मुलुकको आर्थिक अवस्था उद्योगी व्यवसायीहरूका लागि चुनौतीपूर्णः अध्यक्ष ढकाल

मुलुकको आर्थिक अवस्था उद्योगी व्यवसायीहरूका लागि चुनौतीपूर्णः अध्यक्ष ढकाल

A+ A A-

नेपाल उद्योग वाणिज्य महासंघका अध्यक्ष चन्द्रप्रसाद ढकालले मुलुकको आर्थिक अवस्था उद्योगी व्यवसायीहरूका लागि चुनौतीपूर्ण रहेको बताएका छन् । बिहीबार ग्रिल तथा स्टिल व्यवसायी महासंघको ९ महाधिवेशनमा बौल्दै अध्यक्ष ढकालले यस्तो बताएका हुन् ।

उनले भर्खरै तथ्याङ्क विभागले सार्वजनिक गरेको चालु आर्थिक वर्षको २.१६ प्रतिशत मात्रै आर्थिक वृद्धिदर हुने प्रक्षेपणले अर्थतन्त्र संकुचन देखिएको बताए । अध्यक्ष ढकालले सरकारको लक्ष्यअनुसार आर्थिक वृद्धिदर हुन नसक्ने उद्योगी व्यवसायीहरूका लागि चुनौतीपूर्ण रहेको बताए । उनले पछिल्लो समय उद्योगी व्यवसायीहरूको आत्मबल बढ्न नसकेको बताए । उनले सरकारले व्यवसायीमैत्री मौद्रिक तथा आर्थिक नीतिहरू ल्याएर उद्योगी व्यवसायी र आम जनताको आत्मबल बढाउन आवश्यक रहेको उल्लेख गरे. ।

उनले सरकारले अर्थतन्त्रको वर्तमान अवस्थामा उद्योगी व्यवसायीहरूको आत्मबल बढाउने काम नगरेसम्म अर्थतन्त्रमा सुधार आउन नसक्ने बताए । अध्यक्ष ढकालले अर्थतन्त्रमा आएका वर्तमान समस्या र चुनौती समाधान गर्न सरकार, नियमन निकाय र निजीक्षेत्र सबै हातेमालो गरेर अघि बढ्नुपर्ने आवश्यकता रहेको बताए । उनले अर्थतन्त्रमा वर्तमान समस्या र चुनौती आउनुमा निजीक्षेत्र, नियमन निकाय र सरकार पक्षको केही न केही दोष रहेको बताए ।

उनले निजीक्षेत्रले बैंकहरूले सहज रूपमा कर्जा दिँदा घरजग्गा, शेयर वा सवारीसाधन खरिदमा लगानी गर्नु व्यवसायीहरूको पनि दोष भएको बताए । उनले मुलुक श्रीलंका बन्छ भन्दै मौद्रिक नीतिमा कडाइ गर्ने पोलिसी मेकरको पनि दोष रहेको दाबी गरे । उनले वर्तमान मुलुकको अर्थतन्त्रको समस्या र चुनौतीबाट बाहिर आउनका लागि सबै पक्ष मिलेर जानुको विकल्प नभएको बताए ।

त्यस्तै, नेपाल चेम्बर अफ कमर्सका अध्यक्ष राजेन्द्र मल्लले ग्रिल तथा स्टिल व्यवसायीमाथि सरकारले बेवास्ता गरेको आरोप लगाए । उनले ग्रिल तथा स्टिल व्यवसायी महानगरमा उद्योग दर्ता गर्न नदिने अवस्था रहेको भन्दै देशभर सबै महानगर घोषणा हुने हो भने व्यवसाय कहाँ गर्ने भन्दै प्रश्न गरे । उनले ग्रिल तथा स्टिल व्यवसायलाई सरकारले केही न केही व्यवस्थित बनाउनुपर्ने बताए ।