पेटमा प्वाल पारेपछि अप्रेसन थियटरममै चिकित्सकले शल्यक्रिया गर्न नसकिने बताउँदा...

पेटमा प्वाल पारेपछि अप्रेसन थियटरममै चिकित्सकले शल्यक्रिया गर्न नसकिने बताउँदा...

A+ A A-

डडेल्धुराको आलीताल गाउँपालिका वडा नम्बर ३ की लक्ष्मी बोहरा पेट दुख्ने समस्या भएपछि उपचारका लागि वैशाख ५ गते धनगढी पुगिन् ।

धनगढीको केजी अस्पताल भर्ना भएकी बोहराको उपचारमा संलग्न चिकित्सकले पित्तथैलीमा पत्थरी छ भन्दै शल्यक्रिया गर्नुपर्ने सुझाव दिए । र उनको शल्यक्रिया सुरु भयो । तर शल्यक्रिया बीचमै उपचार रोकिएको छ । चिकित्सक डाक्टर दीपक सिंहले सजिलै शल्यक्रिया गर्न सक्ने भन्दै अस्पताल भर्ना गराएका थिए । तर शल्यक्रिया उनले नै बीचमै रोकिए ।

लक्ष्मीको पित्तथैलीमा रहेको पत्थरी निकाल्न पेटमा प्वाल पारेपछि जोखिमपूर्ण हुने भन्दै चिकित्सकहरुले त्यसै छाडेको उनका छोरा लक्ष्मणले बताए । लक्ष्मीलाई बुधबार साँझ अप्रेशन थियटरमा लगिएको तर डाक्टरले पेटमा प्वाल पारेपछि शल्यक्रिया गर्न नसकिने भन्दै औषधि दिएर घर लैजान भनेका थिए । चिकित्सकले शल्यक्रिया नहुने भनेपछि आफन्तहरु आक्रोसित भएका छन् ।

‘अस्पतालले आमाको यहीँ उपचार भइहाल्छ । अन्त लैजानुपर्दैन भनेपछि हामीले अप्रेसन गर्न मानेको हुँ, तर आधा अप्रेसन गरेर यहाँ गर्न सकिँदैन, योभन्दा अगाडि रिस्क छ भनेर घर लगेर जाउ । दुई महिनापछि काठमाडौं वा बैंगलोरको राम्रो अस्पतालमा देखाऊ भन्नुभयो’, बोहराले भने ।

अधुरै अप्रेसनपछि अहिले समस्या भइरहेको प्रतिक्रिया उपचाररत लक्ष्मीको रहेको छ । उनले भनिन्, ‘अप्रेसन गर्छु भनेर थियटरमा लगेको थाहा छ । मैले त अप्रेसन भइसकेको होला सोचेको तर, अहिले पनि पेट दुखिरहेको छ । तीन ठाउँ प्वाल पारेको छ । स्वास्थ्यमा थप समस्या आएको छ ।’

लक्ष्मीको प्वाल पारेर अप्रेसन रोकिएपछि अहिले परिवारले दुई महिनासम्म स्वास्थ्यमा समस्या देखिए अस्पतालले जिम्मेवारी लिनुपर्ने बताएका छन् । उनीहरुले उपचारमा अहिलेसम्म लागेको सबै शुल्क फिर्ता पाउनुपर्ने माग गरेका छन् ।

उपचारमा संलग्न चिकित्सक तथा अस्पतालका व्यवस्थापक सर्जन डाक्टर सिंहले दूरबिन विधिबाट पित्तथैलीको पत्थरीको शल्यक्रिया गर्ने क्रममा आन्द्रामा कोलेस्ट्रोलको मात्रा बढी देखिएपछि जोखिमपूर्ण हुने भएकाले रोकिएको बताए ।

‘उहाँको पित्तथैलीमा पत्थरी देखिएपछि उहाँहरुकै सहमति लिएर दूरबिन विधिबाट शल्यक्रिया गर्न खोजेका थियौं तर आन्द्रामा कोलेस्ट्रोलको मात्रा बढी देखिएपछि जोखिम हुने भएकाले औषधि दिएर ७÷८ हप्तापछि गर्दा ठीक हुन्छ भन्ने सल्लाह दिएका हौं’, डा. सिंहले भने ।

बिरामीकै आफन्तले दुई महिनापछि अन्य अस्पतालमा लैजाँदा हुन्छ कि हुदैन भनेर जिज्ञासा राखेपछि काठमाडौं वा भारतमै लगेर पनि गर्न सकिने सल्लाह दिएको तर रेफर भने नगरेको डा दिपक सिंहले बताए । ‘तत्काल ज्यानको जोखिम हुने भएकै कारण शल्यक्रिया गर्न नसकिने भनिएको हो । यसमा अन्यथा केही होइन’, डा. सिंहले भने ।

प्रकाशित मिति: बिहीबार, वैशाख ७, २०८० १८:४०