मन्त्री चयनकाे विषयले शेखर-गगन समूहमै छैन मिल्ती

A+ A A-

एक समूहले अर्को समूहलाई दबाबमा राख्न खोज्दा सहमति जुट्न नसकेपछि कांग्रेस नेताहरूले १० वैशाखको उपचुनावपछि मात्र मन्त्रिपरिषद् विस्तार हुने बताउन थालेका छन् । मंगलबार हुने भनिएकाे नयाँ मन्त्रीको शपथ बिहीबारसम्म हुन सकेन । मन्त्रिपरिषद् विस्तार रोकिनुको प्रमुख कारण हो कांग्रेसले मन्त्रीको नाम नदिनु ।

शेखर-गगन समूहले सम्मानजनक सहभागिता नभएसम्म मन्त्रीको नाम नदिने बताउँदै आएकाे छ । ३ मन्त्री पाउनुपर्ने अडानमा याे समूह छ । कांग्रेसले ८ मन्त्रालय पाउँदा याे समूहले ३ मन्त्रीको दाबी गरेको थियो । कांग्रेसले १ मन्त्री थप गर्दा एक राज्यमन्त्री पाउने भएको छ ।

बिहीबार नेता शेखर काेइरालाले आफ्नाे समूहकाे बैठकमा तीन मन्त्री र एक राज्यमन्त्री पाउने ब्रिफ गरे ।

शेखर-गगन समूहमा खेल्न खोज्दै देउवा

पार्टी सभापति शेरबहादुर देउवाले शेखर-गगनभित्र आफ्नो स्वार्थ पूरा हुनेगरी खेलिरहेका छन् । पहिला भागवण्डा नै नगर्ने देउवाले पछिमात्र शेखरलाई संस्थापन इतर समूहको नेता स्वीकारे । उनले संसदीय दलको चुनावमा आफूसँग लडेका महामन्त्री गगन थापालाई हिस्सा नदिने गरेका छन् । थापाले आफूलाई मत दिने २५ जना सांसदलाई देउवाले कांग्रेसको हिस्सामा राख्न छोडेको टिप्पणी गरेका छन् । उनले आफ्नो दायित्व ती सांसदहरूको पक्षमा लड्नु रहेको बताउँदै आएका छन् ।

मन्त्री चयनकाे विषयले शेखर-गगन समूहमै एकरुपता छैन । त्यसमाथि देउवा पनि याे समूहमा खेलिरहेका छन् ।कपिलवस्तु २ बाट निर्वाचित सांसद सुरेन्द्रराज आचार्य राष्ट्रपति रामचन्द्र पौडेलका भान्जा हुन् । उनी आवद्धताको हिसाबले शेखर-गगन समूहमा छन् । तर मन्त्री बनाउँदा पौडेलको सिफारिसमा पर्ने भएकाले संस्थापसँग जोडिन्छन् । आचार्यलाई मन्त्री बनाउन देउवाले साे समूहलाई सन्देश पठाइरहेका छन् ।

आफ्नाे कोटामा संस्थापनको मान्छे मन्त्री बन्ने भएपछि शेखर-गगन समूहले देउवामाथि दबाब बढाइरहेको छ । उपसभापति धनराज गुरुङ देउवासँग नजिक हुन खोजिरहेको चर्चा कांग्रेसभित्र छ ।

दबाबमा शेखर-गगन समूह

देउवासँग सम्मानजनक भाग मागिरहेकाे याे समूह आफ्नै समूहका नेता मन्त्री बनाउन दबाब खेपिरहेको छ । संसदीय दलको चुनावमा महामन्त्री थापालाई सघाएका प्रदीप पौडेललाई मन्त्री बनाउन महामन्त्री थापा चाहान्छन् । उनलाई अर्का महामन्त्री विश्वप्रकाश शर्माको पनि समर्थन छ । तर देउवा पौडेलको नाममा सहमत छैनन् । पौडेलको नाममा शेखर-गगन समूहभित्र पनि एकमत छैन ।

पाैडेल संसदीय दलको चुनावपछि सिटौला क्याम्पमा फर्किएको बुझाइ इतर समूहका नेताहरूले राखेका छन् । पौडेल इतर समूहको बैठक भेलामा देखिएका छैनन् । त्यसले पनि पौडेललाई इतर समूहका नेताहरूले नपत्याएका हुन् ।

उपचुनावपछि मन्त्री किन ?

महामन्त्री गगन थापा सभापति शेरबहादुर देउवाकाे आग्रहमा उपचुनावपछि मात्र मन्त्रिपरिषद विस्तार हुने बताउँछन् । ‘पार्टीको ध्यान उपचुनावमा केन्द्रित गर्नुपर्ने बेला आएको छ । सभापति ज्यूले सो कुरा भन्नुभएको छ,’ थापाले शिलापत्रसँग भने ।

उता संस्थान पक्षका नेताहरू भने इतर समूहले मन्त्रीको नाम नपठाएकाले मन्त्रिपरिषद् विस्तार नभएको बताउँछन् । ‘हाम्राबाट समस्या छैन । इतर समूहले नाम दिएको छैन,’ संस्थापन समूहको एक नेताले शिलापत्रसँग भने ।

यस्तै कुरा देउवाको सचिवालयले पनि गर्छ । ‘इतर समूहबाट मन्त्रीको नाम आउने वितिक्कै मन्त्री पठाउने तयारी छ,’ सभापति देउवाका स्वकीय भानु देउवाले भने । तर महामन्त्री थापा भने सो कुरा नभएको बताउँछन् । ‘मन्त्रीको नाममा सहमति नभएको भन्ने होइन,’ उनले भने ।

गत चैत १७ मा प्रधानमन्त्री पुष्पकमल दाहाल प्रचण्डले मन्त्रिपरिषद् विस्तार गर्दा कांग्रेसले ४ जनालाई मात्रै मन्त्री पठाएको थियो । परराष्ट्र, कानून न्याय तथा संसदीय मामिला, स्वास्थ्य तथा जनसंख्या, युवा तथा खेलकुद र खानेपानी मन्त्रालयमा मन्त्री पठाउने तयारी गरेको छ । खानेपानी नभएको अवस्थामा वन मन्त्रालयमा कांग्रेसले मन्त्री पठाउने छ ।

प्रकाशित मिति: बिहीबार, चैत ३०, २०७९ २०:०५