गुल्मीमा विद्यार्थी अभाव भएपछि विद्यालयका तह समायोजन

A+ A A-

गुल्मीको इस्मा गाउँपालिकामा विद्यार्थी अभाव भएपछि विद्यालयका तहहरू समायोजन गरिएको छ । विद्यार्थीको संख्या एकदमै कम हुने, शिक्षकको संख्या बढी हुने, आर्थिक भार बढ्दै जाने र विद्यालयको गुणस्तर घट्दै जाने लगायतका कारण विद्यालयका तह समायोजन गरिएको हो ।

गाउँपालिकाको वडा नम्बर ६ अम्मरपुरमा रहेको गोविन्द रत्न कुँवर लोकतान्त्रिक आधारभूत विद्यालय हाल १७ लाखको आर्थिक भार, कक्षा ६ र ७ विद्यार्थीको संख्या क्रमश निकै कम र शिक्षकलाई तलव दिन नसकेपछि विद्यालय स्थलगत अध्ययन तथा अनुगमन कार्यादलले विद्यालय समायोजन गर्ने निर्णय गरेको हो ।

प्राथामिक तह कायम राख्दै कक्षा ६ र ७ लाई मात्र समायोजन गरिएको कार्यदलका संयोजक ढालबहादुर कुँवरले जानकारी दिए । बढीमा २० मिटर मात्रको दूरीमा अम्मरपुर औमप्रसाद गौतम माध्यमिक विद्यालय रहेकोले पनि विद्यालय समायोजनले अभिभावक तथा विद्यार्थीलाई कुनै असर नगर्ने संयोजक कुँवरले बताए ।

कक्षा ६ र ७ हटाइएको गोविन्द रत्न कुँवर लोकतान्त्रिक आधारभूत विद्यालयमा हाल ८ शिक्षक छन् । २ प्राथामिक तह स्थायी, २ प्राथामिक तह राहात र चार निजी शिक्षक रहेको प्रधानाध्यापक टेकहरि पराजुलीले जानकारी दिए । उनका अनुसार २ स्थायी र २ राहात शिक्षक रहे पनि प्रधानाध्यापक निजी शिक्षक छन् । केही समय अगाडि तत्कालीन प्रधानाध्यापक मृत्युपछि आफूले चलाउँदै आएको पराजुलीले स्वीकार गरे । तत्कालीन प्रधानाध्यापक तिलक कुँवरले ३५ हजारका दरले तिन महिनाको तलब एक लाख ५ हजार पाउन बाँकी छ । तर, उनको तलब हालसम्म विद्यालयले दिएको छैन् । गत असोज ५ गते श्रीमान् तिलकको मृत्यु भएपछि उनकी श्रीमती शान्त कुँवरले आफूले बारम्बार विद्यालयसँग माग गरे पनि तलब नपाएको गुनासो गरिन् । विद्यालयले बेरुजु आएको भन्दै तलब नदिएको बताउँछ ।

विद्यालयले निजी शिक्षकलाई डेढ वर्षदेखि तलब दिन नसकेको, हाल १७ लाख आर्थिक भार रहेको र यसअघिको शैक्षिक सत्रमा कक्षा ६ मा १० र कक्षा ७ मा १२ जना विद्यार्थी रहेको प्रधानाध्यापक टेकहरि पराजुलीले बताए । उनले विद्यालय समायोजनको असर अभिाभवक र विद्यार्थीलाई पर्न नहुने बताए । यसो त यहाँ विद्यालय समायोजनले कसैलाई पनि असर गरेको देखिन्न ।

अंग्रेजी माध्यममा अध्ययन अध्यापक भएता पनि यहाँ यसको प्रभावकारिता भने कम देखिएको छ । नजिकै अर्को विद्यालय रहेकोले कक्षा ६ र ७ समायोजन गर्ने, प्राथामिक तहमा अध्ययन अध्यापक गुणस्तरीय बनाउने र आर्थिक भार कम गराउनको लागि समायोजनको निर्णय गरिएको इस्मा गाउँपालिका शिक्षा शाखा प्रमुख लालबहादुर कुँवरले बताए ।

इस्मा गाउँपालिका विद्यालय स्थलगत अध्ययन तथा अनुगमन कार्यादलका संयोजक ढालबहादुर कुँवरले विद्यार्थीको अभावका कारण गाउँपालिकाका ७ वटा विद्यालयको तह समायोजन गरिएको बताए । उनका अनुसार वडा नम्बर १ को बालकक्षा राख्ने गरी जुकेपानी आधारभूत विद्यालय, वडा नम्बर २ को नमुना आधारभूत विद्यालयको कक्षा ४ र ५ गरि दुई तह, वडा नम्बर ३ को दर्लामचौर आधारभूत विद्यालयमा कक्षा ३ सम्म चल्ने गरि समायोजन गरिएको छ ।

वडा नम्बर ४ को नेपाल राष्ट्रिय आवसीय आधारभूत विद्यालयमा बालकक्षा राख्ने गरी समायोजन गरिएको, वडा नम्बर ५ को भगवती आधारभूत विद्यालयमा बालकक्षा राख्ने गरी समायोजन गरिएको, वडा नम्बर ५ मा रहेको खड्क आधारभूत विद्यालयमा बालकक्षा राख्ने गरी समायोजन गरिएको र वडा नम्बर ६ मा रहेको गोविन्द रत्न कुँवर लोकतान्त्रिक आधारभूत विद्यालयमा समायोजन गरिएको हो ।

प्रकाशित मिति: शुक्रबार, वैशाख २२, २०८० १७:१९