तपाईंलाई सधैँ पछि पार्ने बहाना- गर्न त हुन्थ्याे नि, के गर्नु पैसै छैन !

A+ A A-

बहानाबाजीले मान्छेलाई प्रयास गर्नबाट पछि तान्छ । प्रयत्न नै नगरेपछि सफल हुने कुरै भएन । अल्छी लागेका बेला हामीमध्ये कतिपयले अनेक बहाना गरेर अल्छीपनालाई गोडमेल गर्छौं । परिणामस्वरूप हामी जहाँ थियौँ, त्यहीँ नै रहन्छौँ । तर, बहाना नगर्नेहरू हामीलाई पछि पारेर धेरै पर पुगिसकेका हुन्छन् । यस्तो बेला हामीसित पछुताउनेबाहेक अर्को विकल्प रहँदैन ।

उत्प्रेरक प्रस्ताेताहरूका अनुसार, हामी असाध्यै सामान्य कुरालाई बहाना बनाउँछाैँ, अनि पाइला चाल्नै अनकनाउँछाैँ । सामान्यतया मानिसले गर्ने बहाना के-के हुन् ? के ती साँच्चै पाइलाका अवरोधक हुन् ? आउनुस्, यसबारे चर्चा गरौँ ।

समय छैन

तपाईंलाई आफ्नो लक्ष्यप्राप्तिका लागि र सफल बन्नका लागि समयको अभाव नहुनु भनेको मात्र बहाना हो । जीवनमा अरूलाई खुसी पार्नका लागि होइन, आफ्नो जीवन सफल बनाउनतिर लाग्नुहोस् । भोलि भन्न छाेडेर आजका लागि मिहिनेत गर्नुहोस्, पक्कै सफल भइन्छ ।

पैसा छैन

धेरैलाई लाग्छ, आफूले चाहेको काम गर्न मसँग पैसा छैन, स्रोत छैन । आफूले खोजेजस्तै पैसा र स्रोत नमिल्दासम्म काम गर्नुहुन्न भने तपाईंको सपना सधैँ सपना नै रहन्छ । त्यसैले आफूसँग तत्काल भएको स्रोतको सक्दो उपयोग गर्नुहोस् । जे–जति छ, त्यसैबाट सुरुवात गर्नुहोस् । त्यसपछिका दिनमा स्रोतको पछि तपाईं होइन, तपाईंको पछि स्रोत नै स्रोत हुनेछ ।

सहयोगी छैन

जीवन तपाईंको आफ्नो हो । त्यसैले जीवनमा सफल बन्न आफ्नो सपना पूरा गर्न आफू एक्लै अघि बढ्नुहोस् । जिन्दगी भनेको यात्रा हो, यात्रामा मानिसहरू भेटिन्छन्, छुट्टिन्छन् । जीवनको यात्रामा धेरै अवरोधहरूको सामना गर्दै अघि बढ्ने साहस तपाईं आफैँले गर्नुपर्छ ।

यस्ताे हुन्थ्याे भने...

'त्यस्तो नभएको भए सायद मैले गर्थें,' यो वाक्य धेरै जनाको मुखबाट सुन्ने गरिन्छ । बहाना बनाउनेहरू यो वाक्यलाई आफ्नो मस्तिष्क र जिब्रोमा राखेर हिँड्छन् । त्यसैले यस्तो बहाना बनाउन आजैबाट त्याग्नुहोस् ।

बरू म उत्कृष्ट छु (अहम् नगरी), म यो गर्न सक्छु, म एक विजेता हुँ । म कठिनाइबाट डराउँदिनँ भनेर आफ्नो काममा डटेर लाग्नुहोस् । (एजेन्सीहरूकाे सहयाेगमा)

प्रकाशित मिति: शनिबार, वैशाख १६, २०८० ०९:१०