पोइट आइडलमा कविताको आगो झोस्ने कञ्चनपुरे न्याथन (भिडियोसहित)

A+ A A-

जसरी साइबेरियन चराहरू जाडो छल्न मेरो देश आए
हो, त्यसरी मेरो देशका चराहरू पनि गरिबी छल्न अरब गए
ती चराहरूले जाडो र गरिबी छले कि छलेनन् थाहा छैन
तर साहुको ऋणको बोझ
कामको थकान
निद्राविहीन रात
घरको पुरानो धुरी
आमाको पुरानो धोती
अझै छल्न र फेर्न बाँकी नै छ ।

०००

न्याथन रायन नेपालको पहिलो ‘पोइट आइडल’ नै बन्न त सकेनन् तर काव्यजगत्‌मा आफ्नो जबर्जस्त छाप भने छाेडे ।शोमा कविताको आगो झोसेर न्याथन बले । अनि निर्णायक र दर्शकलाई तापको न्यानाे दिलाए ।

माथिको कवितांश उनले पोइट आइडलमा प्रस्तुत गरेकामध्ये चर्चित एक हो । देश, विदेशमा यो कविताले चर्चा मात्र पाएन, सीमित वृत्तबाट न्याथन ठूलो जमातमा चिनिए पनि । त्यसैले त उनी कवितालाई आफ्नो जिन्दगी मान्छन् ।

कवितालाई सुन्दर प्रस्तुतिमार्फत दमदार बनाउन माहिर न्याथनको वास्तविक नाम नरेश भण्डारी हो । पहिलो नाम उनलाई बाआमाले दिएका हुन् । दोस्रो नाम उनले आफैँलाई दिएका हुन् । भन्छन्, ‘मलाई बाआमाले नरेश भण्डारी बनाउनुभयो, नरेश भण्डारीले मलाई न्याथन रायन बनायो, म न्याथन रायन भएरै अहिले बाआमाहरूसम्म सुनिएको छु ।’

कञ्चनपुरको शुक्लाफाँटा नगरपालिका झरारीका उनी पूर्वक्रिकेटर हुन् । क्रिकेटर बन्ने उनको सपना थियो । न्याथनले राष्ट्रिय प्रतियोगिता नै खेलिसकेका थिए । तर, जिन्दगी सधैँ सोचेजस्तो कहाँ हुनु ?

उनले क्रिकेटलाई जिन्दगी बनाउन सकेनन्, अनि कवितासँग नजिकिँदै गए । उसो त, न्याथन पहिल्यैदेखि कविता लेख्थे, गुनगुनाउँथे । उनकै भनाइमा क्रिकेटर बन्न नसकेकाे जिन्दगीलाई उनले कविताको जिम्मा लगाए । र, आज कवितालाई नै जिन्दगी बनाएर होमिएको उनी बताउँछन् ।

झप्प दारी, लामो कपाल, कालो चश्मा अनि घाँटीमा रुद्राक्षका मालाहरू । फरक स्वभाव र शैलीको व्यक्तित्व छ उनको । यसबारे न्याथनकाे आफ्नै तर्क हुने गर्छ । भन्छन्, ‘यो अवतार मेरा लागि किक हो । म यसरी नै, यही शैलीमा जिउन रुचाउँछु ।’

उनी थिएटर आर्टिस्ट पनि हुन् । उनले ‘के घर के डेरा’, ‘छक्का पन्जा ४’ फिल्ममा अभिनय गरिसकेका छन् । सिर्जनशील लेखनी र अभिनय उनको काव्ययात्रामा गतिलो खुड्किलो बनेको छ ।

६ वर्षको कवितायात्रामा उनले झण्डै २ सय कविता लेखिसकेका छन् । पोइट आइडलमा भाग लिनुअघि न्याथनले आफ्नै फेसबुक र युट्युबमा कविताहरू वाचन गरेर राख्थे । केही समय उनले विवेकशील नेपाली दलको रुपान्तरण अभियानमा सक्रिय भएर काम पनि गरेका थिए । सामाजिक जागरण, लेखनी, अभिनयहुँदै पोइट आइडलसम्म आइपुगेका न्याथन प्रतियोगिताले आफ्ना लागि आगामी बाटो प्रस्टसित कोरिदिएको बताउँछन् । भन्छन्, पहिला यो बाटो अलि फिँजारिएको थियो होला, अलि धमिलो थियो होला । तर, पोइट आइडलले ती सबै धूमिल हटाइदिएको छ ।

निकै कलात्मक र भावुक शैलीमा कविता प्रस्तुत गर्छन् उनी । शिलापत्रको स्टुडियोमा 'साइबेरियन चराहरू' शीर्षकको कविता प्रस्तुत गर्दा उनका आँखा टिलपिलाए । आउनुस्, पोइट आइडलमा कविताको आगो झोस्ने सुदूरपश्चिमका कवि न्याथन रायन र उनका केही कविता सुनौँ ।

भिडियाे:

प्रकाशित मिति: शनिबार, वैशाख २३, २०८० ०८:००