मुग्लानले खोसेको एउटा सपना

A+ A A-

परिवारको आर्थिक अवस्था कमजोर भएपछि कैलालीको घोडाघोडी नगरपालिका–४ का कल्लाने रोकाया मजदुरीका लागि गत १५ साउनमा भारत गए ।

सन्तानको भविष्य र श्रीमतीको उपचारका लागि प्रशस्त पैसा कमाउने सपना बोकेर मुग्लान पसेका रोकायाको सपना अब कहिल्यै पुरा नहुने भएको छ ।

घरबाट हिँडेको तिन दिनै रोकायाको मृत्युको खबर आएपछि अहिले उनको परिवार साहाराविहीन भएको छ ।

ऋण निकालेर किरियाखर्च गरे पनि अहिले एकछाट टार्न समेत मुस्किल भइरहेको छ । रोजगारीको लागि भारत गएका श्रीमानको भारतमै मृत्यु भएपछि अहिले समस्या भइरहेको उनका श्रीमती जोमती रोकायाले बताइन् । ‘कमाउन भन्दै भारत पसेको तीन दिनमै श्रीमानको मृत्यु भयो । अव १ महिने नाबालक सहित ५ सन्तानलाई म कसरी हेरौँ ?’ आँसु झार्दै उनी भन्छिन् ।

उनका ५ जना छोराछोरी छन् । ‘श्रीमान् बित्नुभयो ५ जना छोराछोरी छन् ,घरको अवस्था यस्तो छ, कमाउने मान्छे कोही छैनन् अब कसरी यिनीहरूको लालनपालन गरौँ,’ जौमतीले गहभरी आँसु पार्दै भन्छिन् ।

जोमतीको घर छ, त्यो पनि बर्खामा चुहिन्छ । खुट्टाको घाउका कारण घर भित्र बाहिर गर्दा पनि घिस्रेर हिँड्नुपर्छ उनले । आर्थिक अवस्था कमजोर भएका कारण उनले खुट्टाको उपचार गराउन सकेकी छैनन् । श्रीमान बितेपछि अव उनको मनमा समेत घाउ थपिएको छ ।

घरमुलीको मृत्यु पछि घर सम्हालीरहेकी जौमती एक वर्षदेखि अर्काको सहारामा बाचिरहेकी छिन् । खुट्टामा देखिएको रोगको उपचार गराउन आर्थिक अभाव हुँदा अपाङ्ग सरह जीवनयापन गरिरहेकी छिन् ।

बुवाको अकालमै मृत्यु आमाको यो अवस्था पछि घरकी जेठी छोरी कल्पना रोकाया अहिले सबैकी सहारा बनेकी छिन् । ‘ घरमा खानलाई अन्न छैन, भएको घरको छानोपनि चुहिन्छ,’ कल्पना भन्छिन् ।

परिवारमा परेको यो बज्रपात पछि रोकायाका सन्तान स्कुल जानबाट समेत वञ्चित छन् । आमाको खुट्टामा १ वर्ष देखि समस्या देखिएपछि आफैले घरको सबै काम सकेर स्कुल जानुपर्ने बाध्यता रहेको जेठी छोरी कल्पनाले बताइन् ।

‘साना साना भाइ बहिनी छन्, उनीहरूको स्याहार गर्नुपर्छ । आमा हिँड्न सक्नुहुन्न । घरमा कमाउने कोही हुनुहुन्न ।’ कल्पना भन्छिन् । कमाउने बाउको मुत्यु भएपछि घर परिवारमा साँझ बिहान खान–लगाउनसमेत निकै समस्या रहेको उनले बताइन् ।

रोकाया परिवारको लागि स्थानीयले सहयोग सङ्कलन थालेका छन् । रोकाया परिवारको सहयोग सङ्कलनको लागि पहल गरिरहेकी स्थानीय राधा पाण्डेले सक्दो सहयोग गर्न आग्रह गरिन् ।

बिचल्लीमा रहेको परिवारलाई स्थानीय सरकारले कुनै राहत प्रदान गर्न नसक्दा केही स्थानीयले सहयोग गरेको उनले बताइन् ।

३८ वर्षकी जौमतीसँग हालसम्म नागरिकतासमेत छैन । स्थानीय जनप्रतिनिधि उनलाई नागरिकता दिलाइ सक्दो सहयोग गर्न तत्पर देखिएका छन् । घोडाघोडी नगरपालिका–४ का वडाध्यक्ष टेक बहादुर बुढाले तत्काल वडा कमिटीको बैठक बसाएर राहतको पहल गर्ने बताए ।

प्रकाशित मिति: आइतबार, भदौ १५, २०७६ २३:०८