चार्ल्स तृतीयको राज्याभिषेकमा राजकुमार ह्यारी किन श्रीमती मेगनबिनै बेलायत पुगे ? (भिडियो)

चार्ल्स तृतीयको राज्याभिषेकमा राजकुमार ह्यारी किन श्रीमती मेगनबिनै बेलायत पुगे ? (भिडियो)

A+ A A-

आफ्ना पिता राजा चार्ल्स तृतीयको राज्याभिषेक समारोहमा उपस्थित हुन उनका कान्छा छोरा ड्युक अफ ससेक्स राजकुमार ह्यारी अमेरिकाबाट एक्लै बेलायत पुगे ।

वेस्टमिन्स्टर एबी चर्चमा शनिबार भएको राज्याभिषेकमा ह्यारी आफ्ना श्रीमती मेगन मर्केलबिनै बेलायत पुगेका थिए । राज्याभिषेक समारोह समाप्त भएसँगै उनी अमेरिका फर्किहाले ।

बेलायती संचारमाध्यम बीबीसीका अनुसार ह्यारीलाई बकिङ्घम राजदरबारको बालकनीमा हुने समारोहका लागि निम्तो दिइएको थिएन । समारोह सकिनासाथ उनी हिथ्रो विमानस्थलबाट शनिबार नै अमेरिका फर्किए । उनी अमेरिका उडेको ९० मिनेटपछि राजा चार्ल्स तृतीय आफ्ना श्रीमती रानी कमिला पार्कर र प्रिन्स तथा प्रिन्सेस अफ वेल्सका साथै अन्य दरबारका सदस्यका साथ बकिङ्घम दरबारको बालकनीमा जम्मा भए ।

(भिडियो)

राजकुमार ह्यारी बकिङ्घम दरबार गएनन् भने उनकी पत्नी मेगन अर्थात् डचेस अफ ससेक्स राज्याभिषेक कार्यक्रममै उपस्थित भइनन् । किनभने बेलायती राजपरिवारमा उनको सक्रिय भूमिका छैन, उनले आफ्नो पदवी पनि त्यागिसकेकी छिन् ।

सो दिन ह्यारी पत्नी मेगन अमेरिकाको लस एन्जलसमा आफ्ना छोरा प्रिन्स आर्चीको चौथो जन्मदिन मनाइरहेकी थिइन् । अमेरिकी संचारमाध्यम पेज सिक्सका अनुसार राजकुमार ह्यारीको उद्देश्य पिताको राज्याभिषेकमा उपस्थित भएर चाँडै छोराको जन्मदिनमा सामेल हुनु थियो ।

यसै वर्षको जनवरी १० मा राजकुमार ह्यारीले ‘स्पेयर’ नामक पुस्तक प्रकाशन गरेका थिए । सो पुस्तकमा राजपरिवारसँग सम्बन्धित घटनाहरू समेटिएको थियो । यो पुस्तकका कारण उनीहरूको सम्बन्धमा दरार पैदा भएको आशंका छ । पुस्तक प्रकाशनपछि पहिलोपटक ह्यारी बेलायत पुगेका थिए ।

सो पुस्तकमा राजपरिवारभित्रका कलह र असहमतिबारे उल्लेख थियो । उनले पुस्तकमा आफूले राजपरिवारबाट अलग महसुस गरेको जनाएका छन् । आफ्नी आमा प्रिन्सेस डाइनाको कार दुर्घटनामा मृत्यु हुँदासमेत पिता चार्ल्सले आफूलाई अंकमाल नगरेको सो पुस्तकमा उनको गुनासो छ ।

एकपटक आफ्नै दाइ विलियमका कारण आफूले स्वस्तिक चिह्नसहितको नाजी लुगा लगाएको र सो कारण आफूले आलोचना र अपहेलना खेप्नुपरेको पनि ह्यारीले पुस्तकमा उल्लेख गरेका छन् । यसरी दरबारभित्रका कुरा खोल्दा उनी र आफ्नै परिवारबीच मतभेद रहेको स्पष्ट हुन्छ ।

यसअघि सन् २०२० मै राजकुमार ह्यारी र उनकी पत्नी मेगन मर्केलले शाही पदवी त्याग्ने घोषणा गरेका थिए । आफूहरू दरबारिया गतिविधिमा सामेल नहुने उनीहरूको भनाइ थियो । यद्यपि उनीहरूलाई ड्युक अफ ससेक्स र डचेस अफ ससेक्स भनेरै सम्बोधन गरिन्छ ।

सन् २०२१ मा त झन् मेगनले यस्तो अभिव्यक्ति दिइन् । त्यसयता उनको र राजपरिवारको सम्बन्ध ज्यादै बिग्रिएको अनुमान गरिन्छ । मेगनले आफूलाई दरबारमा बस्न मन नलाग्नु र शाही पदवी त्याग्ने मनसाय बन्नुमा राजदरबारभित्रकै रंगभेदी व्यवहार कारण भएको बताएकी थिइन् ।

मेगन र ह्यारीको पहिलो सन्तान छोरा आर्ची हो, जसको जन्म मे ६ सन् २०१९ भएको थियो । उनले ओप्रा विन्फ्रीसँगको अन्तर्वार्तामा भनेकी थिइन्, ‘म हैरान भएको मुख्य कारण हाम्रो छोरालाई दरबारमा कुनै सुरक्षा नदिएको बताइएको थियो । गैर–गोरा सन्तान भएका कारण अन्य राजपरिवारका सन्तानले जस्तो सुरक्षा र पद उनले पाएनन् ।’

आफू गर्भवती हुँदा नै दरबारमा आर्चीको लागि नियम बदलिएको उनको भनाइ थियो । आर्चीलाई शाही उपाधि प्रदान नगर्ने र त्योभन्दा आर्चीको छालाको रङ कति कालो हुन्छ भनेर दरबारभित्रै चर्चा हुने उनको भनाइ थियो ।

आफ्नी श्रीमतीमाथि रंगभेदी टिप्पणी हुँदासमेत आफ्ना परिवारले कुनै प्रतिक्रिया नदिँदा आफूलाई दुःख लागेको ह्यारीले पनि बताएका थिए । बीबीसीको सहयोगमा

प्रकाशित मिति: सोमबार, वैशाख २५, २०८० १२:४७