पाँच महिनामा एक लाख रुसी सेना मारिएकाे अमेरिकाकाे दाबी (भिडियो)

A+ A A-

युक्रेनसँगको युद्धमा गत डिसेम्बरयता मात्र एक लाखभन्दा बढी रुसी सेनाहरू मारिएको अमेरिकाले जनाएको छ ।

अमेरिकी राष्ट्रपतिको कार्यालय ह्वाइट हाउसका अनुसार पछिल्लो पाँच महिनाको अवधिमा रुसले आफ्ना धेरैभन्दा धेरै सेनाहरू गुमाइसकेको छ । पछिल्लो दुई महिनाको अवधिमा मात्र २० हजार रुसी सैनिक मारिएका छन् ।

युक्रेनको पूर्वी क्षेत्रमा भएको रुसी आक्रमणको कीभले प्रतिकार गर्दा रुसले अधिक क्षति व्यहोरेको अमेरिकी राष्ट्रिय सुरक्षा परिषद्का सल्लाहकार जोन किर्बीले नियमित पत्रकार सम्मेलनमा बताए । पूर्वी डोनेट्स्क क्षेत्रमा भीषण युद्ध भएको तथा युक्रेनी सेनाको सामना गर्दै रुसले बख्मुत सहरलाई आफ्नो नियन्त्रणमा लिन संघर्ष गरिरहेको छ ।

भिडियो

अमेरिकी गुप्तचर निकायबाट प्राप्त सूचनाका आधारमा सल्लाहकार किर्बीले रुसले व्यहोरेको उक्त क्षतिको जानकारी दिएका हुन् । रुसले व्यहोरेको पछिल्लो क्षतिबाट मस्को दबाबमा परेको छ । अमेरिकाका अनुसार युक्रेनी सेनाबाट मारिएकामध्ये करिब आधा भाडाका सेना वाग्नर समूहका हुन् ।

उनीहरूलाई युद्धमा सहभागी हुन कारगारबाट मुक्त गरिएको थियो । हत्या, लागुपदार्थ दुर्व्यसनी, बलात्कार जस्ता मुद्दा लागेका उनीहरू बिनाप्रशिक्षण युद्ध मैदानमा पुगेका थिए ।

विश्लेषकहरूका अनुसार बाख्मुतलाई नियन्त्रणमा लिनु रुसका निम्ति महत्वपूर्ण छ किनकी डोनेट्स्क क्षेत्रको क्रामाटोर्स्क र स्लोभियान्स्कका ठूला सहरमा अगाडि बढ्न रुसलाई सहज हुनेछ ।

गतहप्ताको बुधबार मात्र नेटोका प्रमुख जेन्स स्टोल्टेनबर्गले युक्रेनलाई १ हजार ५ सय ५० वटा बख्तरबन्द गाडी र २ सय ३० वटा ट्याङ्क प्रदान गरेको बताएका थिए । उनले युक्रेनका सेनालाई प्रशिक्षण दिएर युद्धका लागि तयार गर्ने वाचा गरेका थिए ।

२० अप्रिलमा त स्टोल्टनबर्ग रुसले आक्रमण गरिरहेको युक्रेन नै पुगेका थिए । उनले सो क्रममा युक्रेन नेटोमा आबद्ध हुन सम्भव भएको अभिव्यक्ति पनि दिएका थिए ।

चीनले रुस र युक्रेनबीचको युद्ध रोक्नका लागि मध्यस्तकर्ताको भूमिका खेल्ने बताइरहँदा पनि रुस र युक्रेनबीचको युद्ध रोकिएको छैन । गतहप्ता नेटोले हतियार सहयोग गरेको घोषणा गरेकै भोलिपल्ट रुसले दुईवटा क्षेप्यास्त्र युक्रेनको आवसीय भवनमा आक्रमण गरेको थियो । सो आक्रमणमा २६ सर्वसाधारणको मृत्यु भयो ।

यतिबेला बख्मुतमा रुसी सेना र उसका भाडाका लडाकुलाई युक्रेनका सेनाले कडा प्रतिकार गरिरहेको अवस्था पनि छ । रुसका भाडाका लडाकु वाग्नर समूहले अहिले बख्मुतमा धेरै लडाकु मारिएकाले त्यहाँबाट भाग्ने अभिव्यक्ति दिइरहेका छन् । रुसले वाचा गरेअनुसार हतियार आपूर्ति गर्न नसकेको वाग्नरका प्रमुख यभगेनी प्रिगोजिनले बताएका छन् । सीएनएन र रोयटर्सको सहयोगमा

प्रकाशित मिति: मंगलबार, वैशाख १९, २०८० १३:०४