म अमेरिकाको राष्ट्रपति हुन्थे भने २४ घण्टामै रुस–युक्रेन युद्ध रोकिदिन्थे: ट्रम्प (भिडियो)

म अमेरिकाको राष्ट्रपति हुन्थे भने २४ घण्टामै रुस–युक्रेन युद्ध रोकिदिन्थे: ट्रम्प (भिडियो)

A+ A A-

अमेरिकी पूर्वराष्ट्रपति डोनाल्ड ट्रम्पले आफू अमेरिकाको राष्ट्रपति कायम रहेको भए रुस र युक्रेनबीच जारी एक वर्षे युद्ध एकैदिनमा अन्त्य हुने थियो भन्ने दाबी प्रस्तुत गरेका छन् ।

संयुक्त अधिराज्यको स्कटल्यान्ड पुगेका ट्रम्पले आफू दोस्रो कार्यकालका लागि सन् २०२० मा नै पुनः राष्ट्रपतिका रूपमा निर्वाचित हुनुपर्ने थियो भनेर अभिव्यक्ति दिएका हुन् ।

उनले बेलायती टेलिभिजन जीबी न्युजसँग भनेका छन्,‘यदि म अमेरिकाको राष्ट्रपति हुन्थे भने २४ घण्टामै रुस-युक्रेन युद्ध रोकिने थियो । मैले एकैदिनमा सहज रूपमै युद्ध रोक्ने थिए ।’ उनले आफूले व्यक्तिगत सम्बन्धलाई प्रयोग गर्दै युद्ध रोक्न रुसी राष्ट्रपति भ्लादमिर पुटिन र युक्रेनी राष्ट्रपति भोलोदिमिर जेलेन्स्कीसँग वार्ता गर्ने र त्यो उनीहरूले मान्ने उनको दाबी छ ।

(भिडियो)

पत्रकार नाइजेल फराससँगको अन्तर्वार्तामा ट्रम्पले आफू सरकारमा भएको भए चीन, उत्तर कोरिया र इरानसँगको अमेरिकी तनाव पनि कम हुने बताएका हुन् । अमेरिकामा आगामी वर्ष राष्ट्रपतिको निर्वाचन हुँदैछ । रिपब्लिकन पार्टीका ७६ वर्षे ट्रम्पले सो निर्वाचनमा पुनः राष्ट्रपतिको उम्मेदवारी दिने मनसाय बनाएका छन् । तर, हालसम्म उम्मेदवारीको घोषणा गरेका छैनन् ।

वर्तमान अमेरिकी राष्ट्रपति ८० वर्षे जो बाइडेनले भने दोस्रोपटक राष्ट्रपतिमा लड्ने घोषणा गरिसकेका छन् । उपराष्ट्रपतिमा वर्तमान उपराष्ट्रपति कमला ह्यारिसकै दाबी छ । ट्रम्पले चुनावमा लड्ने घोषणा त गरेका छैनन् । यद्यपि, उनले बाइडेनको राष्ट्रपतीय उम्मेदवारीको विरोध गरिरहेका छन् ।

बाइडेनकै समयमा शताब्दीयताकै खराब मुद्रास्फिति अमेरिकाले व्यहोरिरहेको र बैंकहरू डुब्न थालेको ट्रम्पको भनाइ छ । बाइडेन राष्ट्रपति बनिरहे डलरको मूल्य विश्वमा चाँडै कमजोर बन्ने पनि उनी बताउँछन् । आफ्नो पालामा अमेरिकी सीमाक्षेत्र सुरक्षित थियो तर हाल बाइडेनका कारण दक्षिणी सीमा क्षेत्रबाट अवैध आप्रवासीहरू अमेरिकी समुदायमा प्रवेश गरेको र ती मानसिसबाट अमेरिकालाई खतरा भएको ट्रम्पको टिप्पणी छ ।

बाइडेनले विश्वलाई तेस्रो विश्वयुद्धतर्फ धकेलेको पनि ट्रम्प बताउँछन् । रुस र चीनको बढ्दो सम्बन्धबीच र इरानले आणविक बम बनाइरहँदा बाइडेनको सरकारले केही गर्न नसकेको पनि उनको आरोप छ । ट्रम्पले भन्छन्, ‘तपाईंहरूको सहयोगले हामी बाइडेनलाई पराजित गर्नेछौँ र अमेरिकालाई फेरि महान देश बनाउनेछौँ ।’

-रोयटर्सको सहयोगमा

प्रकाशित मिति: बिहीबार, वैशाख २१, २०८० १५:०५