मौलाकाली केबुलकार आजदेखि सञ्चालनमा, प्रधानमन्त्री दाहालले गरे उद्घाटन

A+ A A-

गैँडाकोट–१ मा करिब २ अर्ब रुपैयाँको लागतमा निर्माण भएको मौलाकाली केबुलकार सोमबारदेखि औपचारिक रूपमा सञ्चालनमा आएको छ । उक्त केबुलकारको उद्घाटन प्रधानमन्त्री पुष्पकमल दाहाल प्रचण्डले गरेका हुन् । सो अवसरमा प्रधानमन्त्री दाहाल मौलाकाली केबुलकार बटम स्टेसनमा ताम्रपत्र अनावरण पनि गरेका थिए ।

उद्घाटन समारोहलाई सम्बोधन गर्दै प्रधानमन्त्री दाहालले शिथिल अर्थतन्त्रलाई उकास्न मौलाकालीजस्ता पर्यटकीय पूर्वाधारको महत्त्व रहने उल्लेख गर्दै सरकार निजीक्षेत्रलाई सहजीकरण गर्न प्रतिबद्ध रहेको बताए । उनले आर्थिक वृद्धि र रोजगारी सिर्जनामा निजीक्षेत्रको महत्त्वपूर्ण भूमिका रहेको बताए । तनहुँ, नवलपुर र चितवन जिल्ला पर्यटकीय हब बन्दै गएको बताउँदै उनले यस क्षेत्रलाई आर्थिक समृद्धिको क्षेत्रको रूपमा विकास गर्ने पनि बताए ।

त्यसैगरी, गण्डकी प्रदेश प्रमुख पृथ्वीमान गुरुङले मौलाकाली केबुलकारको निर्माणसँगै यस क्षेत्रको आर्थिक तथा सामाजिक विकासमा सहयोग पुग्ने विश्वाससमेत व्यक्त गर्नुभयो ।

मौलाकाली केबुलकारका अध्यक्ष चन्द्रप्रसाद ढकालले देशको शिथिल अर्थतन्त्रलाई उकास्नका लागि पर्यटकीय पूर्वाधार निर्माणलाई तीव्रता दिन र विकासका काम समयमै पूरा हुने वातावरण बनाउन सरकारलाई आग्रह गरे ।

नेपाल उद्योग वाणिज्य महासंघका अध्यक्षसमेत रहेका ढकालले निजीक्षेत्रले तोकिएको समयमा, तोकिएकै बजेटमा, तोकिएकै गुणस्तरमा काम गर्न सक्षम छौँ भन्ने उदाहरण मौलाकाली केबुलकारसमेतले प्रस्तुत गरेको बताए । मौलाकाली केबुलकार निर्माणकै रफ्तारमा अन्य पर्यटकीय पूर्वाधार र विकासमा काम सम्पन्न हुने हो भने अर्थतन्त्रमा देखिएको शिथिलता स्वतः कम हुँदै जाने ढकालले उल्लेख गरे ।

मुलुकका सबै प्रदेशमा कम्तीमा एउटा यस्तै पर्यटकीय पूर्वाधार निर्माणको काम तीव्र पारेको बताउँदै ढकालले बुटबलमा निर्माणाधीन लुम्बिनी केबुलकार पनि केही हप्ताभित्रै सञ्चालनमा आउने जानकारी दिए । चितवन, तनहुँ र नवलपुरको संगम क्षेत्र नेपालकै धार्मिक तथा सांस्कृतिक महत्त्वको पवित्र भूमि रहेको उनले बताए ।

मौलाकालिका मन्दिरको साढे चार सय वर्ष पुरानो इतिहास छ । यस मन्दिरबाट दाहिनेतर्फ देखिने देवघाट वैदिक सनातन धर्ममा पवित्र भूमि हो । नारायणी, देवघाट र त्रिवेणीजस्ता देवभूमि र तपोभूमिसहितका सम्पदाहरूको ऐतिहासिक गरिमा र महिमालाई सबै नेपाली समक्ष पुर्‍याउन केबुलकारसहितका नयाँ पर्यटकीय संरचनाले सघाउ पुग्ने विश्वास लिएको पनि अध्यक्ष ढकालले उल्लेख गरे ।

