जिम्मेवार शिक्षकबाट विद्यार्थीको मनोबल घटाउने प्रयास कल्पना पनि गर्न सक्दैनौं : डीएभी

डीएभी सुशील केडिया विश्व भारती विद्यालयले कक्षा ८ मा अध्ययनरत छात्रालाई अपमान नगरेको दाबी गरेको छ । कमजोर विद्यार्थीको पुनः परीक्षामार्फत माथिल्लो कक्षामा लैजाने तयारी भइरहेको बेलामा छात्रामाथि विद्यालय प्रशासनले अपमान गरेको भन्दै कवि तथा चलचित्र निर्देशक उपेन्द्र सुब्बाले विद्यालयले आफ्नी छोरी अन्यत्र सार्ने निर्णय लिएको विद्यालयले बताएको छ ।

विद्यालयले ८ वैशाखमा प्रेस विज्ञप्ति प्रकाशित गरी विद्यालयका नियमित पठनपाठन, मूल्यांकन, परीक्षण र पुनः परीक्षण, परामर्श, छलफल, सहजीकरण, पृष्ठपोषणका आधारमा विद्यार्थीको स्तरोन्नति गरिने निर्णय प्रक्रियालाई स्वभाविक मान्नुपर्ने उल्लेख गरेको छ ।

साथै, विद्यालयका नियमित प्रक्रियामा कुनै गुनासो हुँदा त्यसको समाधान आपसी, छलफल, वार्ता, संवाद र समझदारीमा गर्न सकिने पनि उल्लेख गरेको छ । विज्ञप्तिमा भनिएको छ, ‘विद्यालयका नियमित प्रक्रियामा कुनै गुनासो हुँदा त्यसको सामाधान आपसी छलफल, वार्ता, संवाद र समझदारीमा गर्न सकिने कुरा विद्यालय प्रशासन विश्वास गर्दछ । साथै, विद्यालय प्रशासनले उक्त विषयका सम्बन्धमा सरोकारवाला निकायहरुसमा समेत जानकारी गराईसकेको कुरा अवगत गराउन चाहन्छ ।’

विद्यालयले प्रशासनले विद्यार्थीले सहज रुपमा पढ्न पाउने कुरामा विद्यालय परिवार सधै सचेत र संवेदनशील रहेको पनि उल्लेख गरेको छ । उसले विज्ञप्तिमा भनेको छ, ‘काँचो माटोरुपी बालमस्तिष्कलाई उनीहरुको उमेर र क्षमताअनुसार शिक्षा र संस्कार दिएर सुसंस्कृत, योग्य एवं जिम्मवार नागरिक उबनाउने कुरामा विद्यालय हरसंभव लागिरहेको छ ।’

विद्यालयले विद्यार्थीको मनोबल घटाउने र हतोत्साही बनाउने कुरा शिक्षक तथा विद्यालय प्रशासनले कल्पना पनि गर्न नसक्ने बताएको छ । विद्यालय प्रशासनले भनेको छ, ‘जिम्मेवार शिक्षक तथा विद्यलाय प्रशासनबाट विद्यार्थीको मनोबल घटाउने र हतोत्साहित गर्ने काम कल्पनासमेत गर्न सकिँदैन ।’

विद्यालयका सहायक प्रधानध्यापक रामचन्द्र खनालले पनि कवि सुब्बाको छोरीलाई अपमान नगरेको बताएका छन् । खनालले सुब्बाको पढाइबारे भने अभिभावकलाई पटक पटक जानकारी गराइसकेको तर विद्यार्थीलाई अपमान गरेको कुरा सत्य नभएको दाबी गरेका छन् । खनालले भनेका छन्, ‘अघिल्लो दिन नानुकी आमा र उनीसँग छलफल गरेका थियौं, त्यसबेला बाबा खै त ? भन्दा व्यस्तताले आउनसक्नु भएन भनेर नानुकी आमाले जवाफ दिनुभयो । भोलिपल्ट नानुको बाबा उपेन्द्र सर विद्यालयमा अपमान भएका कारण छोरीको विद्यालय परिवर्तन गर्छौं भन्दै विथ ड्र फारम भरेर जानुभयो ।’

सहायक प्रधानध्यापक खनालका अनुसार विद्यालयले सबै विद्यार्थीलाई समान ठानेका र सुब्बाको पढाइको अवस्थाबारे अभिभावकलाई पटक पटक जानकारी दिएको दिइएको थियो । खनालले भने, ‘उनी त पढाइमा अलि कमजोर छन् है भनेका थियौं । तै पनि उनीमाथि हामीले कुनै नराम्रो व्यवहार गरेका थिएनौं, एकाएक समाजिक सञ्जालमा विद्यालयमाथि आक्षेप लगाएर स्टाटस लेखेपछि हामीलाई दुःख लागेको छ ।’

२९ चैतमा स्थानान्तरण फारम भरेका कवि सुब्बाले छोरीको स्थानान्तरणको कारण भने व्यक्तिगत उल्लेख गरेका छन् । गत शुक्रबार अभिभावक, विद्यालय प्रशासन र ललितपुर महानगरपालिकाबीच बैठक भएको र त्यसबेला बच्चाको विगतदेखि हालसम्मको अवस्थाबारे छलफल भएको थियो । छलफलमा सुब्बाकी छोरी पढाइमा कमजोर भएको प्रमाणपत्र विद्यालयले देखाएको थियो । छलफलमा सहभागी महानगरका प्रतिनिधिले पनि सुब्बाको छोरीलाई विद्यालयबाट हटाउने वा अनुतिर्ण गराउने उद्देश्य भएको बताउने गरेका छन् । छलफलमा महानगरपका राजु महर्जन सहभागी थिए ।

विद्यालयले सुब्बाजस्तै ५ जना विद्यार्थीलाई विद्यालयले पुनः परीक्षा लिएर अघि बढ्ने बताउँदै आएको छ । विद्यालयले पुनः परीक्षा लिने प्रयास गरिरहेको अवस्थामा विद्यार्थीलाई विद्यालयबाट निकाल्नु उचित नहुने महानगरका प्रवक्ता महर्जनको भनाइ छ ।