२०८० मा कहाँ–कहाँ घुम्ने ? रोज्नुस् गन्तव्य

A+ A A-

ल नयाँ वर्ष लाग्यो, सबैलाई शुभकामना !

अनि २०७९ कस्तो रह्यो ? ३ सय ६५ दिन त बितिगयो तर, के यी दिनहरू यादगार रहे ? कहाँ–कहाँ घुम्नुभयो ? घुम्ने बानी छैन भने, थोरै ठाउँ घुम्नुस् तर २०८० मा कतै न कतै नयाँ गाउँ, ठाउँ जाने प्रयास गर्नुस् । घुम्दा गाउँले बाँचेको जीवन देख्नुहुन्छ, शहरबारे गाउँले के सोचिरहेको छ थाहा पाउनुहुन्छ, समाज र देश बुझ्ने, प्रकृति निहाल्ने अवसर मिल्छ ।

देशभित्रका थुप्रै गन्तव्यमध्ये छोटो समय र सक्दो कम खर्चमा घुम्न सकिने गन्तव्यबारे हामी तपाईंलाई जानकारी गराउँदैछौँ । हामीले छनोट गरेका गन्तव्य २ देखि ५ दिनका छन् । त्यहाँ खाना–बस्दाको खर्च कति रात बिताइन्छ त्यसमा भर पर्छ । ट्रेकिङमा जाँदा दैनिक २ हजार रूपैयाँ छुट्याउनु भयो भने पुग्छ ।

खोप्रा लेक

कोरोना संक्रमण जोखिम घट्न थालेपछि म्याग्दीको खोप्रा लेकमा पर्यटकको संख्या उकालो लाग्न थालेको थियो । म्याग्दीको अन्नपूर्ण गाउँपालिका–५, शिखस्थिर खोप्रा लेक समुन्द्री सतहदेखि ३ हजार ७ सय मिटर उचाइमा छ ।

यो ट्रेक रूटअनुसार २ देखि ६ दिनको हुन्छ । कास्कीको धम्पुस–घान्द्रुक–बहेली–डाँडखर्क हुँदै जाँदा ५ दिन हुन्छ । तातोपानी–पाउँद्वार हुँदै कम समयमा खोप्रा जान पनि सकिन्छ । यो रूट दुई दिनको हो ।

तस्वीर: राकेश शर्मा

म्याग्दी सदरमुकाम बेनी–बासखर्क–नागी–महरेडाँडा, डाँडाखर्क हुँदै तीनदेखि चार दिनमा खोप्रा लेक पुग्न सकिने खोप्रा पुगेका म्याग्दीका पत्रकार राकेश शर्माले जानकारी दिए । खोप्राबाट २ दिन लगाएर तातोपानी कुण्ड गएर स्नान गरेर फर्कन सकिन्छ । फर्कंदा पुनहिलतिर आएर घान्द्रुक, नयाँपुल हुँदै फर्कन पनि सकिन्छ । खोप्रा लेकमा हरेक वर्ष साउनमा चौरीको आलो रगत खाने मेला नै लाग्छ ।

मुस्ताङ

धेरैले घुम्न जान चाहने गन्तव्य हो, हिमालपारिको जिल्ला मुस्ताङ । सुख्खा माटो र सुख्खा बालुवाका ठूला र लोभलाग्दो देखिने पहाड नै मुस्ताङप्रति आकर्षण हुनुको मुख्य कारण हो ।

मुस्ताङ पुग्नेहरू प्रायः मुक्तिनाथ मन्दिर, ढुम्बा ताल, कोराला नाका, लोमानथाङ पुग्छन् । त्यसबाहेक टिटी ताल, सेकुङ ताल, लोघेकर गुम्बा, जोमसोमको इको म्युजियमलगायत ठाउँ छ । यी सबै ठाउँ घुम्न चारदेखि पाँच दिन लाग्छ । जोमसोमबाट उपल्लो मुस्ताङ, कोरला नाका पुग्न ६ घण्टा लाग्छ ।

अन्य गन्तव्यको तुलनामा मुस्ताङ अलिकति खर्चिलो छ । मुस्ताङका पत्रकार सुन्दरकुमार थकालीकाअनुसार आफ्नै साधन लैजाँदा सजिलो हुन्छ । त्यहाँ भनेको समयमा सवारी नपाइने र घुम्ने ठाउँहरू फरकफरक ठाउँमा भएकाले अन्य साधनमा जाँदा अप्ठेरो हुन सक्छ ।