ढकालले भने, 'पर्यटनको विकासमार्फत स्थानीय नागरिकको जीवनस्तर उकास्दै देशको समृद्धि हासिल गर्ने कामलाई निरन्तरता दिने प्रतिबद्धता व्यक्त गर्दछौँ । स्थानीय सांस्कृतिक महत्त्वका संरचनाहरू राष्ट्र र जनताका साझा सम्पत्ति हुन् । नवलपुरको गहनाका रूपमा निर्मित मौलाकाली केबुलकारसहितको पर्यटकीय संरचनालाई स्थानीय जनताको आफ्नै सम्पत्तिका रूपमा विकास गर्नका लागि स्थानीय समुदायको अधिकतम सहभागिता गराइएको हो ।'

उनका अनुसार अहिले नेपाल आउने विदेशी पर्यटकको औसत खर्च तथा बसाइ निकै कम छ र प्रतिदिन झन् घट्दो छ । यसलाई बढाउनुपर्ने चुनौती छ । पर्यटकलाई आकर्षित गर्ने, उनीहरूको नेपाल बसाइ र खर्च बढाउने खालका थप ठूला पूर्वाधारहरू निर्माण गर्नुपर्नेछ ।

यहाँको कला, संस्कृति, प्राकृतिक सौन्दर्य र यहाँको अलौकिक भूगोलको ज्ञानका लागि नेपालमा पर्यटक आउने गर्छन् । त्यसैले थप पर्यटकीय पूर्वाधारको विकासका लागि सरकारले निजीक्षेत्रलाई जति धेरै सहजीकरण गर्‍यो, त्यति नै छिटो देशको विकास हुने पनि अध्यक्ष ढकालले बताए ।

ढकालले भने, 'हामीलाई प्रकृतिले अपार सम्पदा वरदान दिएको छ । पर्यटन, प्रकृति र पर्यावरणमा हामीले गर्न सक्ने सम्भावना असंख्य छन् । त्यसमा हामीले हाम्रो भिजन र इच्छाशक्ति मिसायौँ र प्रविधि र पुँजी जोड्न सक्यौँ भने साँच्चिकै मिराकल हुन्छ भन्ने मेरो आत्मविश्वास छ । मलाई लाग्छ, यो मुलुकको निजीक्षेत्र निश्चय पनि विकास र परिवर्तनमा यस्तै मिराकल ल्याउन सक्षम छ । हामीले पटकपटक यसको पुष्टि पनि गर्दै आएका छौं ।'

धेरै स्थानीय तहहरूले आफ्नो क्षेत्रमा लगानी भित्र्याउन प्रतिस्पर्धा गर्नुपर्छ र त्यसका लागि लगानीकर्ताहरूलाई आह्वान मात्र गरेर पुग्दैन, ठोस र व्यावहारिक नीतिमार्फत सहजीकरण गर्नुपर्ने पनि अध्यक्ष ढकालले बताए ।

समग्र मुलुकको निजीक्षेत्रको नेतृत्वका हैसियतले लगानीमैत्री वातावरण निर्माण गर्न नीतिगत सुधार र सहुलीयतपूर्ण व्यवस्थाले मात्र स्वदेशी तथा विदेशी लगानी भित्र्याउन सकिन्छ भन्नेमा आफू दृढ रहेको पनि अध्यक्ष ढकालले उल्लेख गरे ।

करिब १,२०० मिटर लम्बाइको केबुलकारमा १४ वटा गोण्डोला रहेका छन् । फेदीबाट केबुलकार चढेपछि ५ मिनेटमा मन्दिरनजिकै रहेको टप स्टेसनसम्म पुग्न सकिन्छ । माथिल्लो स्टेसनसँगै बनिरहेको होटलमा ६० कोठा, ब्याङ्क्वेट हल, स्वीमिङ पुल र रेस्टुरेन्ट छन् ।

प्रकाशित मिति: सोमबार, वैशाख १८, २०८० १४:२२