कति सुरक्षित छन् पुटिन ? पुटिनको हत्या प्रयास रुसकै लागि लज्जाको विषय (भिडियो)

कति सुरक्षित छन् पुटिन ? पुटिनको हत्या प्रयास रुसकै लागि लज्जाको विषय (भिडियो)

A+ A A-

रुसी राष्ट्रपति भ्लादमिर पुटिनको सरकारी आवास क्रेमलिन प्यालेसमा बुधबार राति दुईवटा ड्रोन आक्रमण भएको भन्दै मस्कोले विज्ञप्ति जारी गर्‍यो । क्रेमलिन रुसी राष्ट्रपतिको आवासीय परिसर हो, जुन राजधानी मस्कोमा छ ।

यस ड्रोन आक्रमणको भिडियो फुटेज पनि रुसले सार्वजनिक गरेको छ, जहाँ ड्रोनलाई राष्ट्रपति भवनमाथि नष्ट गरेको देखिन्छ । रुसी सरकारका प्रवक्ता दिमित्री पेस्कोभका अनुसार अमेरिकी योजनामा युक्रेनले राष्ट्रपति भ्लादमिर पुटिनको हत्या गर्न ड्रोन हमला गर्‍यो । उनी भन्छन्, ‘यस्ता आक्रमणको निर्णय किभमा नभएर अमेरिकामा हुन्छ । किभ कठपुतली हो जो अमेरिकाको इसारामा चल्छ ।’

इलेक्ट्रोनिक राडारको प्रयोग गरेर रुसी विशिष्ट सुरक्षा बल युक्रेनी ड्रोनलाई निष्क्रिय पार्न सफल भएको मस्कोको भनाइ छ । ड्रोन हमलाको घटनामा कसैको हताहती भएको छैन भने राष्ट्रपति भ्लादमिर पुटिन पनि सुरक्षित छन् ।

(भिडियो)

उता युक्रेनले भने बिहीबार आफूमाथि लगाइएको आरोपको खण्डन गर्दै रुसी राष्ट्रपति कार्यालयमा भएको ड्रोन आक्रमणमा आफ्नो संलग्नता नभएको प्रतिक्रिया दिएको छ । तर, रुसले युक्रेनले नै ड्रोन आक्रमण गरेको र यो घटना राष्ट्रपति पुटिनको हत्या प्रयास हो भनेपछि विश्लेषकहरूले यो घटना रुसका लागि लज्जाको विषय भएको बताइरहेका छन् ।

विश्वका एक शक्तिशाली नेतामा पुटिन गनिन्छन्, उनलाई दिएको सुरक्षा हेर्दा लाग्छ उनलाई चराले पनि छुन सक्दैन । पुटिन उपस्थित कार्यक्रममा सहभागी बीबीसीका पत्रकारहरूका अनुसार पुटिनका लागि सबै सवारी साधन रोकिन्छन् भने उनको कार्यक्रमस्थलमा हवाई मार्ग पनि बन्द गरिन्छ । उनी आउने ठाउँमा बृहत चेकजाँच हुन्छ ।

तर, पुटिनको हत्या प्रयासका लागि दुईवटा ड्रोन राष्ट्रपति निवासमै पुगेपछि भने उनको सुरक्षा व्यवस्थामाथि प्रश्न उठ्न थालेको छ । रुसी हवाई सुरक्षाको पनि आलोचना भइरहेको छ । रुसको रक्षा मन्त्रालयले आफ्ना महत्त्वपूर्ण क्षेत्र र भवनको सुरक्षाका लागि रक्षा प्रणाली जडान गरेका छन् । रुसले युक्रेनबाट ड्रोन आएको र पुटिनमाथि आक्रमण प्रयास भएको बताइरहँदा रुसको सुरक्षा तयारी फितलो भएको अनुमान गर्न सकिन्छ । अर्थात् शक्तिशाली नेता मानिएका पुटिन पनि सुरक्षित छैनन् ।

हाल युक्रेनले रुसी क्षेत्रका तेल भण्डारहरूमा लगातार ड्रोनबाट आक्रमण गरिरहेको समाचार पनि सार्वजनिक भइरहेका छन् । आफ्नो राष्ट्रपतिको हत्या प्रयास भएको बताउँदै रुसले अहिले युक्रेनका विभिन्न क्षेत्रमा भिषण आक्रमण गरिरहेको छ । बीबीसी हिन्दीको सहयोगमा

प्रकाशित मिति: शुक्रबार, वैशाख २२, २०८० १३:१७