कांग्रेसले टुंग्यायो मन्त्रीको नाम, भावी मन्त्री भन्छन्- आज शपथ भनिएको थियो तर भएन

कांग्रेसले टुंग्यायो मन्त्रीको नाम, भावी मन्त्री भन्छन्- आज शपथ भनिएको थियो तर भएन

A+ A A-

नेपाली कांग्रेसले मन्त्री बन्नेको नाम टुंगो लगाएको छ । संस्थापन समूहले नाम टुंग्याए पनि इतर समूहले टुंग्याएको थिएन । शेखर समूहबाट पनि उपसभापति धनराज गुरुङ र सांसद डिगबहादुर लिम्बु मन्त्री बन्ने निश्चित भइसकेको छ ।

थप एक मन्त्रीमा सहमहामन्त्री जीवन परियारलाई पठाउनुपर्ने दबाब थियो । यस्तै, अर्का सहमहामन्त्री बद्री पाण्डेको पनि मन्त्री बन्ने सूचीमा अगाडि थिए । तर, यी सम्भावनाहरू थाँति राख्दै शेखर समूहबाट सुरेन्द्रराज आचार्य मन्त्री बन्ने भएका छन् ।

‘नहुन्जेल निश्चित छैन । हामीले समूहमा सुनेका हौं,’ शेखर समूहका एक नेताले शिलापत्रसँग भने । संस्थापन समूहले भने एनपी साउद र मोहन बस्नेतलाई मन्त्री बनाउने भएको छ । बस्नेतले स्वास्थ्य मन्त्रालयम रुची देखाएका छन् । साउदको मन्त्रालय भने परराष्ट्र हुने सम्भावना रहेको नेताहरू बताउँछन् ।

मंगलबार नयाँ मन्त्रीहरूको शपथ गराउने तयारी भए पनि कांग्रेसले मन्त्रीहरूको नाम नदिदा शपथ हुन सकेन । बुधबार शपथ गराउने तयारी भए पनि अन्तिम समयमा मन्त्रीहरू फाइनल भएकाले नहुने भएको छ । ‘आज शपथ भनिएको थियो तर भएन । अब भोलि होला,’ मन्त्री बन्ने लाइनमा रहेका एक कांग्रेस नेताले शिलापत्रलाई भने ।

कांग्रेसले गुटगत असन्तुष्टि मिलाउन गठबन्धनबाट ९ मन्त्रालय माग गरिरहेको छ । भागवण्डामा ८ मन्त्रालय पाएको उसलाई जनमत पार्टीले खानेपानी मन्त्रालय छाडेपछि मन्त्रालयमा बार्गेनिङ गर्न सहज भएको हो । एक मन्त्रालय थप पाएमा संस्थापन समूहबाट मन्त्री बन्नेछन् ।

महामन्त्री गगन थापा र विश्वप्रकाश शर्माले सांसद प्रदीप पौडेललाई स्वजास्थ्य मन्त्री बनाउन पहल गरे पनि सभापति शेरबहादुर देउवाले राज्यमन्त्रीमात्र दिन सकिने बताएका थिए । संसदीय दलको चुनावमा पौडेल थापाको पक्षमा खुलेका थिए । सो बेलादेखि देउवा पौडेलसँग सकरात्मक छैनन् ।

कांग्रेसको भागमा परेका कानुन, न्याय तथा संसदीय मामिला मन्त्रालय, परराष्ट्र मन्त्रालय, वन तथा वातावरण मन्त्रालय, युवा तथा खेलकुद, स्वास्थ्य तथा जनसंख्या र खानेपानी मन्त्रालयमा मन्त्री पठाउन बाँकी छ ।

प्रकाशित मिति: बुधबार, चैत २९, २०७९ १८:१०