पैँतीस वर्ष स्कुल पढाएका रेशमलालले चार भाइसँग मिलेर थाले सन्तुला खेती

A+ A A-

बागलुङ नगरपालिका- ९, तित्याङको अदुवाबारीस्थित एउटै पाटो खेतमा झण्डै ५ सय सुन्तलाका बिरुवा हुर्किरहेका छन् । राम्रो धान फल्ने खेत तीन वर्षयता सुन्तला बगैँचामा परिणत भएको हो ।

कम लगानीमा धेरै आम्दानी दिने सुन्तला खेतीका लागि भकुण्डेका पाँचभाइले खेत मासेर सुन्तला रोपेका हुन् । बागलुङ नगरपालिका- १०, भकुण्डे घर भएका दाजुभाइले १८ रोपनी जग्गामा लगाएका ५ सय सुन्तलाका बिरुवाले आगामी वर्षदेखि फल दिन थाल्नेछन् । पैँतीस वर्षसम्म शिक्षण गरेका ६२ वर्षीय रेशमलाल शर्माले आफ्नो ६ रोपनी जग्गामा २ सय सुन्तलाका बिरुवा लगाएका छन् भने अन्य चार भाइले १२ रोपनी जग्गामा करिब ३ सय सुन्तलाका बिरुवा राेपेका छन् ।

भकुण्डेमा घर र तित्याङमा खेत भएकाले धान उत्पादनको लागत बढेको र मकै तथा गहुँ नछर्दा ६ महिना बाँझो छोड्नुपर्ने अवस्था रहेकाले नै उक्त खेत अहिले सुन्तलाका बिरुवाले हरियाली बनेको रेशमलाल शर्माले बताए ।

'हामी पाँच भाइको एउटै पाटो खेत थियो, अहिले उक्त खेत सुन्तला बगैँचामा परिणत भएको छ, आगामी वर्षदेखि उत्पादन देला, पाँच भाइको सल्लाहमै सबै खेतलाई एउटै बगैँचाका रूपमा विस्तार गर्न सुन्तला लगाएका हौँ,' उनले भने, 'धान खेतीभन्दा सुन्तलाबाट दोब्बर आम्दानी गर्न सकिने हाम्रो विश्वास छ ।'

रेशमलालसहित ताराप्रसाद शर्मा, लक्ष्मण शर्मा, केशव शर्मा र दामोदर शर्माले धान खेतीभन्दा सुन्तला खेतीबाटै राम्रो आम्दानी गर्न सकिने भन्दै १८ रोपनी जग्गामा तीन वर्षअघि सुन्तला खेती थालेका हुन् । उक्त सुन्तला बगैँचा जिल्लाकै ठूलो बगैँचा बनाउने गरी एकीकृत ढङ्गले सुन्तला खेती थालिएको हो । रेशमलाल भने अझै १ सय बिरुवा थप्ने लक्ष्यमा छन् ।

धान, मकै र गहुँ गरी तीन बाली हुने खेतमा भकुण्डेबाट आएर तीन खेती गर्न सम्भावना नभएको र धान खेती मात्रै गर्दा २५ देखि ३० मुरी धानले खनजोत र खेतालाको रकमसमेत नउठ्ने भएकाले सुन्तला खेतीमा लागेको अर्का भाइ केशव शर्माले बताए ।

'धान खेतीमा भन्दा सुन्तलामा राम्रो आम्दानी हुन्छ भन्ने हाम्रो निर्णय भयो र अहिले सबै बगैँचामा ५ लाख रुपैयाँ लगानी भइसकेको छ, सिँगानाका उन्नत जातका बिरुवा मापदण्डअनुसार खाडल खनेर लगाइएको छ,' उनले भने, 'बागलुङ बजारबाट नजिकै रहेको तित्याङमा नमुना सुन्तला बगैँचा बनाएर कृषकका लागि अध्ययन अवलोकनको केन्द्रसमेत बनाइने लक्ष्य छ ।' एक/एक मिटर लामो र गहिरो खाडलमा गोबर मल हालेर पाँच मिटरको फरकमा सुन्तलाका बिरुवा लगाइएको छ ।

सुरुमा सुन्तला खेतीलाई बढी मिहिनेत गर्नुपरे पनि बिरुवा हुर्किएपछि समस्या नहुने कृषक केशवको भनाइ छ । सुन्तला फार्ममा एक जनालाई रोजगारी दिने गरी पाँच भाइबीच सल्लाह भएको छ ।

एकीकृत रूपमा सुन्तला खेती गर्दा सुरक्षा, सिँचाइ तथा मलजलमा सहज हुनेछ । १८ रोपनी जग्गामा फैलिएको सुन्तला बगैँचालाई ‘आरम्भ एकीकृत कृषि फार्म’ नामकरण गरेर दर्तासमेत गरिएको छ । उक्त बगैँचालाई तारबार गर्न आवश्यक रहेको सुन्तला किसानको भनाइ छ । सुन्तला किसानलाई बगैँचा व्यवस्थापन तथा औषधि र उपकरणमा अनुदान दिन सकिने कृषि ज्ञान केन्द्रका प्रमुख भानुभक्त भट्टराईले जानकारी दिए ।

प्रकाशित मिति: शनिबार, वैशाख १६, २०८० ०६:०८