेको छैन । मधेश प्रदेशमा एक महानगरपालिका, तीन उपमहानगरपालिकासहित एक सय ३६ पालिका रहेका छन् ।

सरकारी वित्तीय हस्तान्तरण अनुसार प्रदेश सरकारले प्रदेशका सबै पालिकाहरूलाई प्रत्येक आर्थिक वर्षमा सशर्त, समपूरक र विशेष अनुदान उपलब्ध गराउनुपर्ने प्रावधान छ । तर चालु आर्थिक वर्षको झन्डै १० महिना समाप्त हुन लाग्दा पनि प्रदेश सरकारले अहिले सम्म पालिकाहरूलाई उक्त शीर्षकहरूको बजेट नपठाएकाे हाे ।

चालु आर्थिक वर्षमा समपूरक बजेट २ अर्ब ६ करोड, सशर्त ३ करोड ३५ लाख र विशेष अनुदानका लागि ४२ करोड ८५ लाख गरी तीनै शीर्षकमा ३ अर्ब ६ करोड २० लाख रकम विनियोजन गरेको छ ।

प्रदेश सरकारले प्रदेशकाे एक मात्र महानगरपालिकाको लागि विशेष अनुदानको १ करोड र समपूरक ४७ लाख ९५ हजार विनियोजन गरेको छ । त्यसैगरी, तीनवटा उपमहानगरपालिका जनकपुरधाम, कलैया र सिमराका लागि ७५ लाखको दरले विशेष अनुदान र समपूरकतर्फ १ करोड ४९ लाख रकम विनियोजन गरेको छ ।

त्यसैगरी, नगरपालिकाहरूलाई विशेष अनुदान दिन २१ करोड ९० लाख र गाउँपालिकाको लागि १७ करोड ७० लाख बजेट विनियोजन गरेको छ । गाउँपालिका र नगरपालिकाको लागि सशर्त तर्फ ३ करोड ३५ लाख रकम विनियोजन गरिएको छ भने समपूरकतर्फ नगरपालिकाको लागि १ अर्ब १५ करोड ८६ लाख ८४ हजार र गाउँपालिकाको लागि ७४ करोड ४४ लाख ४१ हजार रकम विनियोजन गरिएको अर्थ मन्त्रालयको सरकारी वित्तीय हस्तान्तरण २०७९/०८० को तथ्याङ्कमा उल्लेख छ ।

याे बजेट प्रदेश सरकारले नपठाएको खण्डमा प्रदेशको ग्रेड घट्ने र अगामी वर्षका लागि सङ्घीय सरकारले दिने बजेटमा कटौती गर्ने प्रावधान रहेको छ ।

चुनावका कारण बजेट पठाउन ढिलाइ

प्रदेशकाे अर्थ मन्त्रालयले नयाँ सरकार गठन र मङ्सिर तथा वैशाखको उपचुनावका कारण जारी आचारसंहितका कारण समयमै बजेट पठाउन नसकेको जनाएको छ । र्थ मन्त्रालयका सचिव प्रेमप्रसाद भट्टराईले अब केही दिनमै बजेट पठाउने तयारी भइरहेको बताए । बजेट पठाउने तयारी अन्तिम चरणमा रहेकाे उनले बताए ।

स्थानीय तहहरूले प्रदेश सरकारले पठाउने बजेट वैशाखभित्र नआए कार्यान्वयन हुन नसक्ने जनाएको छन् । वीरगञ्ज महानगरपालिकाका मेयर राजेशमान सिंहले वैशाखभित्र बजेट नआए कार्यान्वयन गर्न नसकिने बताए ।

‘काम गर्ने बेला बजेट दिएन भने पछि लिएर के हुन्छ', उनले भने । जनकपुरधामका प्रमुख प्रशासकीय अधिकृत रत्नेश शशीले पनि प्रदेश सरकारले विशेष अनुदानसहितको बजेट पठाउन अति ढिलाइ गरेको बताए ।

प्रकाशित मिति: बिहीबार, वैशाख २८, २०८० ०८:३४