माइक्रोसफ्टको च्याट जीपीटीलाई टक्कर दिन मस्कले ल्याउँदैछन् ट्रुथ जीपीटी (भिडियो)

माइक्रोसफ्टको च्याट जीपीटीलाई टक्कर दिन मस्कले ल्याउँदैछन् ट्रुथ जीपीटी (भिडियो)

A+ A A-

विश्वविख्यात प्रविधि कम्पनी माइक्रोसफ्टको च्याट जीपीटीले पछिल्लो समय प्राविधिक संसारमा तरंग मच्चाइरहेको छ ।

यो आर्टिफिसियल इन्टेलिजेन्स एआई च्याटबट हो । च्याटबट भनेको इन्टरनेटमा मानव प्रयोगकर्ताहरूसँग कुराकानीको नक्कल गर्न डिजाइन गरिएको कम्प्युटर प्रोग्राम हो ।

च्याट जीपीटीले यतिबेला विश्वभरका मानिसहरूको प्रश्नको उत्तर दिइरहेको छ । यहाँ सोधिएका लगभग सबै प्रश्नको उत्तर पाउन सकिन्छ ।

तर, विश्वका दोस्रो धनाढ्य एलन मस्क भने यसबाट प्रभावित छैनन् । मस्कले च्याट जीपीटीले सही र गुणस्तरीय जानकारी दिन नसकेको टिप्पणी गरेका छन् ।

भिडियो

मस्कले हालै एक अन्तर्वार्तामा आफूले च्याट जीपीटीभन्दा राम्रो प्लेटफर्म ट्रुथ जीपीटी ल्याउने उद्घोष पनि गरेका छन् । फक्स न्युजसँग कुरा गर्दै मस्कले ट्रुथ जीपीटीले ब्रह्माण्डको प्रकृति बुझ्ने दाबी गरेका छन् ।

अमेरिकाको नेभाडामा मस्कले नयाँ च्याटबट विकास गर्न एक्स डट एआई नामको कम्पनी दर्ता गरिसकेका छन् । वास्तवमा मस्क आफैँ च्याट जीपीटी निर्माण गर्ने कम्पनी ओपन एआईका संस्थापकमध्येमा पर्छन् । सन् २०१८ मा उनी सो कम्पनीको बोर्ड सदस्यबाट पछाडि हटेका थिए ।

मस्क ट्विटर, टेस्ला, स्पेस एक्सजस्ता विश्व चर्चित कम्पनीका मालिक हुन् । हालै ट्विटरको लोगो कुकुर बनाएपछि उनको आलोचना पनि भएको थियो ।

पछिल्ला दिनहरूमा विश्वभर आर्टिफिसियल इन्टलिजेन्स एआईको दबदबा बढिरहेको छ । एआईका कारण केही वर्षभित्रै विश्वभरका ३० करोड मानिसहरूले जागिर गुमाउने अनुसन्धानहरूले देखाइसकेको छ ।

एआईका माध्यम जस्तै च्याट जीपीटी र अन्य प्लेटफर्मले करोडौँ मानिसको जागिर खोसिदिने गोल्डम्यान स्याच इकोनोमिस्टको अध्ययन बताउँछ ।

उनीहरूले आगामी केही वर्षमा कम्युटरबाट हुने १८ प्रतिशत काम एआई सफ्टवेयरले गर्ने प्रक्षेपण गरेका हुन् । यसको अर्थ कार्यालयमा कम्युटरमार्फत् गरिने कामलाई एआईको बढ्दो प्रभावले असर गर्नेछ ।

शारीरिक बल प्रयोग हुने काममा भने एआईको भूमिका नहुने गोल्डम्यान स्याच इकोनोमिस्टले जनाएको छ ।

च्याट जीपीटीले यतिबेला निबन्ध लेख्न, लेख लेख्न खुबै भूमिका खेलिरहेको छ । यतिबेला च्याट जीपीटीको परिस्कृत रूप जीपीटी– ४ सार्वजनिक भएको छ । यसले कोडिङ गर्न, वेबसाइट बनाउन र परीक्षा उच्च अंकमा पास गर्न मद्दत गर्ने बताइएको छ ।

योभन्दा परिस्कृत एआईका सफ्टवेयरहरूले शिक्षक, वेब डिजाइनर जस्ता व्यक्तिको जागिर नै खाइदिने खतरा भएको बताइएको छ ।

एआई कम्प्युटर विज्ञान र बलियो डेटासेटहरूको संयोजन हो । यो मानिसहरूको समस्या समाधान गर्न सक्षम भएको विज्ञहरू बताउँछन् ।

प्रकाशित मिति: बुधबार, वैशाख ६, २०८० १३:४५