शनिबार दिउँसो प्रभु बैंकका कर्मचारीले प्रहरीलाई खबर नगरेका भए...

A+ A A-

शनिबार दिउँसो करिब ४ बजे काठमाडौं प्रहरी परिसरका प्रहरी अधिकारी आन्तरिक बैठकमा व्यस्त थिए । बैठक चलिरहेका बेला परिसर प्रमुख एसएसपी उत्तम सुवेदीको फोनको घण्टी बज्यो ।

‘नविल बैंकको दरबारमार्गस्थित एटीएम मेसिनबाट अत्यधिक पैसा निकालेको देखिएको छ, ‘हामीलाई शंका लाग्यो सर, केही गर्नुपर्यो,’ सुवेदीको फोनमा यस्तो अनुरोध आयो ।

एसएसपी सुवेदीलाई फोनमा यसरी जानकारी गराउने व्यक्ति प्रभु बैंकका कर्मचारी थिए ।

ती कर्मचारीले बैंकको एटीएम सिस्टम ह्याक भएको शंका गर्दै यति कुरा सुनाएपछि एसएसपी सुवेदीले तत्कालै परिसरका डिएसपी होविन्द्र बोगटीको नेतृत्वमा टोली खटाए । टोलीले थोरै पनि ढिला नगरी अनुसन्धान थाल्यो ।

प्रहरीलाई सूचना दिने प्रभु बैंकका कर्मचारीले नविल बैंकको दरबारमार्गको एटीएम मेसिनको कुरा गरेका थिए । त्यसैले प्रहरीको तीनवटा बृत्तको कार्यक्षेत्र पर्ने दरबारमार्ग, कमल पोखरी र लैनचौर प्रहरी वृत्तलाई समेत अपरेसनका लागि मुभ गरियो ।

अपरेसनका क्रममा प्रहरी टोलीले नविल बैंकको दरबारमार्गस्थित एटिएम बूथबाटै एक जनालाई पक्राउ गर्यो । उनीबारे सोधीखोजी गर्दै जाँदा उनी चिनियाँ नागरिक भएको थाहा भयो । नाम थियो झु लियाङग्याङ ।

प्रहरीले रेडह्याण्ड समातेका झुसँग खासै पैसा थिएन । उनको साथमा ४५ हजार रुपैयाँ मात्र भेटियो । र, २० वटा एटीएम कार्ड । झुसँग प्रहरीले हात्तीसारको जयनेपाल हल नजिकैको होटल माया मनोरम बुटिकको कोठा नम्बर ६०४ को चाबी पनि फेला पारेको थियो ।

एक जनासँग यति धेरै एटीएम कार्ड र विदेशी नागरिकले नेपाली बैंकका एटीएमबाट पैसा झिकेको पाएपछि प्रहरीलाई झन् शंका लाग्यो । त्यसमा पनि प्रभु बैंकले सूचना प्रहरीका लागि थप अनुसन्धान गर्ने गतिलो आधार छदैथियो ।

त्यसपछि डिएसपी बोगटीको टोली झुसँग भेटिएको चाबी लिएर होटल मनोरम बुटिक पुग्यो । होटलको कोठा नम्बर ६०४ जान लिफ्ट चढ्दै गर्दा लिप्टमा सुटकेश सहित ३ जना चिनिया नागरिक बाहिरिन लाग्दै गरेको भेटियो ।

‘होटलबाट बाहिरिन लागेका व्यक्तिको शंका लाग्यो, हामीले तत्काल खानतलासी गर्यौं, ती तीन जना नै एटीएम ह्याकिङमा संलग्न व्यक्तिहरु रहेछन्, उनीहरु झुकै साथी रहेछन्,’ डिएसपी बोगटीले भने ।

प्रहरीले उनीहरुमाथि अनुसन्धान गर्दै जाँदा थाहा भयो, नेपालबाट रातारात अर्बौं रुपैयाँ चोर्ने गरी चाइनिज गिरोह सक्रिय भएको रहेछ । शनिवार नै उनीलाई नसमातेको भए नेपाली बैंकबाट एक रातमै अर्बौं रुपैयाँ चोरी हुन सक्थ्यो ।

त्यसपछि प्रहरीले थप एक जना ह्याकरलाई पक्राउ गर्यो । उनीहरुलाई आजैमात्र प्रहरीले सार्वजनिक गरेको छ । पक्राउ पर्नेहरुमा चिनियाँ नागरिक लिन जेलनेमाङ, लुयो जेलालिले, क्यू योङ र चेङ विन विन रहेका छन् ।

