यसरी भयो बेलायती राजा चार्ल्स तृतीय र रानी कमिलाको राज्याभिषेक (भिडियो)

A+ A A-

बेलायती राजा चार्ल्स तृतीय र रानी कमिलाको शनिबार राज्याभिषेक भएको छ । राज्याभिषेक समारोहमा राजा चार्ल्स तृतीयले वेस्टमिन्स्टर एबीमा आयोजित विशेष समारोहबीच राजमुकुट पहिरिएका छन् ।

आर्चविशपले सेन्ट एड्वर्ड्ज राजमुकुट राजाको शिरमा राखिदिएका हुन् । जीवनमा एकपटक मात्र उनले ‘सेन्ट एड्वर्ड्ज क्राउन’ भनिने राजमुकुट पहिरिनेछन् ।

यो राजमुकुट पहिरिने राजा चार्ल्स तृतीय सातौँ शासक भएको बीबीसीले जनाएको छ । सोही समारोहमा आर्चविशपले रानी कमिलालाई भने ‘क्वीन मेरिज क्राउन’ राजमुकुट पहिर्‍याइदिएका थिए ।

(भिडियो)

उक्त समारोहमा चार्ल्स तृतीयले राजाको दायित्व पूरा गर्ने शपथ लिए । उनले भने, ‘म यहाँ सुविधा लिन होइन, सेवा गर्न आएको हुँ ।’ आर्चविशपले राज्याभिषेक हेरिरहेकाहरूलाई राजा चार्ल्स तृतीयप्रति निष्ठाको शपथ लिन पनि भनेका थिए ।

त्यो शब्द थियो, ‘म शपथ लिल्छु, म योर म्याजेस्टी, उनका उत्तराधिकारी र कानुनप्रति साँचो निष्ठा राख्नेछु ।’ महारानी एलिजाबेथको मृत्यु भएको तीन दिनपछि नै औपचारिक रूपमा चार्ल्स तृतीयलाई गत वर्षको सेप्टेम्बरमा सम्राट घोषणा गरिएको थियो ।

समारोहमा मुस्लिम, यहुदी, सिख र बौद्ध समुदायका प्रतिनिधिहरू सहभागी थिए जहाँ बाइबलको एक अंश वाचन गर्ने प्रधानमन्त्री ऋषि सुनक हिन्दु समुदायका हुन् ।

समारोहको बीचबीचमा राजाले नै रोजेका सङ्गीत बजेका थिए जसमा नयाँ बनाइएका १२ वटा धुन समावेश थिए । पत्नी रानी कमिलाका साथ उनी बकिङ्घम दरबारबाट उक्त समारोहका लागि निस्कँदा सेन्ट्रल लन्डनका सडकमा मानिसहरूको भिडले स्वागत गरेको थियो ।

वेस्टमिन्स्टर एबीमा करिब २ घण्टा लामो राज्याभिषेक समारोहपछि उनीहरू पहिले आएकै मार्गबाट बकिङ्घम दरबारतर्फ फर्किए ।

राज्याभिषेकमा सहभागी हुन संसारभरका उच्चपदस्थ व्यक्तित्वहरू वेस्टमिनिस्टरमा उपस्थित थिए । सो समारोहमा सहभागी हुन नेपालका परराष्ट्रमन्त्री एनपी साउद पनि बेलायत पुगेका थिए ।

प्रकाशित मिति: आइतबार, वैशाख २४, २०८० १४:३३