सरकार ढल्नुअघिका दिनः सचिवले मुख्यमन्त्रीलाई टेर्नै छोडे, बजेट माग्दा काठमाडौं उडे

सरकार ढल्नुअघिका दिनः सचिवले मुख्यमन्त्रीलाई टेर्नै छोडे, बजेट माग्दा काठमाडौं उडे

A+ A A-

संसदीय अंकगणित हेर्दा मुख्यमन्त्री खगराज अधिकारी तीन दिनपछि गण्डकी प्रदेश सरकारको नेतृत्वबाट बाहिरिने सम्भावना बढी छ । वैशाख ९ मा प्रदेशसभाबाट विश्वासको मत लिने अधिकारीको तयारी छ । तर, प्रदेशसभाबाट उनले विश्वासको मत नपाउने सम्भावना बढी छ ।

यस्तो अवस्थाका बीच कार्यालयमा रहँदा उनलाई भेट्न सांसद, पार्टीका नेता आइरहन्छन् । आफ्ना योजनामा बजेट हालिदिन भनेर आएकालाई उनले केही गर्न सकेका छैनन् । आर्थिक मामिला मन्त्रालयका सचिव विष्णुप्रसाद शर्माले सहयोग नगरेपछि मुख्यमन्त्रीले आफ्ना योजनामा पनि बजेट हाल्न पाएका छैनन् ।

अर्थसचिवले आफ्ना योजनामा बजेट हाल्ने गरी मुख्यमन्त्री कार्यालयले पठाएको फाइल नै रोकिदएका छन् । जसले गर्दा मुख्यमन्त्री अधिकारी, आर्थिक मामिलामन्त्री सीताकुमारी सुन्दास ‘मन्त्री मात्रै भएर’ सरकारबाट बाहिरिँदै छन् । एउटा बजेट पनि ल्याउन नपाउँदा र आफ्ना योजनामा हाल्न खोजेको बजेटमा अर्थसचिवले कैँची चलाइदिएपछि उनीहरू ‘रित्तो हात’ बाहिरिनुपर्ने अवस्था आएको छ ।

मुख्यमन्त्री र अर्थमन्त्रीले आफ्नो काम गरिदिन भनेपछि शर्मा काठमाडौं गएका छन् । शर्मा अधिकारी नेतृत्वको सरकार ढल्नुअघि नआउने गरी तीन दिनअघि काठमाडौं पुगेका हुन् । मन्त्रालयका कर्मचारीका अनुसार वैशाख ९ पछि मात्रै पोखरा फर्किने गरी सचिव शर्मा काठमाडौं गएका हुन् । ‘योजना आयोगको तीन दिनको कार्यक्रम र वित्त आयोगको एक दिनको बैठकमा सहभागी हुन जानुभएको हो,’ अर्थ मन्त्रालयका प्रवक्त राजेन्द्रबन्धु अर्यालले शिलापत्रसँग भने, ‘सरकार ढल्नेबेला अफिस नै खाली बनाएर जानुभएको होइन । संयोग त्यस्तै परेको हो ।’ सचिव शर्माको मोबाइल भने अफ छ ।

artha sachib gandaki karyakakshya1681903860.jpg

सरकार छोड्नुअघि आफूले चाहेका र एमाले सांसदका केही योजनामा बजेट हालिदिन मुख्यमन्त्रीले आग्रह गरेका थिए । सचिवले रकमान्तर गर्न प्रक्रिया अघि बढाउन नचाहेपछि फाइल अर्थ मन्त्रालयमै रोकिएको छ । आफूहरूले फ्रिज हुने बजेटलाई कानुनअनुसार नै रकमान्तर गर्न खोज्दा अर्थ सचिवले रोकेको गुनासो मुख्यमन्त्री र अर्थमन्त्रीको छ ।

‘हामीले त्यस्तो व्यक्तिगत स्वार्थलाई रकमान्तर गर्न लागेको होइन । फ्रिज भएर जाने सवारी खरिद, कोरोनासम्बन्धी बजेटलाई सदुपयोग गर्न खोजेका हौँ,’ मुख्यमन्त्रीको सचिवालय भन्छ, ‘पैसा राखेर मात्रै कसरी बजेट खर्च हुन्छ ?’

प्रदेशभरका ८० वटा जति योजनालाई एक अर्ब रूपैयाँभन्दा बढी रकमान्तरको प्रयास भएको थियो । मुख्यमन्त्री र अर्थमन्त्रीले खेर जाने बजेट सदुपयोग गरेर बजेट खर्च बढाउनुपर्ने अवस्था रहेको अर्थ सचिवलाई सुनाएका थिए । उनले ‘हुन्छ–हुन्छ’ भनेर टारिरहेका थिए, अन्तिमतिर काठमाडौं गए ।

पर्वत घर भएका शर्मा राष्ट्रियसभा अध्यक्ष गणेशप्रसाद तिमिल्सनाको जोडबलमा अर्थमा बसेका हुन् । तिमिल्सिनाले सिफारिस गरेपछि मुख्यमन्त्री अधिकारीले पनि उनलाई हटाउन जोडबल गरेनन् । अहिले मुख्यमन्त्री सचिवको व्यवहार देखेर पछुतोमा छन् ।

अर्थ सचिवसँग मुख्यमन्त्री, मन्त्रीमात्रै होइन, निर्माण व्यवसायी पनि आजित छन् । प्रदेश सरकारका सडक, पुलसहित संरचना बनाएको पैसा नपाएपछि ठेकेदार रूष्ट छन् । उनीहरूले काम गरेको २० करोड रूपैयाँ जति पैसा लिन बाँकी छ । भौतिक पूर्वाधार मन्त्रालयले बजेट आवश्यक परेको भन्दै अर्थमा फाइल पठाइएको र त्यतैबाट रोकिएको भनेर जवाफ दिएपछि ठेकेदार अर्थ मन्त्रालयतिरै धाइरहेका छन् ।

भौतिक मन्त्रालयले आफूसँग बचेको पैसा दिने र बाँकी अर्थ मन्त्रालयले समन्वय गर्दिनुपर्ने भन्दै ठेकेदारलाई गर्नुपर्ने भुक्तानी चुक्ता गर्न खोजेको छ । मुख्यमन्त्री र अर्थमन्त्री ठेकेदारको भुक्तानी गर्न सहमत भए पनि अर्थसचिव शर्माले त्यसलाई ‘होल्ड’ गरिदिएका छन् ।

प्रकाशित मिति: बुधबार, वैशाख ६, २०८० १७:१६