उनीहरुको साथबाट प्रहरीले १ करोड २६ लाख २९ हजार ४५ रुपैयाँ, अमेरिकी डलर ९ हजार १ सय ८, चिनियाँ युआन १ हजार १ सय ९१, कम्बोडियाको मुद्रा ५ हजार, ८० हङकङ डलर र युरो २ सय ५० बरामद गरेको छ ।

प्रहरीले नक्कली भिसाकार्ड १ सय ३२ थान, सक्कली भिसाकार्ड १७ थान, एउटा कार्ड प्रिन्टर मेसिन, ६ वटा मोबाइल, ल्यापटप, सामसुङ मोबाइल र डाटा कार्डसमेत बरामद गरेको छ ।

चीनमै योजना

प्रहरीका अनुसार चीनको सांघाइबाट चाइना एयरलाइन्समार्फत काठमाडौं आएका ह्याकर समूहले नेपालका बैंक ह्याक गरी एकदुई दिनमा फर्किने योजना चीनमै बनाएर आएका थिए ।

‘बेलैमा थाहा भयो र हाम्रा बैंकका पैसा जोगियो,’ काठमाडौं प्रहरी परिसरका प्रमुख एसएसपी सुबेदीले भने ।

एक करोड ६८ लाख चोरी

राष्ट्र बैंकका कार्यकरी निर्देशक बमबहादुर मिश्रले ह्याकर समूहले एक करोड ६८ लाख ५४ हजार रुपैयाँ ह्याक गरेर लिएको प्रारम्भिक तथ्यांक आएको बताए । यो अंक बढ्नसक्ने उनको भनाइ छ ।

कुन बैंकबाट कति झिकियो ?

ह्याकरले कुन–कुन बैंकबाट कति–कति रकम लिए भन्नेबारे पूर्व विवरण आएको छैन । तर, एनआइसी एसिया, प्रभु र नविल बैंकबाट बढी पैसा निकालेको हुनसक्ने अनुमान राष्ट्र बैंकको छ ।

भारतबाट पनि झिकियो

बैंकर्स संघका अध्यक्ष ज्ञानेन्द्र ढुङगाना अनुसार चिनियाँ ह्याकर समूहले भिजा कार्ड सिस्टम ह्याक गरेका हुन् । बैंकिङ नेटवर्क भिजा कार्ड प्रयोग हुने चारवटा स्वीचमध्ये ह्याकर समूहले एउटा स्वीच ह्याक गरेर पैसा लिन खोजेको उनको भनाइ छ ।

‘ह्याकरको समूहले नेपालमात्र नभएर भारतको एटीएम बुथबाट समेत केही बैंकको रकम लिएको देखिएको छ, हामी यसको अनुसन्धानमै छौं,’ ढुङगानाले भने ।

मुख्य ह्याकर अझै फरार

प्रहरीका अनुसार शुक्रबार उनीहरुको समूहमा आठ जना ह्याकर आएको खुलेको छ । जसमध्ये पाँच जना पक्राउ परे पनि अन्य तीन जना अझै फरार छन् । पक्राउ परेका पाँच जना उनीहरुको सहयोगी भएको अनुमान प्रहरीको छ ।

‘बैंक ह्याक गर्ने अरु तीन जना रहेको र अहिले पक्राउ परेकाहरु एटीएम बुथबाट पैसा निकाल्न जाने सहयोगी मात्र भएको अनुमान हामीले गरेका छौं, अन्य तीन जनाको खोजी तीव्र पारेका छौं,’ एसएसपी सुवेदीले भने ।

फरार भएका तीन जना ह्याकर होटलमा बसेर बैंकको सिस्टम ह्याक गर्ने र पक्राउ परेका व्यक्तिहरुलाई एटीएम बुथबाट पैसा लिन पठाउने गरिएको प्रहरीको प्रारम्भिक अनुसन्धानले देखाएको छ ।

याे पनि पढ्नुहाेस् :

चिनियाँ ह्याकरको निशानामा नेपाली बैंक, अधिकांश बैंकका एटिएम बन्द

मुख्य बैंकिङ प्रणालीमा आक्रमण भएको होइन : राष्ट्र बैंक

एटीएम नचलेका प्रभु र एनआइसी एसिया बैंकबाट यसरी झिक्न सकिन्छ पैसा

एटिएम ह्याक प्रकरण : राष्ट्र बैंकपछि नेप्स पुगे बैंकर्स

एटीएमबाट चाेरीः बैंककाे लापरवाही कि राज्यकाे कमजाेरी ?

मुख्य बैंकिङ प्रणालीमा आक्रमण भएको होइन : राष्ट्र बैंक

भारतमा बैंक ह्याक गरेर दुई दिनमा निकालिएको थियो ९४ करोड

प्रकाशित मिति: सोमबार, भदौ १६, २०७६ ०४:४६