गाउँपालिका र सप्लायर्सबीचको टकरावले चंखेली गाउँपालिकाका विद्यार्थीका हात रित्तै

गाउँपालिका र सप्लायर्सबीचको टकरावले चंखेली गाउँपालिकाका विद्यार्थीका हात रित्तै

A+ A A-

बर्सेनि शैक्षिकसत्र सञ्चालन भएको लामो समयसम्म पनि पाठ्यपुस्तक नपुग्ने कर्णालीमा यसपटक समयमै पुगेको भए पनि हुम्लाको चंखेली गाउँपालिकाका विद्यार्थीले हालसम्म पनि किताब पाएका छैनन् । पालिकाअन्तर्गत रहेका कुल २२ वटा विद्यालयमा अध्ययनरत करिब १ हजार ९ सय ८० जना विद्यार्थीको हातमा पाठ्यपुस्तक पुगेको छैन ।

गाउँपालिकामा किताब नपुगेको भने होइन, पालिकाभरका विद्यालयका लागि ज्ञानु बुक्स एण्ड स्टेसनरीले गत चैत २७ गते नै पाठ्यपुस्तक चंखेलीमा पुर्‍याएको थियो । २०८० को शैक्षिकसत्र सुरु भएको एक महिना बित्न लाग्दासमेत विद्यार्थीलाई हालसम्म पाठ्यपुस्तक वितरण नभएको हो । चंखेलीका लागि पुगेका पाठ्यपुस्तकहरू अहिले गोदाममै थन्किएका छन् ।

जिल्लामा सातवटा पालिका छन् । चंखेलीबाहेकका अन्य पालिकाका प्रायः विद्यालयमा पाठ्यपुस्तक पुगिसकेको छ । तर, चंखेलीमा भने पालिकाले नै ठेकेदारसँग किताब खरिद नगर्न विद्यालयहरूलाई निर्देशन दिएपछि विद्यार्थीहरू पाठ्यपुस्तकबाट वञ्चित भएका हुन् । ज्ञानु बुक्स एण्ड स्टेसनरीका सञ्चालक मानदेव शाहीले भने, ‘हामीसँग किताब खरिद नगर्न पालिकाका अध्यक्षले विद्यालयलाई भनेपछि उनीहरूले किताब खरिद नगरेका हुन् ।’

विद्यालयलाई किताब खरिदका लागि खबर गर्दा पालिकाका अध्यक्ष प्यारीलाल शाही आफैँले किताब ल्याउने र ठेकेदारले ल्याएको किताब नबुझ्न भनेको बारे आफूले जानकारी पाएको उनले बताए । यस विषयमा पालिकाका कर्मचारीलाई समेत बुझ्दा ‘अध्यक्षको निर्देशन छ, कसरी हामीले विद्यालयलाई पठाउने’ भनेर जवाफ दिएको उनले बताए । राज्यले नै पठाएको किताब आफूले र पालिकाका अध्यक्ष दुवैले ल्याउँदा फरक नपर्ने उनको भनाइ छ । कक्षा सञ्चालन हुँदासमेत विद्यार्थीले किताब नपाउँदा उनले पालिका शिक्षाक्षेत्रमा गैरजिम्मेवार बनेको आरोप लगाए ।

पालिकाका अध्यक्षले विद्यालयले उनीबाट किताब खरिद गरेको अवस्थामा राहत, अनुदानलगायतका बजेट विनियोजन नगर्ने धम्कीसमेत दिएको उनको आरोप छ । त्यसैले विद्यालयले हालसम्म पनि ठेकेदारबाट किताब लिएका छैनन् । पालिकामा अहिले पनि पाठ्यपुस्तकविहीन अवस्थामा अध्यापन भइरहेको छ ।

