बैंकिङ संकट: अमेरिकामा बन्द भयो चौथो बैंक, के अमेरिकी नागरिकको पैसा सुरक्षित छ ?

बैंकिङ संकट: अमेरिकामा बन्द भयो चौथो बैंक, के अमेरिकी नागरिकको पैसा सुरक्षित छ ?

A+ A A-

अमेरिकामा दुई महिनाको अन्तरालमा चारवटा बैंक बन्द भएका छन् । सिल्भरगेट क्यापिटल कोर्प बैंक, सिलिकन भ्याली बैंक, सिग्नेचर बैंकपछि अहिले फर्स्ट रिपब्लिक बैंक बन्द हुन पुगेको हो ।

सोमबार मात्र रिपब्लिक बैंक बन्द भएको घोषणा भयो । अहिले यसको सम्पत्ति वित्तीय सेवा कम्पनी जेपीमोर्गनले अधिग्रहण गरेको छ । यस बैंकका अधिकांश ग्राहक धनी थिए, उनीहरूले ऋण समयमै तिर्थे र पैसा पनि मज्जाले जम्मा गर्थे ।

तर, पछिल्लो समय अमेरिकी बैंकहरूमा निक्षेपकर्ताहरूलाई निक्षेप बीमा आपूर्ति गर्ने सरकारी संस्था फेडेरल डिपोजिट इन्स्योरेन्स कर्पोरेसन एफडीआईसीले रिपब्लिकसँगै सबै बैंकको प्रतिव्यक्ति २ लाख ५० हजार अमेरिकी डलरसम्मका पैसाको मात्र जिम्मा लिन सक्ने बताएपछि मानिसहरू झस्किए । २ लाख ५० हजार डलरभन्दा बढी रकम जम्मा गरेका मानिसहरूले बैंक बन्द भएको खण्डमा आफ्नो पैसा फिर्ता नपाउने त्रासपछि धमाधम पैसा झिक्न थालियो ।

गत हप्ता मात्र रिपब्लिक बैंकले यस वर्षको तीन महिनामा बैंकमा जम्मा हुने रकममा सय अर्ब अमेरिकी डलरले कमी आएको बताएको थियो । निक्षेपकर्ताहरूले पैसा जम्मा गर्न छाडेपछि बैंकको शेयर ह्वात्तै घट्न थाल्यो । बैंकले ग्राहकको आवश्यकता पूरा गर्न पर्याप्त पैसा भएको बताइरहेको थियो तर उनीहरूको दाबी धेरै बेर टिक्न सकेन ।

सिलिकन भ्याली बैंक र सिग्नेचर बैंक जसले प्रविधि कम्पनीहरूमा लगानी गरेका थिए । गत मार्चमा निक्षेपकर्ताहरूले पैसा झिकेकै कारण ती बैंक बन्द भएका थिए । फर्स्ट रिपब्लिक बैंक अहिले वित्तीय सेवा कम्पनी जेपीमोर्गनको स्वामित्वमा गएको छ, यसको अर्थ रिपब्लिक बैंकका ग्राहक जेपीमोर्गनको ग्राहक हुन् र उनीहरूको सबै जम्मा भएको रकम सुरक्षित छ ।

अलजजिराका अनुसार सरकारी बीमा कम्पनी फेडेरल डिपोजिट इन्स्योरेन्स कर्पोरेसन एफडीआईसीले जुनै बैंक बन्द भए पनि २ लाख ५० हजार डलरभन्दा कम जम्मा भएको रकम फिर्ता हुने ग्यारेन्टी गरेको छ । तर, एकै बैंकमा सोभन्दा बढी रकम छ भने बैंक बन्द हुँदा त्यो रकम फिर्ता हुने छैन ।

तर, यदि संयुक्त खाता छ भने ५ लाख डलरसम्मको रकम उक्त सरकारी बीमा संस्थाले फिर्ता गर्नेछ । ऋण रकममा आक्रामक ब्याजदरका कारण पनि फर्स्ट रिपब्लिक बैंकसँगै अन्य बैंकहरू डुबेको विश्लेषण भइरहेको छ । अमेरिकाको केन्द्रीय बैंक फेडरल रिजर्भ सिस्टमले पछिल्लो समय ऋण ब्याजदर भारी मात्रामा बढाइदिएको छ भने निक्षेप ब्याजदर घटाइदिएको छ, जसले हजारौँ कारोबारीलाई समस्या सिर्जना भएको छ ।

अमेरिकी बैंकहरू डुब्न थालेपछि विश्वभर यसको प्रभाव नकारात्मक पर्ने विश्लेषण भइरहेको छ । अलजजिरा र आजतकको सहयोगमा

प्रकाशित मिति: मंगलबार, वैशाख १९, २०८० १७:२९