सेताम्मे हिउँ र चट्टानैचट्टानले ढाकिएको ग्रिनल्यान्ड (भिडियो)

A+ A A-

तपाईं ग्रिनल्यान्डको नाम सुन्दा हरियाली नै हरियाली भएको र आइसल्यान्डको नाम सुन्दा हिउँले ढाकिएको क्षेत्र सम्झिनुहुन्छ होला । तर, नामको ठीक विपरीत आइसल्यान्डमा हिउँ कम र हरियाली बढी छ भने ग्रिनल्यान्डमा हरियाली कम र हिउँले ढाकिएको सेताम्मे भाग बढी छ । नामले ग्रिन भएको यो टापु खासमा संसारकै केही ठूला ग्लेसियरको घर हो ।

आर्किटिक र एट्लान्टिक महासागरको बीचमा रहेको ग्रिनल्यान्ड क्षेत्रफलका हिसाबले संसारको सबैभन्दा ठूलो टापु हो । भौगोलिक हिसाबले यो देश उत्तर अमेरिकासँग र सांस्कृतिक रूपमा युरोपसँग नजिक छ । एक स्वतन्त्र भूभाग हुनुका बाबजुद यो देश युरोपेली देश डेनमार्कको उपनिवेश हो । डेनमार्ककी महारानी मार्ग्रेटा द्वितीय ग्रिनल्यान्डकी पनि महारानी हुन् । सन् १९७९ मा डेनमार्कले ग्रिनल्यान्डलाई स्वशासनको अधिकार दियो र सन् २००८ मा ग्रिनल्यान्डका जनताले त्यहाँको सरकारलाई अधिक शक्ति हस्तान्तरणको पक्षमा मतदान गरे । त्यसपछि डेनिस सरकारसँग त्यहाँको विदेश मामिला, सुरक्षा र आर्थिक नीति मात्रै बाँकी छ ।

ग्रिनल्यान्डको क्षेत्रफल २१ लाख ६६ हजार ८६ वर्गकिलोमिटर छ । यहाँको जनसंख्या भने करिब ५७ हजार मात्रै छ । जनघनत्वको कुरा गर्ने हो भने प्रति एक हजार वर्गकिलोमिटरमा २८ जना मानिस बसोबास गर्छन् । ग्रिनल्यान्डको राजधानी तथा सबैभन्दा ठूलो शहर नुक हो । यहाँको आधिकारिक भाषा ग्रिनल्यान्डिक हो । यसका अलावा यहाँ डेनिस र अंग्रेजी पनि बोलिन्छ ।

सन् १९५० मा वैज्ञानिकहरूले ग्रिनल्यान्ड तीन अलग द्विप मिलेर बनेको र ग्लेसियरका माध्यमबाट एकअर्कामा जोडिएको अनुमान गरेका छन् । ग्रिनल्यान्ड डेनमार्कको उपनिवेश भएको क्षेत्र भए पनि यो युरोपेली संघको सदस्य होइन । धर्मको कुरा गर्ने हो भने यहाँका सबै मानिस इसाई धर्मावलम्बी छन् । ग्रिनल्यान्डको जीडीपी ३.०८ विलियन डलर र प्रतिव्यक्ति आय ५३ हजार डलर छ ।

डेनमार्कको उपनिवेश भएका कारण यहाँ पनि डेनमार्कको मुद्रा डेनिस क्रोनर नै प्रयोग हुन्छ ।