चंखेली गाउँपालिकामा दुई–दुईवटा माध्यमिक तथा आधारभूत विद्यालय र १८ वटा प्राथमिक विद्यालय गरी कुल २० वटा सामुदायिक विद्यालय छन् । पालिकाले तोकेको मान्छेले ल्याएको किताब मात्र आधिकारिक हुने बताउँदै गाउँपालिकाले आफूमाथि दम्भ प्रदर्शन गरेको उनको आरोप छ । शाहीले २०६६ सालदेखि हुम्लाको चंखेली गाउँपालिका र सर्केगाड गाउँपालिकामा पाठ्यपुस्तक पुर्‍याउँदै आएका थिए । पालिकाका अध्यक्षले अख्तियार दुरुपयोग गर्दै जनक शिक्षा सामग्रीमार्फत पुनः किताब मगाएको समेत उनले जनाए । यस अवस्थाले पाठ्यपुस्तकमा ‘डुप्लिकेसन’ भएको र पाठ्यपुस्तकको सवालमा हस्तक्षेप गरेको उनको आरोप छ ।

जिल्लाका सामुदायिक विद्यालयमा पाठ्यपुस्तक वितरकहरूमा ताँजाकोट र अदानचुली गाउँपालिकामा यसअघिका वर्षहरूमा लोकेन्द्र भण्डारीले पाठ्यपुस्तक पुर्‍याउँदै आएका छन् ।

यसैगरी, नाम्खा गाउँपालिका, सिमकोट गाउँपालिका र खार्पुनाथ गाउँपालिकाका क्षेत्रमा ज्ञानबहादुर रोकायले पाठ्यपुस्तक वितरण गर्ने गर्छन् । चंखेली गाउँपालिकाका लागि पाठ्यपुस्तक हुम्ला पुर्‍याएका मानदेव शाहीले भने यसअघिदेखि नै चंखेलीसहित सर्केगाड गाउँपालिकामा समेत पाठ्यपुस्तक वितरण गर्दै आएका थिए ।

यता किताब सप्लायर्सले पालिकासँग किताब खरिद गर्ने विषयमा समन्वय नै नगरेको चंखेली गाउँपालिकाका शिक्षा तथा खेलकुद शाखा प्रमुख पर्शुराम पाण्डे बताउँछन् । उनले भने, ‘पालिका अध्यक्ष आफैँ किताब लिन पुग्नुभएको छ । ठेकेदारले भने उता किताब माग गरिसकेपछि आफूले पनि किताब ल्याएको बताएका थिए ।’

ठेकेदारले किताब ल्याउनुपूर्व वा पालिका नै जनक शिक्षा सामग्री केन्द्रमा पुग्नुपूर्व नै जानकारी दिएको भए यो अवस्था सिर्जना नहुने उनको भनाइ छ । उनले भने, ‘अबको दुई दिनमा किताब जनक शिक्षाबाट यता ढुवानी हुने खबर आएको छ । सुरुको समयमा समन्वय नै नगरी अन्तिममा ठेकेदारले किताब ल्याएको बताएपछि कसरी हुन्छ ?’

यस्तै, पालिका अध्यक्षले एकलौटी गर्न खोजेको चंखेली गाउँपालिका– ४ का वडाध्यक्ष पदम शाही बताउँछन् । ‘योभन्दा पहिले उही वितरकबाट पालिकामा पाठ्यपुस्तक पुग्थ्यो । अहिले कुरो नमिल्ने हुन्छ ? मेरा वडामा भएका विद्यालयले पालिका अध्यक्षले किताब नलिनु भनेर नलिएको भनेका छन्,’ शाहीले भने, ‘भर्ना अभियान सकिएको भोलिपल्ट विद्यार्थीको हातमा किताब पुग्नुपर्थ्यो । अहिलेसम्म पनि किताब पुर्‍याउन सकिएको छैन ।’

पालिकाले आफैँ पाठ्यपुस्तक खरिद गर्ने भए कार्यपालिकाबाट यसअघि नै निर्णय गराउनुपर्थ्यो, तर यस विषयमा भने आफूहरू बेखबर रहेको शाहीले बताए । पालिकाका अध्यक्ष र ठेकेदारबीचको सम्बन्धका कारण विद्यार्थीले पाठ्यपुस्तक नपाएको उनको आशय छ ।

प्रकाशित मिति: बिहीबार, वैशाख २८, २०८० ११:३९