मृत भाडाका लडाकुहरूको शव देखाउँदै वाग्नरले भन्यो- पाँच दिनभित्रै युक्रेन छाड्छौँ (भिडियो)

मृत भाडाका लडाकुहरूको शव देखाउँदै वाग्नरले भन्यो- पाँच दिनभित्रै युक्रेन छाड्छौँ (भिडियो)

A+ A A-

युक्रेन अतिक्रमणका लागि रुसले सुरुवातदेखि भाडाका लडाकुको प्रयोग गरिरहेको छ । भाडाका लडाकुको वाग्नर समूहका कारण रुसले धेरै स्थानमा युक्रेनी सेनाविरुद्ध जित हासिल पनि गरेको छ ।

तर, गत फेब्रुअरी महिनादेखि वाग्नरले रुसले आफूहरूलाई हतियार आपूर्ति गर्न नसकेको बताइरहेको छ । यतिबेला त रुसी भाडाका लडाकु समूह वाग्नरका प्रमुख यभजिनी प्रिगोजिनले रुसले हतियारहरू पर्याप्त आपूर्ति गर्न नसकेको भन्दै आफूहरूले पाँच दिनभित्रै युक्रेनी भू-भाग छाड्ने बताएका छन् ।

शुक्रबार एक भिडियो सार्वजनिक गर्दै उनले मे १० तारिखमा युक्रेन छाड्ने घोषणा गरेका हुन् । प्रिगोजिनकाअनुसार हतियार कम हुँदा भाडाका लडाकुहरू अत्यधिक मारिएका छन् । प्रिगोजिनको भिडियो सन्देशमा दर्जनौँ भाडाका लडाकु मारिएको देखाइएको छ । उनले दुःखी हुँदै हतियार नभएका कारण अब लड्ने अवस्था सकिएको र मे १० तारिखमा युक्रेन छाड्ने बताएका हुन् ।

(भिडियो)

यसअघि नै प्रिगोजिनले रुसी रक्षामन्त्री सर्गी सोइगु र राष्ट्रपति भ्लादमिर पुटिनलाई बारम्बार धेरैभन्दा धेरै गोलाबारुद दिन अनुरोध गर्दै पत्र पनि लेखेका थिए । उनले गत हप्ता भनेका थिए, ‘हरेक दिन हाम्रा हजारभन्दा बढी सेनालाई कफिनमा राखेर घर पठाइरहेका छौँ । यदि पर्याप्त हतियार दिन सक्नु हुँदैन भने हामी यहाँबाट फर्किन तयार भइसक्यौँ ।’

आफूहरू डरपोक मुसाजस्तो भएर युक्रेनबाट भाग्न बाध्य भएको प्रिगोजिनको भनाइ छ । हाल वाग्नर समूहले रुसी सेनालाई पूर्वी युक्रेनको डोनेट्स्क क्षेत्रमा रहेको बाख्मुतमा युद्ध गरेर सहयोग गरिरहेका छन् । वाग्नरले दैनिक चार हजार तोप गोला मागिरहँदा रुसबाट मात्र ८०० तोपगोला प्राप्त भइरहेको छ । आफूले मागेको हतियारमा दैनिक मात्र ३० प्रतिशत हतियार प्राप्त गरेका कारण यी भाडाका लडाकु समूहले युक्रेनी सेनाविरुद्ध लड्न सकिरहेका छैनन् ।

युक्रेनले भने अमेरिका र पश्चिमा राष्ट्रसँगै नेटो समूहबाट अनगिन्ती हतियारहरू पाइरहेको छ । केही समयअगाडि मात्र नेटोले रुसविरुद्ध लड्‌न भन्दै युक्रेनलाई २ सय ट्यांक र १ हजार ५ सय ५० बख्तरबन्द गाडी पठाएको थियो । नेटोले युक्रेनी सेनालाई युद्ध कसरी गर्ने भनेर प्रशिक्षण पनि दिइरहेको छ ।