यौन हिंसाको आरोपले समाचारका पात्र बनेका क्रिकेटर

A+ A A-

२०७९ को सुरुवाततिर क्रिकेटर सन्दीप लामिछाने खेल प्रदर्शनका कारण चर्चामा थिए । तर, वर्षको मध्यतिर उनी गम्भीर अपराध गरेको आरोपमा जेल परे । नाबालिका बलात्कार अभियोगमा लामिछानेले तीन महिना केन्द्रीय कारागारमा बिताए । उनीविरुद्धको मुद्दा अदालतमा विचाराधीन नै छ ।

आफूलाई सन्दीपले होटलमा लगेर बलात्कार गरेको भन्दै १७ वर्षीया किशोरीले २१ भदौमा गौशाला प्रहरीमा जाहेरी दर्ता गराइन्, जुन बेला सन्दीप क्यारेबियन लिग खेल्न जमैकामा थिए । जिल्ला अदालत काठमाडौंले पक्राउ पुर्जी जारी गरेपछि २३ भदौमा नेपाल क्रिकेट संघ (क्यान) ले लामिछानेलाई राष्ट्रिय क्रिकेट टिमको कप्तानबाट निलम्बित गरेको थियो ।

आरोप सार्वजनिक भएपछि उनी क्यारेबियन लिग छोडेर बीचमा केही दिन सम्पर्कविहीन बनेका थिए । निर्धारित समयभित्र लामिछाने स्वदेश नफर्केपछि प्रहरीले इन्टरपोलमार्फत सूचना जारी गर्‍यो । लगत्तै उनले सामाजिक सञ्जालमार्फत आरोप इन्कार गर्दै कानुनी लडाइँ लड्ने प्रतिक्रिया दिए ।

२० असोजमा काठमाडौं आइपुगेका लामिछानेलाई प्रहरीले त्रिभुवन अन्तर्राष्ट्रिय विमानस्थलबाटै पक्राउ गरी हिरासतमा राखेको थियो । १८ कात्तिकमा उनलाई जिल्ला अदालत काठमाडौंले पुर्पक्षका लागि थुनामा पठाउने आदेश दियो । त्यसपछि लामिछानेले उच्च अदालत पाटनमा त्यसविरूद्ध रिट निवेदन दर्ता गराए । उच्च अदालतले सन्दीपलाई देश छोड्न नपाउनेसहित केही सर्त राखेर २० लाख रुपैयाँ धरौटीमा रिहा गर्ने आदेश सुनायो ।

तर, लामिछानेको निवेदनबमोजिम १५ फागुनम सर्वोच्चका न्यायाधीशद्वय सपना प्रधान मल्ल र कुमार चुडालको संयुक्त इजलासले उच्च अदालत, पाटनले दिएको आदेशलाई उल्ट्याउँदै लामिछानेलाई विदेश जान अनुमति दिएको छ । कतिपयले सर्वोच्चको आदेशलाई ‘अनपेक्षित र अस्वाभाविक’ माने भने कसैले सामान्य रूपमै लिए ।

लामिछानेविरुद्ध नाबालिग बलात्कारको मुद्दा काठमाडौं जिल्ला अदालतमा विचाराधीन छ । यही बेला सर्वोच्चले उनलाई विदेशमा खेल्न जान अनुमति मात्र दिएको छैन, अब मुद्दा लड्न सजिलोसमेत बनाइदिएको चर्चा छ । बलात्कार मद्दा विचाराधीन रहेकै अवस्थामा राष्ट्रिय टोलीबाट मैदान पसेका सन्दीपसँग स्कटल्यान्डको खेलाडीले हात मिलाउन मानेनन् । मुद्दा चलिरहेकै बखत भएका म्याचमा सन्दीपले उत्कृष्ट प्रदर्शन गरेका थिए । उनले आफूमाथिको आरोप अस्वीकार गर्दै आएका छन् ।

प्रकाशित मिति: बिहीबार, चैत ३०, २०७९ १७:१४