छ वर्ष अध्ययनपछि लेखियो ‘लाहुरेको रेलीमाई’ उपन्यास

A+ A A-

विजय हितानद्वारा लिखित उपन्यास ‘लाहुरेको रेलीमाई’ सार्वजनिक भएको छ । उपन्यास गोरखा सैनिक मास्टर मित्रसेन थापाको जीवनीमा आधारित छ ।

हितानका अनुसार उपन्यास लेख्नुअघि उनले थापाबारे करिब ६ वर्ष अध्ययन गरेका थिए ।

कृतिमाथि टिप्पणी गर्दै सञ्चारिका समूहकी अध्यक्ष विमला तुम्खेवाले रेलिमाई पढेपछि गोरखा लाहुरेकोे हरेक परिवारले आफ्नै अनुभवको रूपमा लिन सक्ने बताइन् ।

अध्यक्ष तुम्खेवाले यस्ता कृतिहरूमा घरमुली लाहुरे हुँदा वा घरबाहिर कमाउन बस्दा महिलाले निर्वाह गरेको संघर्षपूर्ण यथार्थलाई पनि विशेष स्थान दिएर बयान गर्न सुझाएकी छिन् ।

युद्ध साहित्य लेखेका प्रा.डा. गोविन्दराज भट्टराईले उपन्यासमा उल्लेखित गोरखा लाहुरेले प्रयोग गर्ने करिब एक हजारवटा शब्द प्रयोग भएको बताए । सामान्य पाठकका लागि ती शब्दको अर्थसहित आगामी अङ्कमा पुस्तकको पछाडिपट्टि छाप्न लेखकलाई उनको आग्रह छ ।

उनले कृति निकै राम्रो रहेको भन्दै लेखक हितानको प्रसंशासमेत गरे ।

उनले भने, ‘आफ्नो सैनिक जीवन सँगसँगै बहुमुखी प्रतिभाका धनी पात्र मित्रसेनको डायरी, उनका गीत, सङ्गीत, नाटकलगायतका साहित्यिक गतिविधिको अध्ययनसहित आख्यानका रूपमा ल्याएको यो कृति निकै राम्रो छ ।’

लेखक प्रकाश सायमीले भने गायिका नुरलाई भारत र पाकिस्तानमा गीत÷सङ्गीतको क्षेत्रमा विशेष सत्कार गरिए जसरी मास्टर मित्रसेन पनि नेपाल र भारत दुबै देशले उत्तिकै सम्मान गर्ने व्यक्तित्व भएको टिप्पणी गरे ।

नेपालका विभिन्न भू–भागको वर्णनसहितको गीतले नेपालका भू–भागलाई नै चर्चामा ल्याउने गायकको जीवनको अर्को पाटोलाई उपन्यासको रूपमा प्रकाशित गरी नयाँ पुस्ताका लागि मास्टर मित्रसेनलाई बुझ्ने मौका प्राप्त भएको पनि बताएका छन् ।

हितानले गायकको रूपमा प्रख्यात मित्रसेनको गोरखा लाहुरे भएर पहिलो विश्वयुद्धमा सहभागिता जनाएको र लुकेको पाटोलाई पनि यस कृतिमार्फत उजागर गरेका छन् ।

पूर्व गोरखा सैनिकसमेत रहेका हितानको यस उपन्याससहित १२ वटा साहित्यिक कृति सार्वजनिक भइसकेको छन् ।

उनको पछिल्लो औपन्यासिक कृति ‘लाहुरेको रेलीमाई’ लाई तुम्खेवा, सायमी र भट्टराईलगायतले सामूहिक रूपमा शनिबार विमोचन गरेका हुन् ।

प्रकाशित मिति: आइतबार, वैशाख २४, २०८० १५:४३