द्रुत गतिको यामाहा एरोक्स १५५ स्कुटरको बिक्री खुला, मूल्य ४ लाख ७४ हजार

A+ A A-

यामाहा मोटरसाइकल र स्कुटरको नेपालका लागि आधिकारिक वितरक एमएडब्लू इन्टरप्राइजेजले बहुप्रतीक्षित यामाहा एरोक्स १५५ अल्टिमेट स्कुटर बाइकिङको बिक्रीवितरण सुरुवात गरेको छ ।

विशिष्ट र स्लिक एरोडायनामिक स्पोर्टी डिजाइनका साथ नेपाली बजारमा ल्याइएको एरोक्स १५५ मा गति र शक्तिको सम्मिश्रण रहेको कम्पनीको दाबी छ । प्रदर्शन, शैली र सवारी अनुभवका लागि यसले नयाँ मानक सिर्जना गर्ने कम्पनीले जनाएको छ ।

कम्पनीका अनुसार यस स्कुटरमा जडित लिक्विड कुल्ड इन्जिनले यसलाई १२० किमि प्रतिघन्टाको उच्च गति प्रदान गर्नेछ । यसको १५५ सीसीको 'आर' डीएनए इन्जिनले १५ पीएस पावर दिन्छ, जसले राइडरहरूलाई गति र शक्तिको उचित सन्तुलन अनुभूति प्रदान गर्दछ । अगाडिको एलईडी हेडलाइटहरूले रात्रि समयमा पनि उत्कृष्ट भिजिबिलिटी प्रदान गर्छ भने पछाडिको टेल लाइटमा बाह्र कम्प्याक्ट एलईडीहरू छन्, जसले बाइकको सौन्दर्यमा आधुनिकताको स्पर्श थप्दै थ्रीडीको आवरण दिन्छ ।

एरोक्स १५५ को ५.८ इन्च एलसीडी इन्स्ट्रुमेन्ट स्क्रिनले स्पिडोमिटर, आरपीएम र भीभीए सूचकहरू प्रदर्शन गर्छ, जसले सडकमा हुँदा महत्त्वपूर्ण जानकारी ट्र्याक गर्न सजिलो बनाउँछ । स्कुटरमा यामाहा वाई–कनेक्ट जडित भएका कारण स्मार्टफोनमा सम्बन्धित एपमार्फत जडान गर्न सकिन्छ । यसले सवारहरूलाई मर्मतको समय, खराबीका सूचनाहरू, माइलेज, ब्याट्रीको स्तर र पार्किङ स्थानजस्ता कुराहरू ट्र्याक गर्न सहज बनाउँछ ।

स्पोर्टी डिजाइनका बावजुद यामाहा एरोक्स १५५ एकदमै फराकिलो छ र सिटमुनि २४.५ लिटरको स्टोरेज पनि उपलब्ध छ । यसले धेरै उन्नत प्रविधिहरू पनि प्रदान गर्छ । जस्तै, भेरियबल भल्भ एक्चुएसन (भीभीए), इन्धन खपतमा सहयोग गर्ने खालको निष्क्रिय स्टप-स्टार्ट गर्ने विधि र परिष्कृत सुरक्षाका लागि एबीएससँग फ्रन्ट डिस्क ब्रेक पनि जडित छन् ।

यामाहा एरोक्स १५५ तीन फरक रङहरूमा उपलब्ध छन् । रेसिङ ब्लू, ग्रे वर्मिलियन र मेटालिक ब्ल्याकको मूल्य ४ लाख ७४ हजार ९ सय तोकिएको छ । यसलाई ग्राहकहरूले यामाहाको आधिकारिक शोरूमहरूबाट किन्न र बुक गर्न सक्ने कम्पनीले बताएको छ ।

बिक्री प्रारम्भको अवसरमा एमएडब्लू इन्टरप्राइजेजका सीईओ राजु क्षेत्रीले भने, 'एरोक्स १५५ नेपालको स्कुटर बजारमा नयाँ मोड हो । यसले नयाँ र अनुभवी राइडर दुवैका लागि परफर्मेन्स, स्टाइल, राइडिङ एक्सपेरियन्सका लागि नयाँ स्ट्यान्डर्ड स्थापित गरेको छ । यामाहा एरोक्स १५५ को शक्तिशाली इन्जिन, अत्याधुनिक प्रविधि र आकर्षक डिजाइनका कारण नेपालका दुईपाङ्ग्रे सवारीसाधनप्रेमीहरूले यसलाई राम्रोसँग स्वीकार गर्नेछन् भन्नेमा म विश्वस्त छु ।'

प्रकाशित मिति: सोमबार, वैशाख ४, २०८० १३:१८