विश्वकप छनोट खेल्ने १० देशको टुंगो, नेपालसँगै विश्वविजेता श्रीलंकादेखि वेष्ट इन्डिजसम्म

A+ A A-

आगामी जुन र जुलाईमा जिम्बाब्वेमा हुने विश्वकप छनोट खेल्ने १० देशको टुंगो लागेको छ । आईसीसी क्रिकेट विश्वकप सुपर लिगअन्तर्गत बंगलादेश र आयरल्यान्डबीचको पहिलो ओडीआई खेल वर्षाको कारण रद्द भएपछि आयरल्यान्ड विश्वकप छनोटमा झरेको हो ।

आयरल्यान्ड घटुवा भएसँगै विश्वकप छनोट खेल्ने १० टिमको टुंगो लागेको हो । विश्वकप छनोटमा आयोजक राष्ट्र जिम्बाब्वेसँगै नेपाल, दुई विश्वविजेता वेष्ट इन्डिज र श्रीलंका छन् । त्यस्तै, आयरल्यान्ड, नेदरल्यान्ड्स, यूएई, स्कटल्यान्ड, ओमान र अमेरिका छन् ।

जिम्बाब्वेमा आउँदो असार ३ देखि २४ गतेसम्म आयोजना हुँदैछ । आईसीसीले विश्वकप छनोटको खेल तालिका भने सार्वजनिक गरिसकेको छैन । अगामी असोज १८ देखि मंसिर ३ गतेसम्म भारतमा विश्वकप क्रिकेट आयोजना हुँदैछ । विश्वकप छनोटबाट विजेता र उपविजेताले विश्वकप छनोटमा स्थान बनाउने छन् ।

यसरी सम्भव भएको थियो नेपालको विश्वकप छनोट यात्रा

नेपालले आईसीसी क्रिकेट विश्वकप लिग-२ का अन्तिम तीन सिरिजमा अविश्वसनीय नतिजा निकाल्दै विश्वकप छनोटमा स्थान बनाएको हो । विश्वकप यात्रामा नेपाली क्रिकेटले उत्कृष्ट प्रदर्शन गर्‍याे । अन्तिम १२ खेलमध्ये ११ खेलमा जित निकाल्नु नेपाली टिमको लागि अहिलेसम्मकै सबैभन्दा ठूलो सफलता हो ।

कीर्तिपुरमा भएको लिग-२ को त्रिदेशीय सिरिजमा नामिबिया र स्कटल्यान्डविरुद्ध चारै खेलमा जित निकालेको नेपालले दुवईमा यूएईसँग एक खेलमा हार र एक खेलमा जित निकाल्दा पपुवा न्युगिनीविरुद्ध दुवै खेलमा जित निकाल्यो । यसपछि कीर्तिपुरमै भएको लिग-२ को अन्तिम सिरिजमा यूएई र पपुवा न्युगिनीलाई हराउँदै नेपालले एकदिवसीय मान्यता कायम राख्दै विश्वकप छनोटमा पुगेको थियो ।

लिग-२ बाट स्कटल्यान्ड च्याम्पियन हुँदा ओमान दोस्रो र नेपाल तेस्रो हुँदै विश्वकप छनोटमा पुगेका हुन् । यता, प्लेअफबाट यूएई च्याम्पियन र अमेरिका उपविजेता हुँदै विश्वकप छनोटमा पुग्न सफल भयो । श्रीलंका, वेष्ट इन्डिज, जिम्बाब्वे, नेदरल्यान्ड्स र आयरल्यान्ड सुपर लिगको शीर्ष आठमा पर्न नसकेपछि विश्वकप छनोटमा झरेको हो ।

त्यसो त नेपाली टिम पछिल्लो समय उत्कृष्ट लयमा छ । पछिल्लो आठ ओडीआई खेलमा नेपाल अपराजित रहेको छ । पछिल्लो करिब दुई महिनामा नेपाली क्रिकेटले तीन ठूला उपलब्धि पाएको छ । एकदिवसीय अन्तर्राष्ट्रिय मान्यतालाई कायमै राख्नु, विश्वकप छनोटमा सिधैँ पुग्नु र एसीसी प्रिमियर कप च्याम्पियन हुँदै एसिया कपमा पुग्नु यो नेपाली क्रिकेटको लागि स्वर्णिम अवसर पनि हो ।

प्रकाशित मिति: बुधबार, वैशाख २७, २०८० १२:११