अमेरिकी हतियारले रुसी शक्तिशाली किन्जल मिसाइल नष्ट गर्न सक्षम भयाे युक्रेन (भिडियो)

अमेरिकी हतियारले रुसी शक्तिशाली किन्जल मिसाइल नष्ट गर्न सक्षम भयाे युक्रेन (भिडियो)

A+ A A-

रुसको सबैभन्दा अत्याधुनिक हाइपरसोनिक क्षेप्यास्त्रलाई नष्ट गर्न आफूहरू सक्षम भएको युक्रेनले बताएको छ ।

किभका अनुसार ध्वनीको गतिभन्दा १० गुणा तीव्र रुसी किन्जल क्षेप्यास्त्रलाई युक्रेनी सेनाले गत हप्ताको बिहीबार राजधानी किभमा नष्ट गरिदिएका हुन् । अमेरिकी एन्टी मिसाइल प्रणाली पेट्रियट सिस्टमबाट किन्जललाई आकाशमै खसाइदिएको युक्रेनको दाबी छ ।

अलजजिराका अनुसार रुसी किन्जल क्षेप्यास्त्रले ६५ हजार फिटमाथिसम्म पुगेर प्रतिघण्टा ६ हजार २०० किलोमिटरको गतिमा मार हान्न सक्छ ।

(भिडियो)

रुसको किन्जलले १५ सयदेखि २ हजार किलोमिटरसम्मको दूरीमा पुगेर मार हान्न सक्छ । यो क्षेप्यास्त्रमा ४८० केजीको विस्फोटक पदार्थ हुन्छ भने यो म्याच १० अर्थात् ध्वनिको गतिभन्दा दश गुणा तीव्र छ ।

रुसको सबैभन्दा परिस्कृत हाइपरसोनिक क्षेप्यास्त्र खसाउन युक्रेन सक्षम भएसँगै अब रुसलाई युक्रेनविरुद्धको युद्ध जित्न झनै कठिन हुने विश्लेषण भइरहेको छ ।

किन्जल क्षेप्यास्त्र

युक्रेनको हवाई सेनाका अनुसार रुसी किन्जल क्षेप्यास्त्र मिग–३१ लडाकु विमानबाट हानिएको थियो । अमेरिकी एन्टी मिसाइल पेट्रियट प्रणालीबाट हानेको क्षेप्यास्त्रले एकैपटकमा रुसको शक्तिशाली क्षेप्यास्त्र खसाइदिएको युक्रेनका वायुसेवा कमाण्डर माइकोला ओलेसचकले जानकारी दिएका छन् ।

रुसी राष्ट्रपति भ्लादमिर पुटिनले सन् २०१८ मा किन्जलको विकासपछि हाइपरसोनिक क्षेप्यास्त्रको क्षेत्रमा रुस नेतत्वकर्ता राष्ट्र भएको बताउँदै आएका छन् । किन्जलको तीव्रता, गतिशीलता, र उचाइ क्षमताका कारण यसलाई ट्र्याक गर्न र असफल बनाउन गाह्रो हुने रुसी दाबी छ । यद्यपि युक्रेनले भने यो क्षेप्यास्त्र खसाइदिएको दाबी गरिरहेको छ ।

युक्रेनले दुईवटा ड्रोनको प्रयोग गरी राष्ट्रपति भ्लादमिर पुटिनको हत्या गर्न खोजेको भन्दै यतिबेला रुसले युक्रेनका विभिन्न स्थानमा गोलाबारी र बमबारी गरिरहेको छ । रुसी राष्ट्रपति भवनमा भएको आक्रमणपछि मस्कोले रुष्ट बन्दै युक्रेनको राजधानी किभमा शक्तिशाली किन्जल क्षेप्यास्त्र हानेको युक्रेनी आशंका छ ।

अमेरिकी एन्टी मिसाइल पेट्रियट प्रणाली

उता गत अप्रिलयता अमेरिकाबाट पेट्रियट मिसाइलका साथै नेटो राष्ट्रहरूबाट गोलीगट्ठा, तोप, ट्यांक र बख्तरबन्द गाडी पाएको युक्रेनले रुसको कडा प्रतिकार गर्न सफल भएको छ । जर्मनी, अमेरिका र नेदरल्यान्ड्सले एन्टी मिसाइल प्रणालीहरू पठाएको खबर छ । यद्यपि कति भनेर भने खुलाइएको छैन ।

यी राष्ट्रहरूले युक्रेनी सेनालाई रुसविरुद्ध युद्धको प्रशिक्षण पनि दिइरहेका छन् । अलजजिराको सहयोगमा

प्रकाशित मिति: आइतबार, वैशाख २४, २०८० १७:३३