मुस्ताङको उचाइ समुद्री सतहदेखि २ हजार ७०० मिटर छ । पोखरा ८ सय २२ मिटर उचाइमा छ । उचाइमा नगएका, व्यायम नगर्नेलाई एक्कासी स्वास्थ्यमा समस्या आउन सक्छ । त्यसैले ‘हाइ लाग्न’बाट जोगिन चिकित्सकसँग स्वास्थ्य सल्लाह लिएर जाँदा राम्रो हुन्छ ।

बाघ हेर्न बर्दिया

विशेषतः बाघ हेर्न चाहनेहरू बर्दिया राष्ट्रिय निकुञ्ज पुग्छन् । काठमाडौं, पोखराबाट सडक र हवाई मार्ग हुँदै बर्दिया पुग्न सकिन्छ । जहाजमा जाँदा नेपालगञ्ज विमानस्थल झरेपछि स्थल मार्ग प्रयोग गर्नुपर्छ ।

सार्वजनिक सवारीमा जाँदा भने सिधै बर्दिया राष्ट्रिय निकुञ्ज पुग्न सकिन्छ । तर, हवाई जहाजबाट जाँदा भने नेपालगञ्जबाट फेरि गाडी चढेर जानुपर्छ । विमानस्थलबाट ८९ किलोमिटर टाढा रहेको निकुञ्ज पुग्न दुई घण्टा लाग्छ । काठमाडौंबाट निकुञ्ज ५ सय ९० किलोमिटर टाढा पर्छ । काठमाडौंबाट गाडीमा १५ घण्टा लाग्छ ।

निकुञ्जअन्तर्गत चुरेको माथिल्लो भागतिर केही सल्लाका जंगलहरू छन् भने तराईको धेरैजसो भाग सालको जंगलले ढाकेको र बीच–बीचमा घाँसे मैदान छ । राष्ट्रिय निकुञ्ज तथा वन्यजन्तु संरक्षण विभागकाअनुसार पाटे बाघ, एक सिंगे गैंडा, चितुवा, जरायो, चित्तल, लगुना, बाह्रसिङ्गे र जंगली हात्तीलगायत ५६ प्रजातिका स्तनधारी वन्यजन्तु निकुञ्जमा पाइन्छन् ।

जलचरहरूमा घडियाल गोही, मगर गोही, सोंस र विभिन्न किसिमका माछा यहाँ पाइन्छन् । यस निकुञ्जमा हालसम्म ४३८ थरी रैथाने र बसाइँ सरेर पुग्ने चराहरूको अभिलेख गरिएको छ ।

रारा राष्ट्रिय निकुञ्ज, चितवन राष्ट्रिय निकुञ्ज, सगरमाथा राष्ट्रिय निकुञ्जलगायत ठाउँ जान सकिन्छ । कस्तुरी मृग, थार, घोरल, लंगुर, मोनाल, बँदेल, हात्ती यी निकुञ्जमा देख्न पाइन्छ ।

खुमैडाँडा

कोरोना कालपछि सामाजिक सञ्जालले चर्चामा आएको गन्तव्य हो, कास्कीको खुमैडाँडा । कास्कीको माछापुच्छ्रे गाउँपालिका–१ खुमैडाँडा पोखराबाट गएर दुई दिनमै फर्किन भ्याइन्छ ।

ग्रेट माछापुच्छ्रे ट्रेलअन्तर्गत सरीपाखा–खुमैडाँडा–कोर्चाङ पदयात्रा पोखराबाट दुई दिनमै सकिन्छ । पोखराको हरिचोकदेखि सरिपाखा साढे १३ किलोमिटर टाढा छ । त्यहाँसम्म गाडी जान्छ । सरिपाखाबाट आठ घण्टाको हिँडाइपछि खुमै पुगिन्छ ।

