राराको मुर्माकोटमा २० करोड लगानीमा रिसोर्ट

A+ A A-

रारा राष्ट्रिय निकुन्ज क्षेत्रका भौतिक संरचना हटाउने तयारीसँगै बफर जोनमा होमस्टेहरू बढेका छन् । 'ताल वरिपरि अब कुनै भौतिक संरचना रहँदैन सबै सर्छन्,' निकुन्जका वार्डेन विश्वबहादुर श्रेष्ठले भने, 'ताल नजिक रहेको गेष्ट हाउस पनि अब रहन्न ।'

रारा जाने पर्यटकको संख्या बढे पनि खानबस्नका लागि सोअनुसार सेवासुविधा उपलब्ध हुन नसकेको कतिपयको गुनासो रहने गरेको छ । अझ त्यहाँका केही संरचना हट्ने वार्डेन श्रेष्ठको भनाइ छ ।

निकुन्जको कोर क्षेत्रमा कुनै भौतिक संरचना नरहे पनि त्यसको विकल्पमा बफर जोन क्षेत्रमा होमस्टेहरू बढेको श्रेष्ठ बताउँछन् ।

'तालबाट देब्रेतिर बफर जोन छ । त्यहाँ पर्यटकको आर्थिक योजनाअनुसारका रिसोर्ट र होमस्टे छन्,' श्रेष्ठले भने, 'तर, धेरैलाई यो थाहा नहुँदा रारामै बस्ने योजनासहित आउने पर्यटकको संख्या कम छ ।'

बफर जोन रहेको छायाँनाथ रारा गाउँपालिका वडा नम्बर ९ का वडाध्यक्ष बिर्खबहादुर रोकाया रारा आउने नै हो भने दुई/तीन दिनको योजना बनाएर आउन सुझाव दिन्छन् । 'रारा ताल नजिकैबाट जति सुन्दर देखिन्छ मुर्माकोटबाट त्यो भन्दा शुन्दर देखिन्छ,' रोकायाले भने, 'जसलाई मुर्माकोट थाहा छ उहाँहरू आउनुहुन्छ । धेरै तालको फोटो खिचेर फर्किहाल्नुहुन्छ ।'

मुर्माकोट क्षेत्रमा यसअगाडि नै रारा इको रिसोर्ट, रारा कल्चरल होमस्टेलगायत सञ्चालनमा छन् । यसै साता पाँच करोड लगानीमा रारा भिलेज रिसोर्ट सञ्चालनमा आएको छ । रारा ताल, छायाँनाथ हिमाल क्षेत्र प्रष्ट देख्न सकिने स्थानमा खुलेको रिसोर्ट पूर्ण हुन २५ करोड लाग्ने रिसोर्टका अध्यक्ष अनुपविक्रम शाह बताउँछन् ।

rara (2)1682002658.jpg

'रारा क्षेत्रको सम्पत्ति भनेको प्रकृति हो । रिसोर्ट, होटल जे बने पनि आँखामा नबिझ्ने गरी बनाउनै पर्छ,' उनले भने, 'आन्तरिक पर्यटकलक्षित मूल्यसहितको सुविधा दिन सके रारा आउने धेरैको सपना पूरा गर्न सकिन्छ । त्यसैका लागि २० रोपनी क्षेत्रफलमा परम्परागत बस्तीकै शैलीमा रिसोर्ट बनाएर क्षमता बढाउँछौँ ।'

ताल क्षेत्रबाट पैदल करिब तीन घन्टामा मुर्माकोट पुग्न सकिन्छ जहाँबाट राराको सबै क्षेत्रसहितको सुन्दर दृष्यसँगै छयाँनाथसहितका हिमाली दृष्य हेर्न सकिन्छ ।

तालको देब्रेतिर करिब आधा घन्टा तेर्सो हिँडेपछि मुर्मा क्षेत्र आइपुग्छ । अनी दुई घन्टा उकालो चढेपछि मुर्माकोट पुगिन्छ । हिँड्न सक्नेका लागि लोठसल्लाहको जंगलहुँदै जान रमाइलो हुन्छ । हिँड्न नसक्नेका लागि घोडाको पनि व्यवस्था गरिएको छ ।

प्रकाशित मिति: बिहीबार, वैशाख ७, २०८० २०:४२