मुख्यमन्त्री खगराजको सम्पत्ति : पोखरामा घर, ऋण लिएर काठमाडौंमा घडेरी

A+ A A-

गण्डकी प्रदेशका मुख्यमन्त्री खगराज अधिकारीले सरकार छोड्नुअघि आफ्नो सम्पत्ति विवरण सार्वजनिक गरेका छन् । शनिबार विश्वासको मत लिन लागेका अधिकारीले शुक्रबार मुख्यमन्त्री तथा मन्त्रिपरिषद् कार्यालयको वेबसाइटमार्फत गत माघ १२ गते बुझाएको सम्पत्ति विवरण सार्वजनिक गरेका हुन् ।

गत चैत १० गते माओवादी केन्द्रका दुई जना मन्त्रीले राजीनामा दिएका थिए । सात सदस्यीय गण्डकी प्रदेशको मन्त्रिमण्डलमा अहिले एमालेका चार र राप्रपाका एक गरेर पाँच जना मन्त्री छन् । सम्पत्ति विवरण बुझाएका सरकार छोडेका माओवादीका मन्त्रीसहित ६ जनाको सम्पत्ति विवरण सार्वजनिक भएको छैन ।

के–कति छ सम्पत्ति ?

पोखरा–१२ ढिकालेथरमा मुख्यमन्त्री अधिकारीको ६ आनामा बनेको घर छ । उक्त घर पैतिृक सम्पत्ति बिक्रीबाट ६० लाख रूपैयाँमा बनाएको र हाल २ करोड रूपैयाँ पर्ने उनले उल्लेख गरेका छन् ।

मुख्यमन्त्री अधिकारी गण्डकी विकास बैंकका शेयरधनी हुन् । उनीसँग उक्त बैंकको २ हजार ४९७ किता शेयर छ । उनको जन्मथलो पोखरा–३१ मा ८ ठाउँमा जग्गा छ । तर, त्यो कति क्षेत्रफलमा हो स्पष्ट छैन र कित्ता नम्बर खुलाइएको छैन । गाउँको खेतबारीबाट कृषि फसलबाट वार्षिक ६ लाख रूपैयाँ आम्दानी हुने सम्पत्ति विवरणमा उल्लेख छ ।

मुख्यमन्त्री अधिकारीको २५ लाख रूपैयाँ ऋण देखाइएको छ । ३ जना व्यक्तिसँग ३५ लाख लिएकोमा २०७८ सालमा १० लाख रूपैयाँ तिरेको उनले उल्लेख गरेका छन् ।

मुख्यमन्त्री अधिकारीसँग एउटा स्कोर्पियो गाडी छ । उनले त्यो गाडी २०७८ साल मंसिरमा किनेका हुन् । आइ–२० कार केदार थपिलयाको बेचेर रकम थप गरेर किनेको मुख्यमन्त्रीको विवरणमा उल्लेख छ । थपिलया अधिकारीका साला हुन् । उनी अहिले सचिवालयमा पनि छन् । त्यसबाहेक अग्रगामी कृषि फार्ममा श्रीमती रमा पाण्डेको साढे १६ लाख रूपैयाँ र चितवनमा बनिरहेको रिसोर्टमा पनि श्रीमतीकै नाममा २० लाख रूपैयाँ लगानी छ ।

२०७८ साल जेठमा ८० लाख रूपैयाँ प्रभु बैंकबाट श्रीमतीकै नाममा ऋण लिएर काठमाडौंको चन्द्रागिरि नगरपालिकामा अधिकारीले घडेरी किनेका छन् । मुख्यमन्त्रीसँग नगद १५ लाख रूपैयाँ छ । त्यो स्वआर्जनबाट प्राप्त भएको दाबी गरिएको छ । अंशबण्डाबाट प्राप्त ३ तोला सुन पनि उनीसँग छ । विभिन्न बैंक र सहकारीमा मुख्यमन्त्री अधिकारीको १० लाख रूपैयाँ मौज्दात छ । तर कुन–कुन बैंक र सहकारीमा खाता छ भन्ने खुलाएका छैनन् ।

मुख्यमन्त्री खगराज र उनकी श्रीमतीको ऋण जोड्दा एक करोड पाँच लाख रूपैयाँ हुन्छ । खगराजको व्यक्तिबाट लिएको २५ लाख र श्रीमतीको बैंकबाट लिएको ८० लाख रूपैयाँ ऋण रहेको विवरणमा छ । सम्पत्ति विवरण हेर्दा मुख्यमन्त्री अधिकारी बैंक, सहकारीबाहेक कतै लगानी गरेको देखिँदैन ।