खुमैभन्दा माथि बास बस्ने ठाउँ छैन । खुमैबाट पनि हिमशृंखला र पहेँला बुट्यानले जो कोहीलाई मोहित पार्छ । ३ हजार २४५ मिटरको खुमैमा सधैं हिउँ पर्दैन । हिउँ खेल्न कोर्चाङ जान सकिन्छ । खुमैमा एक रात कटाएर भोलिपल्ट दुई घण्टा उक्लिएपछि कोर्चाङ पुगिन्छ । कोर्चाङ समुन्द्री सतहदेखि ३ हजार ६८२ मिटर उचाइमा छ ।

म्याग्दीको नागी गाउँ र महरेडाँडा

हिमशृंखला स्पष्ट देखिने नागी गाउँ र महरेडाँडामा पछिल्लो तीन वर्षयता पर्यटकको चासो विस्तारै बढ्दो छ । नागी गाउँ र महरेडाँडा दुवै म्याग्दीको अन्नपूर्ण गाउँपालिका–८, राम्चेमा पर्छ ।

म्याग्दी, कास्की र पर्वत तीनवटै जिल्लाबाट महरेडाँडा पुग्न सकिन्छ । म्याग्दीको बेनीबाट नागी–आलडाँडा हुँदै पर्वतको मिलनचोक–सालिजा–जलजला हुँदै, घोरेपानी–पुनहिल हुँदै, कास्कीको नयाँपुल–उल्लेरी–वनठाँटी हुँदै महरे जान सकिन्छ । यीमध्ये सबैभन्दा धेरै पर्यटक म्याग्दीको बेनी–नागी–आलडाँडा हुँदै जान्छन् । एक रात दुई दिनमा महरेडाँडा पुगेर फर्कन सकिन्छ ।

महरेडाँडाबाट गुर्जा, धौलागिरि हिमशृंखला, मानापाथी, टुकुचे, निलगिरि, अन्नपूर्ण प्रथम, अन्नपूर्ण दक्षिण, लमजुङ, धम्पुस, मनास्लुलगायत हिमाल देख्न सकिन्छ । यो डाँडा समुन्द्री सतहदेखि ३ हजार ३ सय १३ मिटरको उचाइमा छ ।

...अनि पदमार्ग र होमस्टे

आजकल फुर्सदमा पदयात्रा निस्कनेको संख्या ठूलो छ । कास्कीको अन्नपूर्ण हिमाल पदमार्ग र मर्दी हिमाल पदमार्ग, गोरखाको मनास्लु पदमार्ग, मनाङको थोरोङ्ला पास, सुदूरपश्मि प्रदेशको बडिमालिका यात्रा, डोल्पाको फोकसुन्डोलगायत ठाउँ जान सकिन्छ ।

विश्वकै होचो ठाउँमा रहेको हिमताल (२, ४५० मिटर) कास्कीको कपुचे पनि जान सकिन्छ । यो पनि दुई रात तीन दिनको ट्रेकिङलाई राम्रो गन्तव्य हो ।

पदमार्गजस्तै देशका चल्ती र चर्चित होमस्टे गण्डकी प्रदेशमा पर्छन् । नेपालकै पहिलो होमस्टे स्याङ्जाको सिरूवारी, कास्कीको ल्वाङ गाउँ, लमजुङको घले गाउँ र गुरूङहरूको बाक्लो एकीकृत वस्ती रहेको लमजुङकै भुजुङ गाउँ, नवलपरासीको अमलटारी थारू होमस्टे, धनकुटाको नाम्जे गाउँ, मकवानपुरको चित्लाङ, कैलालीको भादा गाउँलगायत ठाउँ जान सकिन्छ ।

होमस्टेहरू संस्कृतिबारे बुझ्न सकिने संग्रहालय हुन् । शहरदेखि वाक्क भएकालाई एक दिनको गाउँ बसाइँले पनि थकानमुक्त बनाउँछ । प्रायः होमस्टे बस्दा–खाँदाको खर्च प्रतिव्यक्ति एक हजार २०० देखि दुई हजार रूपैयाँसम्म हुन्छ । त्यसमा बेलुकीको खाना, बास र बिहानको नास्ता समावेश हुन्छ ।

...
यहाँ छुटेका, तपाईंका साथीभाइ गएको, कतै देखेका गन्तव्य पनि थुप्रै छन् । आफ्नो समय अनुकूल र सोधखोज गरेर यो वर्ष कतै न कतै घुम्नुहोला ।